Bjez wědźenja staršeju je so dwanaćelětny Würzburgčan z ćahom na puć k přećelej do Nürnberga nastajił. Sto kilometrow do cila pak jeho policisća zadźeržachu. Železnicarce bě samlutki jěducy pachoł w spěšniku ICE napadnył, kiž měješe nimo toho jeničce šulersku jězdźenku poruhrskeje kónčiny při sebi. Staršej wo tym ničo njewědźeštaj. Šula njeje jeju informowała, zo njebě hólc scyła na wučbu přišoł.
Ze schowanej minikameru je 32lětny w Engelskirchenje pola Kölna spytał jězbne pruwowanje zmištrować. Njedaloko twarjenja, w kotrymž pruwowanje bě, móžeštaj kumpanaj přez mobilnoškričkowy zwisk wšitke prašenja sobu čitać a pruwowancej přez małe słuchatko we wuchu prawe wotmołwy přišeptnyć. Pospyt pak so nimokuli. Pruwowar to pytny a zawoła policiju, kotraž wšitkich třoch zaja a techniku sćaza.
Drježdźany (SN). Społnomócnjeny SPD za wuchod a předsyda SPD w Sakskej Martin Dulig žada sej w diskusiji wo zakładnej renće w Němskej skónčnje rozrisanje a kónc blokady ze stron CDU/CSU. „Wuchodna Němska trjeba skónčnje přełam pola zakładneje renty. Mam dlijenja a lawěrowanja nawodow unije syte“, měni Dulig w nowinskej zdźělence. „Njetrjebamy stajnje nowe namjety, kaž nětko hakle wot Mika Mohringa z Durinskeje, ale skónčnje rozsudy. Koncept SPD leži na blidźe. Wočakuju, zo stronska předsydka CDU Annegret Kramp-Karrenbauer a zwjazkowa kanclerka Angela Merkel stronu wusměritej a zo docpějemy skónčnje wuslědk. Wšo druhe njemóžeš ludźom – wosebje na wuchodźe – hižo dlěje posrědkować. Trjebamy připóznaće žiwjenskeho wukona ludźi přez zakładnu rentu – a to nětko.“
Bratislava (SŽ/K/SN). W Słowakskej budu sobotu, 29. februara 2020, Narodnu radu wolić. Termin je předsyda parlamenta Andrej Danko wozjewił. To budu wosme parlamentne wólby w stawiznach samostatneje Słowakskeje. Politiske strony a hibanja Danko namołwja, wo přichilnosć wolerjow wěcownje z programami wojować. Jich nawodow wón zdobom napomina, wólbny bój fairnje wjesć. Wobydlerjow předsyda parlamenta pozbudźa, zajimować so za přichod Słowakskeje a zamołwiće wolić. „Waš hłós móže wo tym rozsudźić, kajku poziciju budźe Słowakska w přichodnych štyrjoch lětach zastawać“, Danko zwurazni.
Strony, hibanja a wotmyslene koalicije maja po zakonju kandidatne lisćiny najpozdźišo 90 dnjow do wólbow statnej komisiji zapodać. Zapłaćić maja wólbnu kawciju 17 000 eurow. Za wólbny bój smědźa kandidaća maksimalnje tři miliony eurow nałožić. Prawo wolić maja w Słowakskej wobydlerjo wot 18tych narodnin. Na wólbach smědźa so tež we wukraju bydlacy słowakscy staćenjo wobdźělić. Wo to pak dyrbja so požadać. Wolić móža z listom abo elektronisce.
Julian Nyča z Budyšina wupraja so nastupajo „240“ wotbagrowanych wsow:
Njedawno čitach w kónctydźenskej přiłoze Serbskich Nowin, zo je brunica w zašłych 110 lětach hižo nimale 240 (!) serbskich wsow wuraděrowała. Dźensa najskerje nichtó na tym njedwěluje, zo njeje brunicowa industrija Łužičanam (a připućowarjam) jeničce dźěło skićiła, ale zdobom łužiskej krajinje a wosebje serbskemu ludej wulke, zdźěla njenarujomne škody načiniła. Na to dyrbimy – byrnjež so doba nětko nadźijomnje nachilała – přeco zaso skedźbnjeć, ale prošu z korektnymi ličbami.
Budyšin (SN/JaW). Po jednym lěće zhromadneho dźěła wokrjesa Budyšin a jeho zarjadami za přirodoškit su zamołwići skónčnje koordinowanske městno do pućow zwjedli. „Wuslědk napinanjow je přirodoškitna centrala“, zdźěli přistajena wotrjada za medijowe dźěło w Budyskim krajnoradnym zarjedźe Frances Lein.
Centrala za přirodoškit ma skutkowanje wšitkich přirodoškitnych stacijow wokrjesa podpěrać a hłownohamtskich kaž tež čestnohamtskich akterow we wobłuku přirodoškita we wokrjesu do syće zwjazać. „Budyski wokrjes dźě ma mnohotnu a předewšěm škitanjahódnu přirodu“, pisa krajnoradny zarjad. „Zaměr přirodoškita je přirodu a krajinu na zakładźe swojeje swójskeje hódnoty a žiwjenskeho zakłada za čłowjeka dla zachować. Přirodoškit je tuž zjawny nadawk“, Lein wuswětla. Dźiwaja-li přirodoškitne zarjady na dodźerženje zakonskich předpisow a zasadow a zwoprawdźeja-li trěbne naprawy z pomocu wukazow, zmištruja wone praktiske nadawki přirodoškita předewšěm na regionalnej a lokalnej runinje na městnje.
Kulow (AK/SN). Swójski wopłóčkowy zawod města Kulowa dale cyle zaměrnje swój dołh wotpłaća. To podšmórny komornik Thomas Woelke na minjenym wuradźowanju měšćanskeje rady. Ta je minjenu srjedu klětuši hospodarski plan komuny jednohłósnje wobzamknyła. „Spočatk lěta 2020 wučinja cyłkowny dołh 1 651 000 eurow. Kónc 2023 budźe to jenož hišće 723 000 eurow. W přichodnych lětach wobstejacy dołh tak wo něhdźe 900 000 eurow pomjeńšimy“, Thomas Woelke měšćanskim radźićelam wuswětli. „Jeničce klětu wotpłaćimy 354 000 eurow.“
Hospodarske połoženje swójskeho zawoda je po słowach Thomasa Woelki stabilne. Za klětu planuje město narunanske inwesticije 29 000 eurow. Tak nałoža pjenjezy předewšěm za ponowjenje klumpow, ličakow a zawěranskich nastrojow. „Nowe inwesticije trěbne njejsu a njejsu tež žane planowane.“ Wuspěchowy plan wujewja 1 178 000 eurow dochodow a 1 112 000 eurow wudawkow, štož wučinja 66 000 eurow plusa. „Kredity hižo žane njebjerjemy“, Kulowski komornik wuswětli.