London/Berlin (dpa/SN). Britiska premierministerka Theresa May je so dźensa k rozmołwam wo wustupje Wulkeje Britaniskeje z Europskeje unije z nižozemskim knježerstwowym šefom Markom Ruttu a ze zwjazkowej kanclerku Angelu Merkel (CDU) zetkała. Do toho bě wona za dźensa wječor planowane wothłosowanje w britiskim parlamenće nastupajo z Brüsselom wujednane zrěčenje wo brexiće wotprajiła. Wšako bě wotwidźeć, zo w parlamenće žana wjetšina za nje była njeby.
Najwjetši zadźěwk w zrěčenju je tak mjenowany backstop, potajkim garantija, zo po brexiće žane nowe namjezne kontrole mjez britiskej Sewjernej Irskej a čłonom EU Irskej njenastanu. Hewak móhło być, zo přewinjena wobydlerska wójna znowa wudyri. Rjadowanje předwidźi, zo wostanje Wulka Britaniska jako cyłk tak dołho w europskej cłownej uniji, doniž njeje problem z nowym zrěčenjom rozrisany. Wčera wječor bě May w britiskim parlamenće hišće raz potwjerdźiła, zo chce dale za zrěčenje wojować.
Katowice (dpa/SN). Na druhe a rozsudne koło swětoweje klimoweje konferency w Pólskej je wčera tójšto knježerstwowych šefow a ministrow přichwatało, mjez nimi tež němska ministerka za wobswět Svenja Schulze (SPD). Wuradźowanja něhdźe 200 statow w Katowicach k zwoprawdźenju Pariskeho klimoweho zrěčenja maja po móžnosći hač do pjatka wotzamknjene być. Zaměr je nadrobna lisćina směrnicow, zo bychu plany za škit klimy jednotliwych statow přirunajomne a přepruwujomne byli. Nimo toho dźe wo dalše pjenježne přilubjenja wuwićowym krajam, kotrež tak a tak hižo pod wuskutkami woćoplenja zemje ćerpja.
Wito Meškank z Berlina wupraja so w zwisku z aktualnymi podawkami nastupajo politiku mjez wulkomocomaj USA a Ruskej ke komentarej: „Sami sej do kolena třělili“, kotryž wozjewichu Serbske Nowiny minjeny pjatk, 7. decembra:
Čitać komentary w Serbskich Nowinach na temy politiki Zwjazka a mjezynarodnosće klinča mi přehusto, jako by so přenjesła propaganda a agitacija „wulkeho bratra“ z doby, jako dźensniši car z pistolu po Drježdźanach chodźeše a „njewotwisny wječornik za serbski lud“ Nowa doba rěkaše. Bohudźak pak sym žiwy we 28. lěće přisłušnosće našeho kraja k Europskej uniji a k wobaranskemu zhromadźenstwu sewjerneho Atlantika.
Runje 30. nowembra zemrěty George Bush senior je w druhim lěće němskeje jednoty wozjewił, wotstronić nakrajne jadrowe rakety krótkeje zdalenosće, cofnyć taktiske jadrowe brónje z łódźow a pomjeńšić składy jadrowych bróni w Europje. Hižo měsacy do toho bu zrěčenje dospołnje zwoprawdźene.
Wotrow (SN/MWj). Z wosebitym lětakom chce Wotrowska wjesna rada přichodnje na móžnosć skedźbnjeć, zo hodźa so na tamnišej starej šuli priwatne kaž tež dalše swjedźenje a zarjadowanja najwšelakorišeho razu přewjesć. Kaž wjesny předstejićer Měrko Pohonč rjekny, Wotrowčenjo rumnosć, w kotrejž je městno za hač do 60 ludźi, jara rady wužiwaja, předewšěm za swójbne swjedźenje abo za kofej po chowanjach. Poskitk pak móhł snano tež wobydlerjam z druhich wsow abo gmejnow zajimawy być. Wuměnjenja su na Wotrowskej šuli jara přijomne. Tak su tam hakle loni nuzniki ponowili a k nim nowe durje zatwarili. Tež předrumnosć so nětko w nowej swětłej barbje prezentuje. Tam hodźi so na přikład derje bifej natwarić, hdyž je wulka rumnosć raz woprawdźe ze 60 wosobami połnje wobsadźena.
Swinjarnja (SN/MWj). Po wšěm zdaću hišće lětsa móhła postawa swj. Bosćana na kromje Swinjarnje wottam puć do restawrowanskeje dźěłarnje w Drježdźanach nastupić. To rjekny wjesnjanosta Markus Kreuz (CDU) na zašłym posedźenju gmejnskeje rady Pančicy-Kukow. Radźićeljo přepodachu nadawkaj za ponowjenje historiskeje postawy, kotraž pochadźa z lěta 1635. Tak ma předewzaće ze Zemic-Tumic postament za 7 000 eurow saněrować. Restawratorka z Drježdźan dósta nadawk, za 4 400 eurow postawu swjateho ponowić. Z woběmaj firmownikomaj chce so wjesnjanosta pjatk, 14. decembra, zetkać a sej z nimaj přichodne kroki na městnje dorěčeć. Jasne pak hižo nětko je, zo ma so postament pozběhnyć a na městnje ponowić. Postawu samu dowjezu porno tomu do Drježdźanskeje dźěłarnje a ju potom tam restawruja. Poprawom chcyše gmejna wobaj nadawkaj w jeničkim losu wupisać. Z tym pak delni pomnikoškitny zarjad wokrjesa přezjedny njebě.
Nowoslicy (JK/SN). Skerje přerosćene komunalne lěto je gmejnska rada Ralbicy-Róžant na swojim zašłym posedźenju w Nowoslicach bilancowała. Na dobro wjesnjanow su drje něštožkuli docpěli, napjata hospodarska situacija w gmejnje kaž po cyłym zarjadniskim zwjazku Při Klóšterskej wodźe pak překmany přichod njewěšći. Ale znajmjeńša móža w Delanach z wobkrućenym etatom 2019 do noweho lěta hić.
Jako wuspěchi minjeneho lěta hódnoćeše wjesnanosta Hubertus Ryćer (CDU) tójšto ponowjenych a zwuporjedźanych dróhow w jednotliwych wsach kaž tež dobry zazběh planowanja nowotwara Ralbičanskeje pěstowarnje. Po dobrym puću su, přechodne rozrisanje pobrachowacych městnow w Smjerdźečanskim žłobiku hišće w decembru rozrisać. Nachwilne dlijenje bě zawinowane rozsuda wokrjesa wohnjoškitnych naprawow dla. To je nětko po słowach wjesnjanosty rozrisane a přidatne městna budu hišće w decembru wužiwać móc.