Z wudaća: póndźela, 22 nowembera 2021

póndźela, 22 nowembera 2021 13:00

Seminar budźe, diskusija nic

Budyšin (SN). Jutře wječor w Němsko-Serbskim ludowym dźiwadle planowana diskusija „Serbske samopostajowanje w Sakskej – kontrowersy a perspektiwy za přichod“ z dr. Měrćinom Krawcom, Dawidom Statnikom, prof. dr. Stefanom Oeterom a Lutzom Hillmannom so pandemijoweho połoženja dla njewotměje. Sakska krajna centrala za politiske ku­błanje ma tematiku za tak wažnu, zo nochce ju jenož digitalnje wobjednać. ­Zarjadowanje budźe tuž přichodnje nachwatane.

Hižo jutře w 14.30 hodź. planowany seminar z ekspertu za zjawne a prawo ludow prof. dr. Stefanom Oeterom pak so digitalnje wotměje. Zajimcy su přeprošeni so za widejowu konferencu pod hesłom „Cyrkwinsko-statne zrěčenja jako přikład za serbske samopostajowanje a samorjadowanje?“ přizjewić, a to pod adresu . Tam je tež móžno sej do toho diskusijowu papjeru wo statnym zrěčenju wobstarać. Nimo prašenja, kajke ma tajke zrěčenje wupadać, chcedźa na seminarje tež wo tym rěčeć, kajki móhł politiski puć zwoprawdźenja być.

wozjewjene w: Politika
póndźela, 22 nowembera 2021 13:00

Znowa digitalne dožiwjenje

Na lětušej schadźowance w „Krónje“ wulkotny program předstajili

Budyšin (SN/pdź). Po lońšej premjerje wotmě so tež sobotna 147. schadźowanka druhi raz w digitalnym formaće. Koronapandemije dla njeběchu wopytowarjo w Budyskej „Krónje“ dowoleni. Organizatorojo su tuž znowa livestream přez Youtube a móžnosće digitalneho schadźowanja na platformje schadźowanki zarjadowali. Z techniskich wušparanjow schadźowanki 2020 běchu zamołwići wokoło Załožby za serbski lud, Michała Cyža a režije, wobstejaceje z Katki Pöpelec a Symana Hejduški, wuknyli.

wozjewjene w: Kultura
póndźela, 22 nowembera 2021 13:00

Viktoria w swójskej hali podležała

Worklečanscy wolejbulisća wobě domjacej hrě přećiwo Coswigej a Koblicam 1:3 přěhrali

Za Worklecy hrajachu: Beno, Jakub a Ławrjenc Bobka, Clemens a Ludwig Eckert, Stefan Gedik, Maks Jurak, Marcel Rjelka, Józef Krawc, Jurij Lipič, Daniel Wałda a Šćěpan Wjeńka. Poradźowar mustwa: Mato Eckert

Wolejbulisća prěnjeho mustwa Viktorije Worklecy běchu z dźewjeć dypkami w štyrjoch hrach wulkotnje do sezony w sakskeje klasy startowali. Druhi domjacy hrajny dźeń skićeše jim šansu, druhe městno zakitować a skrućić. Někotři sonjachu samo hižo wo načolnistwje ligi. Přećiwnikaj dźě steještej dotal z jeničkim dypkom w zadnim polu tabulki. Woprawdźitosć pak bě na kóncu cyle hinaša.

Viktoria Worklecy 93 – ST Coswig- Mišno 1:3 (24:26, 17:25, 25:19, 23:25)

wozjewjene w: Sport
póndźela, 22 nowembera 2021 13:00

Kandidaća so předstaja

Berlin (dpa/SN). Dwaj měsacaj po ćežkej poražce při wólbach zwjazkoweho sejma pyta CDU wot dźensnišeho za nowym předsydu. Jako prěni chcyše so wječor Friedrich Merz čłonam strony internetnje prezentować. A woni maja tež składnosć so jeho prašeć. Dopołdnja běchu so wodźace gremije strony zetkali. Nimo bywšeho šefa frakcije CDU/CSU w zwjazkowym sejmje Merza prócujetaj so amtěrowacy šef kanclerskeho zarjada Helge Braun a wonkowny politikar Norbert Röttgen wo zastojnstwo.

Prezident wólby dobył

Sofija (dpa/SN). Bołharski statny šef Rumen Radew je rozsudne koło prezidentskich wólbow po najnowšich wěšćenjach jasnje dobył. Wón móže so něhdźe 65 procentow hłosow nadźijeć. Toho wužadar Anastas Gerdźikow njezměje drje wjace hač 33 procentow hłosow a je swoju wólbnu poražku mjeztym přiznał. Wólbne wobdźělenje bě z mjenje hač 40 procentami hišće snadniše hač w prěnim kole tydźenja.

Wjace pokiwow na namóc

wozjewjene w: Politika
póndźela, 22 nowembera 2021 13:00

Bjez změnow cyrkej zwrěšći

Köln (B/SN). Předsyda Němskeje biskopskeje konferency, Limburgski biskop Georg Bätzing, zastupuje jasne cyrkwino-politiske měnjenje nastupajo rólu žónskich w cyrkwi, celibat a wujasnjenje seksualneho znjewužiwanja. „Hdyž my ničo njezměnimy, potom nas změnja. Hižo lětdźesatki dalewuwiće tradicijow stagněruje, dźeń a wjac křesćanow cyrkej wopušća a měšniski dorost dale a bóle pobrachuje. Trjebamy radikalnu změnu perspektiwy“, rjekny biskop Bätzing katolskej powěsćerni kna.

