Z wudaća: póndźela, 16 nowembera 2020

Tysacy w karantenje

Budyšin. Ličba zwěsćenych natyknjenjow z koronawirusom je přez kónc tydźenja we wokrjesu Budyšin wo 449 na cyłkownje 4 012 rozrostła. Schorjenych bě wčera 2 006, šěsćdźesaćoch w klinice lěkuja. 4 784 ludźi je w karantenje. W Kamjenskej chorowni maltezow su pomocnicy Zwjazkoweje wobory dźěłać započeli. Mjeztym sej Budyski měšćanski zwjazk SPD žada šulske rjadownje dźělić, zo njebychu kubłanišća znowa zasadnje zawrěć trjebali.

Reportaža mytowana

Praha. W čěskej kategoriji tekst mytowachu we wobłuku lětušeho Němsko-Čěskeho žurnalistiskeho myta reportažu Vladimíra Ševele „Kohout? Spadl ze schodů ...“ (Kokot? Je po schodźe dele padnył ...), wozjewjenu w Hospodářskich novinach loni 30. awgusta. Awtor poda so tam do Delnjeje Łužicy a wobswětla kulturu ­a identitu Serbow kaž tež jich prócowanja, stare tradicije wobchować.

Minister so starosći

Něhdźe 80 000 hodownych hwězdow we wosom wšelakich barbach a mnohich wotsćinjenjach wita će we wulkej hali róžoweho kubła Langerwisch w Michendorfje. Zajim je hižo jara wulki. Sobudźěłaćerka Vivian Czaja ma ruce połnej dźěła, zo by prózdne blaki zaso pjelniła. Po rostlinarnjach móžeš so tež wuchodźować. Zawod južnje Berlina zhladuje na wjace hač stolětne stawizny. Foto: Joachim Rjela

We wšitkich wosadach Drježdźansko-Mišnjanskeho kaž tež Zhorjelskeho biskop­stwa wola nětko w nowembrje nowe wosadne zastupnistwa. Prěni króć wola lětsa wosadne předstejićerstwa, kotrež dotalne cyrkwinske rady narunaja.

Z wida ministerstwa je serbski komunalny program zaměr docpěł

Drježdźany/Budyšin (SN/at). We wobłuku prěnjeho serbskeho komunalneho programa přewostaji Swobodny stat Sakska komunam w serbskim sydlenskim rumje loni a lětsa po 5 000 eurach. „Podpěra je so wudaniła“, zwěsća dr. Jens Baumann, w sakskim ministerstwje nutřkowneho za program přisłušny zastojnik, w rozmołwje z našim wječornikom. „Tohodla sym srědki za nowy dwójny etat hižo přizjewił.“ Z jeho wida měli tule specifisku podpěru komunam nastupajo dwurěčnosć na kóždy pad dale wjesć.

Mnohe města a gmejny su pjenjezy wužiwali, zo bychu zjawne twarjenja ­a dróhi němsce a serbsce popisali. Dalšim zmóžnichu po tymle puću komunalnu internetnu prezentaciju dwurěčnosći přiměrić. Dr. Baumann mjenuje tu na přikład gmejny Bukecy, Radwor a Hamor, ale tež Budyski wokrjes.

Budyšin (SN/JaW). Wot pjatka předležitej nowej dźěłowej zešiwkaj „Zwučujemy a pisamy 1“ za šulerjow 1. lětnika. Wudał je jej Rěčny centrum WITAJ. Zešiwkaj stej na nowu fiblu wusměrjenej, kaž RCW zdźěli, a předležitej w ćišćanym a w šulskim wuchadnym pismje. Wobě publi­kaciji wobsahujetej čitanske a pisanske zwučowanja. Strony zešiwkow wotpo­wěduja slědej pismikow fible. Dźěłowej zešiw­kaj dóstanu zajimcy w Budyskej Smolerjec kniharni a w online-wobchodźe Ludoweho nakładnistwa Domowina pod www.domowina-verlag.de.

Šulerki a šulerjo Budyskeho Schilleroweho gymnazija wuwiwaja tuchwilu aplikaciju, z kotrejž hodźi so sprjewine město zabawnje a informatiwnje wotkryć. Gymnaziastam při tym poboku je mjez­ druhim Sakski wukubłanski a wupruwowanski kanal (SAEK).

