Z wudaća: póndźela, 04 meje 2020

Dalša wosoba zemrěła

Budyšin/Zhorjelc. W Radebergskej hladarni je dalši pacient koronawirusa dla zemrěł. Dohromady ma Budyski wokrjes dotal 13 smjertnych padow. Ličba natyknjenych bě 1. meje 358 (+3). W Zhorjelskim wokrjesu bě jich wčera 266. Minjenej dwaj dnjej njejsu žanych nowoinficěrowanych zwěsćili, dohromady pak maja dotal 20 zemrětych.

Dochody dale pobrachuja

Berlin. Drobnowikowarjo w Němskej wočakuja, zo hač do 50 000 předewzaćow koronakrizu njepřetraje. Hłowny jednaćel wikowanskeho zwjazka Němskeje Stefan Genth nowinarjam zdźěli, zo maja wobchody, kotrež žiwidła njepředawaja, cyłkownje 30 miliardow eurow stratow. Wot toho časa, zo su wobchody zaso wotewrjene, přichadźa přiwšěm mało kupcow, a tak dochody dale pobrachuja.

Awtokino pod Ještědom

Muzejej Budyskeho wokrjesa hotujetej so na wotewrjenje

Budyšin/Kamjenc/Hórnikecy (SN/CoR). Wot dźensnišeho smědźa muzeje, biblioteki a wustajeńcy w Sakskej zaso wočinić, koronakrizy dla wšak pod wěstymi wuměnjenjemi. Tež w Budyskim Serbskim muzeju hotuja so na to, wopytowarjam znowa durje wočinić. „Oficialnje je sakske knježerstwo wotewrjenje muzejow dowoliło. Skónčnje sym tež zelenu swěcu nošerja, potajkim zawjazowace připrajenje Budyskeho wokrjesa dóstała, zo móžu woprawdźe wočinić. Wotewrjemy Serbski muzej jutře pod wobkedźbowanjom wšěch žadanych hygieniskich naprawow“, rozłoži direktorka Serbskeho muzeja Christina Boguszowa na naprašowanje našeho wječornika.

We wobłuku digitalneho koncepta so Załožba za serbski lud nětko z naprašnikom na ludźi wobroći. Z jeje społnomócnjenym za digitalizaciju Měrkom Šenkom je so Cordula Ratajczakowa rozmołwjała.

Što je pozadk naprašowanja „Serbsce pisać z ličakom, iPhonom a smartphonom – što za to wužiwaš“?

M. Šenk: Naprašowanje nasta w ramiku zdźěłanja digitalneho koncepta. Sym sej wobhladał, kotre móžnosće mamy z elektroniskimi nastrojemi serbsce pisać – na Windows-ličakach a dalšich přistupnych systemach, na iPhonach a Android-smartphonach. Tajke nastroje kóždy Serb wšědnje wužiwa. Zwěsćich, zo mamy poprawom za wšitke potrjeby móžnosć, tež serbsce pisać. Znaje pak je kóždy Serb? A wužiwa wón je? Hladajo na swojich přećelow a znatych wěm, zo tomu tak njeje. A zo bych swoje začuće spěšnje zwěsćił, zdźěłach krótki naprašnik.

Naprašnik je dwurěčnje serbsce a němsce spisany. Čehodla?

Akustiska kulisa wokoło industrijnišća w Čornej Pumpje je wotnětka přihódniša. Přičina toho su modernizowane připrawy za wotpróšenje. Wědomostnicy ze Złeho Komorowa běchu wjacore lěta žórła hary přepytowali. Zhromadnje z mějićelom industrijnišća, ­koncerna LEAG, su prěnje napřećiwne naprawy ­zwoprawdźili.

Budyšin (SN/at). Němski dźěłarniski zwjazk wuchodneje Sakskeje njeje lětsa ze zarjadowanjemi na swoje žadanja k dnjej dźěła skedźbnił. Wšako bě to koronapandemije dla zakazane. Přiwšěm su so pod hesłom „Solidarisce njejsy sam“ předwidźani rěčnicy za Budyšin Jan Otto, 1. społnomócnjeny IG metal wuchodneje Sakskeje, za Zhorjelc Anne Neuendorf, zastupowaca předsydka DGB Sakskeje, a za Běłu Wodu Hagen Husgen, předsyda Dźěłarnistwa policije w Sakskej, z widejom na ludnosć wobroćili.

Nastupajo zawrjene mjezy jako sćěh rozšěrjaceho so koronawirusa dla bě Jan Otto překwapjeny, „zo smy tule europsku ideju tak chětře kasěrowali“. Składnostnje 1. meje apelowaše wón na politikarjow w Němskej a Europje: „Dyrbimy mjezy hnydom zaso wotewrěć. Njeje rozumne je zawrjene wostajić, dokelž mamy zawody z podźělom 40 do 50 procentow pólskich a čěskich sobudźěłaćerjow.“

Praha (dpa/SN). Čěske knježerstwo chce mjezu w juliju zaso wotewrěć. Wotpowědne rozmołwy z Awstriskej a Słowakskej su hižo daloko postupowali, z Pólskej pak su dale komplikowane, rjekny wonkowny minister Tomáš Petříček nowinarjam. „Bych mjezu k Němskej, Awstriskej, Pólskej a Słowakskej rady w juliju wotewrěł.“ Dyrbjało-li so połoženje w boju přećiwo koronapandemiji derje wuwić, móhł kraj mjezu tež hišće prjedy wotewrěć, Petříček připowědźi.

