Pod nadpismom „Lećmy z časom“ podawa nowy šefredaktor Serbskich Nowin Marcel Brauman w zawodnym komentarje swój wid na serbske nowinarstwo. Při tym skedźbnja na swoje korjenje a na trěbnu transformaciju, zo by wone načasnym narokam wotpowědowało. Nimo toho wuzběhuje, zo słuži njewotwisny wječornik „přichodej serbskeho luda“.

Na titulu nańdźemy foto Wochožanskeje jamy Jürgena Maćija. W Budyšinje bydlacy fotografikar swjeći w februarje 70. narodniny. Při tej składnosći zhladuje lawreat Hornjołužiskeho wuměłskeho myta we wobšěrnym interviewje na swoje lětdźesatki trajace skutkowanje na polu fotografije, rozprawja wo temach, kotrež jeho jako fotografa zajimuja, wo trajnych fotach, wo skutkowanju jako wudawaćel kaž tež wo aktualnych planach a projektach. Při tym konstatuje, zo je „sej serbski swět přez fotografiju wotkrył“.

W Brězanec bróžni 25. Jolku z pisanym programom a hosćimi dožiwili

Jolka spočatk noweho lěta je w Ruskej a dalšich wuchodnych krajach jedyn z najwoblubowanišich swjedźenjow. Byrnjež w Němskej skerje mało znaty był, proša zarjadowarjo „serbskeje jolki“ kóždolětnje na zabawny wječork do Brězanec bróžnje w Nuknicy. Po dwěmaj lětomaj, w kotrymajž móžachu zymski kulturny wjeršk jenož w digitalnym formaće přewjesć, tam lětsa skónčnje zaso hosći witachu. Organizatorojo z Nuknicy, Prawoćic a Kopšina, tak mjenowani „Nu-Pra-Ko“, wupyšichu bróžeń po starodawnym wašnju temje programa wotpowědujo. Lětsa bě hesło „Bermuda – hłódny mužonač a čorna dźěra“. Pódla wulkich plakatow z mórskimi scenarijemi pak sy lětsa tež najšikwańše rekwizity zašłych programow wuhladał. Jolka w Nuknicy wšak swjećeše minjenu sobotu swój 25. jubilej. „To ći sylzy přińdu“, hódnoćeše moderator wječorneho programa, braška Marko Jurk, w swojej zawodnej narěči. Wón so nadměru wjeseleše, zo smědźeše po dwulětnej přestawce zaso live před publikumom stać a na swoje njezaměnjomne wašnje po programje wjesć.