Z wudaća: póndźela, 04 meje 2020

Sakski wobswětowy minister chce krok po kroku wróćo do normality

Drježdźany (dpa/SN). W Sakskej płaća za frizerow, muzeje, předawarnje meblow wot dźensnišeho nowe prawidła nastupajo koronawirus. „Podamy so z nowymi škitnymi naprawami koronawirusa dla krok po kroku dale do normality, do normality z koronu“, rjekny sakski wobswětowy minister a zastupowacy ministerski prezident Wolfram Günther (Zeleni). Wolóženja, na kotrež bě so sakske krajne knježerstwo minjeny štwórtk dorozumiło, płaća hač do 20. meje. „Po tym dyrbimy systematiske rjadowanja za tych namakać, kotřiž tuchwilu žane dochody nimaja, kreatiwnje dźěłacy, wuměłcy, ale tež hotelownicy a hosćencarjo“, Günther podšmórny.

Industrijna a wikowanska komora w Kamjenicy nima wobzamknjene rjadowanja za dosahace. Wona je přesłapjena, zo njejsu zajimy hotelownikow a hosćencarjow wobkedźbowane. Přenocowanja w hotelach a pensijach bychu při do­dźerženju hygieniskich prawidłow bjeze wšeho móžne byli, komora zdźěla.

Njedamy sej swoje nałožki a dobru naladu wirusa dla skazyć. Pod tymle hesłom móhł minjeny kónc tydźenja stać. Bě znowa zajimawe wobkedźbować kreatiwnosć ludźi, hdyž dźe wo to, swoje tradicije tež w ćežkim času pěstować. Hižo jutry smy dožiwili, kelko dobrych idejow běchu wjesnjenjo a měšćenjo wuwili a zwoprawdźili. A jako běch nětko minjene dny z mandźelskej w serbskich a dwurěčnych wsach po puću, běch tež tróšku hordy ­a zwjeseleny, na kelko městnach njeběchu so ludźo zatrašić dali a su po swojich móžnosćach a předewšěm w ramiku předpisow na swoje wašnje chodojty palili a mejske štomy stajeli. Zdobom pak so mi wuwědomi, zo njeby trjeba było, kaž w gmejnach zarjadniskeho zwjazka Při Klóšterskej wodźe, mejestajenje zakazać. Ludźo dźě wědźa ze situaciju wobchadźeć a su kedźbliwi. Meju stajeć bě bjezdwěla móžno, kaž su to mjez druhim w Radworju dopokazali. Janek Wowčer

Teltow (dpa/SN). Krajny zwjazk ratarjow Braniborskeje žada sej kruty płót podłu mjezy k Pólskej jako škit přećiwo bližacej so afriskej swinjacej mrětwje. Tak móhli tomu zadźěwać, zo so přewšo strašna mrětwa do Němskeje dóstanje. Tuchwilu spytaja so z mobilnym elektriskim płotom škitać. Wudyrjenje mrětwy w Němskej by hoberske hospodarske straty za plahowarjow swini zawiniło.

Jako so spočatk lěta z wjacorymi serbskimi přećelemi zetkach, njemóžach wědźeć, zo běše to na dołhi čas poslednja móžnosć, jim mjezwoči pohladnyć a z nimi wosobinsce bjesadować. Někotři mi powědachu, zo wjesela so na pućowanje wulki pjatk na Křižnu horu njedaloko Varnsdorfa abo tež na čitanje we wobłuku Praskich knižnych wikow. Nó haj – dońt koronawirusa je hinak rozsudźił. Nětko sym – tak kaž mnozy doma, a staram so wo to, zo njebych schorjeł. Žiwjenje pak dale běži, štož njerěka, zo mam so jeničce najěsć a wuspać.

Žiwjenje za čas wirusoweje pandemije rěka tež pola nas w Čěskej a tu we Varnsdorfje, zo trjebamy škit před hubu a nosom a mamy so ludźi zdalować. Dokładna ličba Varnsdorfčanow, kotřiž su so z koronawirusom natyknyli, njeje znata. Zawrjene běchu a su dale tež nimale wšitke předawarnje, zjawne institucije a zarjadnišća.

Wałpornu nóc ludźo na swójskich ležownosćach małe wohenčki palili

Kulow/delnje Sulšecy/Smjerdźaca/Dobrošicy (aha/SN). Nałožki w běhu lěta su nam kaž časowe mězniki a nas na to dopominaja, kak spěšnje so čas minje. Po ptačim kwasu móžachu so póstniske nory hišće porjadnje wucychnować, ale po tym bě koronapandemije dla nadobo wšitko hinak. Bolostne bě, zo dyrbjachmy lětsa jutry bjez křižerskich procesionow dožiwić. Mjeztym je so apryl bjez chodojtypalenja minył. Wosebje dźěći a młodostni dźě so kóžde lěto na nje kaž tež na mejestajenje wjesela. A hdyž meja padnje, je to stajnje zwjazane z rjanym zhromadnym swjedźenjom. Tola tež to je lětsa hinak, zo by so natyknjenju ze strašnym wirusom zadźěwało.

