Za mjezu přesahowacu słužbu
Mjez Pólskej a Němskej pacientow wuchować hišće njezrjadowane
Gubin (dpa/SN). W němsko-pólskim pomjeznym rumje policija wobeju krajow wusko hromadźe dźěła. We wobłuku nuzoweje wuchowanskeje słužby pak hišće chětro klaca. Lětsa su w tym wobłuku skónčnje polěpšenja předwidźane.
Zo je mjeza mjez krajomaj w časach EU zadźěwk, wo tym rozprawja asistent wuchowanskeje słužby Ben Mangelsdorf. Hižo často je wón pacientow na pólsku mjezu dowjezł, hdźež čakaše z nimi na pólsku wuchowansku słužbu, kotraž měła pomocy potrěbneho wotewzać. To pak znajmjeńša dwaceći mjeńšin abo tež raz hodźinu traješe. Pólske městačko Gubin nima žane wuchowanske jězdźidło. Tohodla su puće jara dołhe. Na zbožo njemějachu hišće žane žiwjenjastrašne pady. Přiwšěm ma so bórze něšto změnić.
Ničo přećiwo dawkam
Berlin (dpa/SN). Wobydlerjo Němskeje su hinak hač ludźo w druhich krajach skerje zwólniwi, za zjawne naležnosće dawki a druhe přinoški płaćić. To je wuslědk najnowšeho přepytowanja Baselskeho Instituta za wobsydstwo a hospodarstwo, kotrež je UNO wozjewiła.
Němska docpěwa při tym na skali wot 1 (snadna akceptanca) do dźesać (wulka akceptanca) dosć dobry přerězk 7,0. W Awstriskej (6,4) a w Kambodźi (6,7) je akceptanca tohorunja poměrnje wulka. Cyle hinak wupada porno tomu w balkanskich krajach Serbiskej (4,1), Montenegru (3,9) a Makedonskej (3,2) kaž tež w Brazilskej (3,4). Mjenowany institut bě so minjene tři lěta z pomocu uniwersitow a njeknježerstwowych organizacijow w 141 krajach wobhonił, hač su ludźo zwólniwi dawki a popłatki akceptować, zo hodźeli so strowotniske zastaranje, kubłanje, wobswětoškit, infrastruktura, socialna pomoc a kultura financować. Doskónčny wuslědk přepytowanja chcedźa w měrcu wozjewić. Tuchwilu maja spušćomne daty ze 14 krajow. Tam bě něhdźe 16 000 ludźo wotpowědny pisomny naprašnik wupjelniło, kaž institut zdźěla.
To a tamne (03.01.19)
Dalšeho kucharja přistajili su w kanclerskim zarjedźe zwjazkoweje kanclerki Angele Merkel (CDU) w Berlinje. Wón ma dotalne mustwo kucharja, pomocnika a wosom pinčnikow zesylnić. Wšako je wotwidźomne, zo ličba a wobjim zarjadowa- njow w kanclerskim zarjedźe, kotrež maja so kulinarisce zastarać, „dale wulka wostanje“, kaž rěčnica knježerstwa zdźěli.
Twochnjeneje kóčki dla je so porik w Hornjej Pfalcy silwestersku nóc tak zwadźił, zo dyrbješe policija přijěć. Muž a žona sej mjez sobu wumjetowaštaj, zo je tón tamny na tym wina, zo je kóčka preč. Tak 41lětny swoju 36lětnu žonu a ta jeho pola zastojnikow přizjewištaj. Na zbožo staj so skónčnje zaso wujednałoj. Wo dóńće kóčki wšak policajski rěčnik ničo rjec njemóžeše. „Prawdźepodobnje bě sej ta silwesterskich praskotakow dla jenož měrniši kućik pytała.“
Hody wšudźe hinak
Paris (B/SN) Euronews rozprawjeja, kak su křesćenjo po cyłym swěće hody 2018 swjećili. W Sydneyju swjećachu Awstralčenjo z mnoho hosćimi při Sydney Bondi Beach. Policija měješe wjele dźěła z alkoholizowanymi domoródnymi runje tak kaž z cuzymi. W najwjetšim měsće Pakistana, w Karatschi, je mała křesćanska wosada w Božej nocy pod krutym wěstotnym dohladom skromnje kemše swjećiła. W Peru swjeća hody w kóždej kónčinje z druhimi nałožkami. Wječor zakónča z wulkim wohnjostrojom po hodownej Božej mši. W Južnej Koreji bydli wjele křesćanow. Tu hody njeswjeća w swójbje, ale wšitcy zetkaja so w cyrkwi. Na spočatku předstaja hodownu hru a přizamknje so Boža mša. Po tym wostanu wšitcy w cyrkwi a zhromadnje jědźa. Wjele młodostnych hnydom w cyrkwi přenocuje. Wječor ćahaja ludźo wjesele po hasach a spěwaja hodowne spěwy.