Scholz naprawy zakituje

Berlin (dpa/SN). W diskusiji wo raznym wobmjezowanju zjawneho a hospodarskeho žiwjenja koronapandemije dla skedźbnja wicekancler Olaf Scholz (SPD) na to, zo su druhe europske kraje wjele razniše postajenje wukazali. Němska njeje swoju industriju zawrěła, ludźo smědźachu minjene tydźenje stajnje dom wopušćić, rjekny wón wčera w telewiziji ARD. Najebać to zwjazkowe knježerstwo zhromadnje z přisłušnymi krajnymi knježerstwami „njepřestajnje rozmysluje“, kotre wolóženja móže zamołwić.

FDP: Zmylki analyzować

Po błótowskich groblach su zaso čołmikowarjo po puću. Wot minjeneho štwórtka móža sej ludźo čołmiki wupožčić, po tym ­zo su tam zamołwići dotal płaćiwy zakaz koronapandemije dla zběhnyli. Tak maja wupožčowarjo, kaž tule w Bórkowach, kaž tež hosćo zaso perspektiwu w dotal chětro wobmjezowanym sporće na wodźe. Foto: Michael Helbig

Kaču swójbu wuchowali su policisća zhromadnje z dalšimi pomocnikami w delnjosakskim Einbecku. Pilatka hrožachu do gullyja padnyć, na čož ludźo policiju informowachu. Pomocnicy tyknychu je do kartona a donjesechu pilatka k bliskej rěčce. Kačka slědowaše z wěstotnym wotstawkom. Zastojnik akciju nimo toho z policajskim awtom zawěsći. Dospołna kača swójba so skónčnje na rěčce zminy.

Pozdatny mortwy je w Lipsku zasadźenje policije zawinował. 75lětna wobydlerka wjaceswójbneho domu bě ju zazwoniła, po tym zo bě nježiwu wosobu na zadnim dworje ležo widźała. Zastojnicy hnydom přijědźechu, wuhladachu pak tam chětro čiłu młodu žonu. Wona zastojnikam rozłoži, zo bě yoga zwučowała, po tym pak hišće trochu na trawniku wotpočnyła. W tym wokomiku drje bě ju 75lětna wuhladała a so stróžiła.

Drježdźany (SN/BŠe). Koronapandemije dla je dotal mjenje zajimcow wukubłanske zrěčenje w rjemjesle podpisało. Kaž sakska rjemjeslniska komora minjeny pjatk zdźěli, je we wokrjesach Mišno, Budyšin, Zhorjelc, Sakska Šwica-wuchodne Rudne horiny kaž tež w měsće Drježdźanach cyłkownje 435 žonow a muži zrěčenje wotzamknyło – 77 mjenje hač loni w samsnym času, štož wučinja 15 procentow. „To je prěnje znamjo wuskutkow koronakrizy w rjemjesle“, je sej hłowny jednaćel Drježdźanskeje rjemjeslniskeje komory Andreas Brzezinski wěsty. „Mjenje dochodow a nadawkow dla su předewzaća tuchwilu jara skedźbliwe.“ Powołanske šule su hižo dlěje zawrjene, a zarjadowanja k powołanskej orientaciji njehodźachu so po zwučenym wašnju přewjesć. Přidatnej faktoraj so negatiwnje wuskutkujetej. „W zajimje zawodow a šulskich wotchadnikow je tuž wažne zaso aktiwniši być. Dźensniši wučomnicy dźě su přichodni fachowcy“, Brzezinski wuzběhnje.

Berlin (dpa/SN). Hladajo na koronakrizu něhdyši zwjazkowy kancler Gerhard Schröder namołwja, poměr k Ruskej zaso polěpšić. „Runje nětko, hdyž koronakrizy dla ćežke hospodarske časy na nas přińdu, dyrbimy wušo hromadźe dźěłać. Tohodla dyrbja bjezzmyslne sankcije preč“, rjekny politikar SPD wčera we wusyłanju Tagesspiegel.

Narěčany na přiswojenje połkupy Krim přez Rusku Schröder rjekny: „Štóž wěri, zo móžeš Rusku ze sankcijemi k něčemu nuzować, tón so myli. Žadyn ruski prezident Krim Ukrainje njewróći.“

Hladajo na róčnicu wuswobodźenja Gerhard Schröder rjekny, zo „njesměmy w padźe Ruskeje na stawizny zabyć. Bě to surowa zaničowanska wójna ze zaměrom, Rusku ze swětoweje politiki wušmórnyć. Tomu dyrbjała němska politika Ruskej napřećo bóle wotpowědować.“ Zo bě Ruska najebać surowu zašłosć zwólniwa, z Němskej dowěrliwje dźěłać, njemóžeš wysoko dosć hódnoćić, něhdyši kancler wuzběhny. „Tomu so sankcije njehodźa.“