Kaž nimale wšitke komunalne parlamenty je so tež Kamjenska měšćanska rada tele dny na hinašim městnje hač zwučene zetkała, mjenujcy nic w radnicy, ale w měšćanskim dźiwadle, hdźež je městna dosć, zo móhli trěbny wě­stotny wotstawk dodźeržeć.

Kamjenc (BG/SN). Wosrjedź koronoweho časa zwoprawdźa město Kamjenc njesnadnu inwesticiju. W tym dźělu měšćanskeje radnicy, kotraž k torhošću saha, chcedźa bórze nowe wokna zatwarić. Při tym njeprofituje město jenož wot spěchowanskich srědkow Swobodneho stata Sakskeje. Z nowymi woknami změja potom nadźijomnje tež mjenje wudawkow za energiju. Bjez dźiwa, zo su radźićeljo tomule předewzaću jednohłósnje přihłosowali.

Budyšin/Lětoń. Kóždolětne wulke zetkanje VWjow na Lětońskim lětanišću je lětsa wotprajene. Kaž zarjadowarjo na swojej internetnej stronje wozjewjeja „běchmy sej wšitcy za lěćo něšto druhe předstajili. Přiwšěm chcemy prewentiwne naprawy přećiwo rozpřestrěwanju wirusa sćěhować. Z ćežkej wutrobu wam tuž zdźělamy, zo lětuše zetkanje VWjow w Budyšinje njewotmějemy.“ 26. swjatkowne zetkanje VWjow je na kónc tydźenja wot 20. do 23. meju 2021 přestorčene. Hižo kupjene zastupne lisćiki wobchowaja swoju płaćiwosć za klětu.

Dźiwajo na tuchwilne wobmjezowane móžnosće hódne podawki a jubilejne swjedźenje je sej Marija Krawcowa w Smjerdźacej swoje 90. narodniny zawěsće hinak předstajiła. Přiwšěm bě wona na swojim wčerawšim čestnym dnju jara hnuta a wjesołeje mysle, wšako su jej po wulkej ličbje přiwuznych tež wosadny farar Šćěpan Delan a wjesnjanosta Ralbic-Róžant Hubertus Ryćer (CDU) kaž tež wjesnjenjo zbožo a Bože žohnowanje na dalšim žiwjenskim puću wupřeli.

Dom so dospołnje wotpalił

Budestecy. Z dotal njeznatych přičin je so minjeny pjatk nawječor w Budestecach bydlenski dom wotpalił. Kaž policija zdźěla, bě něhdźe w 17 hodź. woheń w kólni na priwatnej ležownosći wudyrił a na dom kaž tež carport na susodnej ležownosći přeskočił. Třo wobydlerjo móžachu dom sčasom wopušćić. Domske, kólnja, carport a tam wotstajeny bydlenski wóz pak stachu so z woporom płomjenjow a so dospołnje wotpalichu. Zasadźeni wohnjowi wobornicy trjebachu wjac hač tři hodźiny, zo bychu woheń zhašeli. Škoda wučinja po prěnich trochowanjach wjac hač 100 000 eurow. Specialisća policije přičinu wohenja nětko dokładnje přepytuja.

Wałporna nóc měrna była

Aktualnje su předewšěm jeho zamóžnosće jako krizowy manager prašane. W SPORTBUZZER-interviewje, kotryž je internetny sportowy časopis našemu wječornikej za wozjewjenje přewostajił, rěči prezident Sakskeho koparskeho zwjazka Hermann Winkler wo koronakrizy, wo eksistency profiklubow ­a amaterskich zjednoćenstwow kaž ­tež wo zjawnym lisće olympiskeho ­dobyćerja Jensa Lehmanna šefej IOC Thomasej Bachej.

Knježe Winklero, kak stejiće wy k restrikcijam w Sakskej korony dla?

H. Winkler: Wšitke rozsudy su prawe. Dramam kaž w Italskej a Španiskej dyrbimy na kóždy pad zadźěwać. Za nas tuž rěka so na wšitke prawidła dźeržeć a na sebje a tamnych kedźbować. Zo našich wjac hač 1 200 koparskich hrow tydźensce wupadnje, je za wšěch ćežko. Zo dyrbjachmy sportowu šulu w Abtnaun­dorfje začinić, nas tež trjechi. Ale to su w nětčišej krizy jenož pódlanskosće.

Ma Joachim Löw prawje z wuprajenjom, zo ma naš swět burnout a zo dyrbimy wšitcy wo tym přemyslować, hač chcemy dale tak spěšnje dale a wyše?