Za wjetšu transparencu

wozjewjene w: Cyrkej a swět
Tež w Čěskej republice płaća wot dźensnišeho nowe naprawy přećiwo koronawirusej. Tak dyrbja so nješćěpjeni w zawodach ­tydźensce testować dać. Wšelake firmy, kaž awtotwarc Hyundai w morawskich Nošovicach (hlej foto) tajke testy dobrowólnje poskićeja. Do hosćencow smědźa wotnětka jenož hišće šćěpjeni a wustrowjeni. Foto: pa/ČTK/Jaroslav Ožana

wozjewjene w: Politika
póndźela, 22 nowembera 2021 13:00

Razne naprawy korony dlaw Sakskej

Drježdźany (dpa/SN). Sakske krajne knježerstwo je wot dźensnišeho razniše naprawy přećiwo koronawirusej wukazało, kotrež płaća hač do 12. decembra, Tak njeje wjace dowolene turistiske jězby přewjesć a turistow hospodować, tež nic w prózdninskich bydlenjach. Wuwzaća płaća jeničce za słužbne jězby. Wšitke zarjadowanja a swjedźenje su zakazane, štož runje tak za adwentne wiki płaći. Předań alkohola w zjawnosći je zakazana. Wiki tohorunja wjace móžne njejsu. Sportowe zarjadowanja su nimo šulskeho a dźěćaceho wobłuka zakazane. Hry w profijowym sporće dyrbja so bjez přihladowarjow wotměć, tak tež Dynama Drježdźany. Hosćency smědźa wopytowarjow hač do 20 hodź. posłužować, hdyž su šćěpjeni abo wustrowjeni. We wobchodach drobneho wikowanja dyrbja ludźi šćěpjeni abo wustrowjeni być. Wuwzate su wobchody wšědneje potrjeby. Frizerojo smědźa jenož hišće ludźi posłužować, kotřiž su šćěpjeni abo wustrowjeni. Kupjele, sawny a solarije su zawrjene. Płuwansku wučbu šulerjow smědźa dale přewjesć.

wozjewjene w: Politika
póndźela, 22 nowembera 2021 13:00

Nowa namóc w Nižozemskej

Amsterdam (dpa/SN). We wjacorych městach Nižozemskeje je tež minjenu nóc k njeměram a namócnym rozestajenjam dóšło. Skućićeljo zamiškrichu wohenje, zničichu busowe zastanišća a wužiwachu ćežke praskotaki, kaž nižozemska powěsćernja ANP rozprawja. Bě to mjeztym třeća nóc namócnosćow za sobu w Nižozemskej. Tak dóńdźe mjez druhim w měsće Enschede na wuchodźe kraja njedaloko němskeje mjezy a w Groningenje k namócnym rozestajenjam mjez demonstrantami a policiju. Dźesatki młodostnych běchu so w měsće zhromadźili, hdźež mjetachu kamjenje a praskotaki na zastojnikow. Woni wjacorych demonstrantow zajachu. Z městnami wužiwachu tež swoju bróń.

Jednotneje přičiny protestow njeje. W někotrych městach su drje protesty přećiwo wobmjezowanjam koronawirusa dla nastork namócnosćow. W socialnych syćach běchu wjacore skupiny k namócnosćam namołwjeli. Rozestajenja běchu so minjeny pjatk w Rotterdamje z raznymi wukročenjemi započeli.

wozjewjene w: Politika
póndźela, 22 nowembera 2021 13:00

„To by tež dźěći škitało“

Debatuja wo winowatostnym šćěpjenju přećiwo koronawirusej

Berlin (dpa/SN). Hladajo na dramatiske połoženje koronapandemije dla je diskusija wo powšitkownej winowatosći šćěpjenja přećiwo koronawirusej dale a aktualniša. Je načasu wo tym rozmyslować, žadaše sej strowotniski fachowc SPD Karl Lauterbach předwčerawšim, sobotu, w telewiziji. „Njebych to na žadyn pad wjace wuzamknył. Dyrbimy so tajkej winowatosći bližić.“ Lauterbach argumentuje, zo njeby bjez tajkeje winowatosće kwota šćěpjenja docpějomna była, kotraž by dosahacu imunizacije ludnosće za­ručiła.

wozjewjene w: Politika
póndźela, 22 nowembera 2021 13:00

Hańba za kraj

Wien (dpa/SN). Lockdown za cyłu Awstrisku woznamjenja po słowach hoteloweje branše wulku škodu za image. Dokelž njeje tam koronakriza pod kontrolu, je to hańba za kraj, měni Susanne Kraus-Winkler z fachoweho zarjada za hoteleriju awstriskeje hospodarskeje komory. Hosćo wšak jenož rjaneje krajiny dla njepřijědu, ale tež začuća wěstoty dla. „Wěstota je nowa turistiska měna“, wona wuzběhnje.

Lockdown sam je bjez alternatiwy. „Dyrbimy jón znjesć“, Kraus-Winkler praji. Klasiski dowol k hodam prawdźepo­dobnje njebudźe. Turistikarjo liča jenož hišće z hosćimi, kotřiž prawidłownje ­přichadźeja. Branša nadźija so nětko druheje połojcy sezony wotsrjedź januara. W bywšich lockdownach móžachu w hotelach jenož wobchodnicy abo ludźo wažnych přičin dla přenocować.

Hižo njedawne warnowanje Němskeje, do Awstriskeje jěć, je wulku žołmu wotprajenjow wuskutkowało. Zo wjele hotelow přichodnje na přeco swoje durje zawrje, z tym fachowča njeliči. Knježerstwo dźě chce jim wupad dochodow zdźěla zarunać. Přiwšěm je prašenje, hdy budźe skónčnje zaso pozitiwnych powěsćow za turizm.

wozjewjene w: Politika

słowo lěta 2020

nawěšk