Chwali „Puće Knjeza“
Kandidaća jasni
Róžant (SN/JaW). Runja Worklečanskemu je mjeztym tež gmejnski zwjazk CDU Ralbicy-Róžant swojich kandidatow za lětuše komunalne wólby nominował. Dwanaće kandidatow su Halena Jancyna, Janina Wjeselina, Christina Domašcyna, Tilo Žur, Eduard Luhmann, Silvio Čórlich, Pětr Kokla, Bosćij Kokla, Achim Mejgl, Roberto Krawc, Dierk Šewc a Alojs Wowčer. To zdźěli čłonka předsydstwa delanskeho gmejnskeho zwjazka Halena Jancyna na naprašowanje. „Předewšěm so wjeselu, zo mamy tři žony mjez kandidatami“, wona doda. Na wjacorych nowych mjenach je zdobom generaciska změna spóznajomna. Gmejnski zwjazk CDU ma w aktualnej gmejnskej radźe z wjesnjanostu Hubertusom Ryćerjom cyłkownje pjeć sydłow. Tamne wosom maja zapósłancy Swobodneho wolerskeho zjednoćenstwa Delany. Swoju dźěławosć chcedźa delanscy CDUnicy mjez druhim sylnišo na dobro wobydlerjow gmejny a na skrućenje dobrowólneje wohnjoweje wobory wusměrjeć. Zwjeseleny je zwjazk tež nad tójšto nowymi kandidatami za wólby Nowosličanskeje wjesneje rady.
Stawk pjenježnych posłužbow
Berlin (dpa/SN). Mnoho wobchodow a pjenježnych awtomatow w Němskej njedósta dźensa stawka pjenježnych posłužbow dla žane čerstwe bankowki. Hižo wot ranja šoferojo a přihotowarjo pjenježnych transportow kaž tež ličerjo pjenjez njedźěłaja. Pozadk toho je, zo žadaja sej zwyšenje mzdy wo 1,50 eurow na hodźinu. Nimo toho měli přistajeni bankow na zapadźe a wuchodźe jenak zasłužić. Tarifowe jednanja jutře a zajutřišim w Bad Nauheimje dale póńdu.
Chłostanski wukaz za šofera
Bottrop (dpa/SN). Po tym zo bě 50lětny muž z awtom wjacore razy wotpohladnje do skupin ludźi zajěł, je sudnistwo dźensa chłostanski wukaz wjacorych pospytow mordarstwa dla přikazało. To zdźělištej policija a statne rěčnistwo w Bottropje. Mjeztym wuchadźeja přepytowarjo z toho, zo bě nadpad wot němskeho staćana zaměrny a wotpohladany. Wjacore razy bě muž w Bottropje a Essenje do skupin ludźi jěł, zo by wukrajnikow morił, kaž sam přizna.
Trump na rozmołwu přeprosył
Něhdźe 200 do 300 ludźi je silwester popołdnju po namołwje ...
AfD hotuje so na lětuše wólbne boje
Drježdźany/Erfurt/Podstupim (dpa/SN). Strona AfD chce lětsa na wuchodźe Němskeje stawizny pisać. W třoch zwjazkowych krajach ma šansu, dotalne najsylniše strony w knježerstwje přesćahnyć. W aktualnym naprašowanju w Braniborskej leži AfD z 23 procentami zhromadnje z SPD prědku. W Durinskej leži jedyn procentny dypk zhromadnje z Lěwicu za tuchwilu najsylnišej CDU. W Sakskej ma populistiska strona na CDU štyri procentne dypki nachwatać.
Prezidentstwo přewzali a kritiku žnjeli
Bukarest (dpa/SN). Najebać wulku kritiku z Brüssela nutřkowneje politiki w kraju dla je Rumunska nowe lěto prezidenstwo Europskeje rady přewzała. Kaž tamniše knježerstwo zwurazni, chce balkanski kraj funkciju jako neutralny posrědkowar wukonjeć. Prezident komisije EU Jean-Claude Juncker pak na tym dwěluje, wšako njeje so rumunskemu knježerstwu poradźiło nastupajo rozkoru nutřkowneje politiki korupcije dla dojednanje nańć. Komisija Europskeje unije postupowanje w kraju hižo dlěje wobkedźbuje. Tak wobsteji strach, zo so tamniša rozkora tež na prezidenstwo rady wuskutkuje.
Na Rumunsku čaka na europskej runinje nětko tójšto nadawkow. Najwjetši budźe zawěsće wustup Wulkeje Britaniskeje z EU, kotryž je za 29. měrc předwidźany.