Budyšin (SN/bn). „Měšćanska rallye na slědach Conrada Johannesa Käublera“ rěka­ w septembru zahajeny projekt, kotryž chcedźa gymnaziasća klětu spočatk januara zjawnosći prezentować. Planowana je app, wodźaca zajimcow ze šmóratkom po Budyšinje k wažnym žiwjenskim stacijam něhdyšeho měšćanosty. Z jaknymi tekstami, krótkimi widejemi, historiskimi wobrazami a zwukowymi přinoškami rozjimuja tam stawizny a zajimawostki wotpowědnych městnosćow. Tak budźe na přikład móžno, tworić sej z pomocu fotografijow zaćišć wo starym měšćan­skim dźiwadle z Rietschelowymi swislemi a wo prěnim Serbskim domje na Lawskich hrjebjach – twarjeni to, kotrejž dźensa wjace njeeksistujetej.

Po cyłej Němskej wopomnichu wčera na dnju ludoweho žarowanja we wójnje padłych kaž tež wopory namócneho knjejstwa. We Wojerecach kładźeše mjez druhim wyši měšćanosta Torsten Ruban-Zeh (SPD) kwětki a wěncy na wójnske rowy kaž tež při pomniku za njeznateho wojaka. Superintendent na wuměnku Friedhart Vogel podšmórny, zo „wójna jeničce bědu a smjerć wuskutkuje a žanoho dobyćerja nima. Tež dźensa hišće konflikty z brónjemi wuwojuja, hódnota žiwjenja je snadna. Hladajo na dwě swětowej wójnje, kotrejž stej z Němskeje wuchadźałoj, mamy so za to zasadźić, zo dalšemu horju na wšě strony a wašnja zadźěwamy.“ Foto: Gernot Menzel

London (dpa/SN). Britiski premierminister Boris Johnson je so koronawirusa dla do karanteny podał. Kaž britiske medije rozprawjeja, měješe Johnson kontakt k wosobje, kotruž su pozdźišo pozitiwnje na koronawirus testowali. „Premierminister ma so po prawidłach a so sam izoluje“, zdźěli rěčnik Johnsona. Karantena padnje do tydźenja z móžnymi rozsudnymi rozmołwami wo brexiće. W měrcu bě so 56lětny jako prěni knježerstwowy šef z wirusom natyknył. W aprylu ležeše samo na intensiwnej staciji.

Politiku Trumpa skorigować

Washington (dpa/SN). Woleny prezident USA Joe Biden chce wot prěnjeho dnja zastojnstwa wšelake politiske rozsudy swojeho předchadnika Donalda Trumpa skorigować. „Smy sej za prěni dźeń wjele předewzali“, rjekny Bidenowy šef staba Ronald Klain sćelakej NBC. Mjez druhim je planowane, zo USA zaso Pariskemu klimowemu zrěčenju přistupja, zo młodych migrantow škitaja a naprawy w strowotnistwje přesadźa.

Wjele demonstrantow zajeli

Čěska republika žada sej wot dźensnišeho wot wšitkich, kotřiž z Němskeje do kraja přińdu, negatiwny koronatest. To je ­wonkowny minister kraja Tomáš Petříček minjeny pjatk wukazał. Štóž tajki test nima, dyrbi so na namjeznym přechodźe, kaž tule w Zebnicy, testować dać. Dojězdźowarjo a transitni pućowacy njejsu wot toho potrjecheni. Foto: Steffen Unger

Kradnjenej čisłowej tafličce swojeho awta wuhladał je muž, jako so wčera po Wolfsburgu wuchodźowaše. Přiwołana policija cuze awto přesćěhowaše a skónčnje zadźerža. Kaž so wukopa, njeběštej jenož tafličce pokradnjenej, ale tež awto, w kotrymž třo mužojo sedźachu. Policija wšitkich zaja. Šofer njeměješe ani jězbnu dowolnosć a steješe nimo toho pod wliwom alkohola a drogow.

Wosrjedź puća sedźacy kołp je njedaloko porynsko-pfalcskeho Bad Kreuznacha wobchad na zwjazkowej dróze B 41 nachwilnje haćił. Wobsadka policajskeho awta spyta podarmo jeho z jězdnje zehnać a dyrbješe tuž pomoc kolegow přiwołać, kotřiž dróhu na to do wobeju směrow zawrěchu. Dokelž dobre přirěčowanje njepomhaše, kołpja skónčnje wotnjesechu. Ptak wšak so chětro wobaraše a do zastojnikow kusaše.