13lětneho za wodźidłom wosoboweho awta je policija w Mecklenburgsko-Předpomorskej krótko před krajnej mjezu Schleswigsko-Holsteinskeje z awtodróhi wjedła. Pódla hólca sedźeše jeho nan, jězbny wučer z Madźarskeje. 53lětny zastojnikam rozłoži, zo chcyše synej na awtodróze jězdźenje nawučić. Hólc bě ně­hdźe 50 kilometrow po A 24 jěł. 13lětny dóstanje skóržbu. Tež nan dyrbi z chłostanjom ličić, dokelž je hólca jěć dał.

Wopity muž je sej w taksiju pola Kaisers­lauterna njedźelu rano tak kruće wusnył, zo dyrbješe zadwělowany šofer taksija policiju wołać. Chětro sprócny 22lětny bě so wot Kaiserslauterna do Enkenbacha-Alsenborna wozyć dał. Tam pak njeje šofer muža hižo wubudźić móhł. Hakle přiwołanym zastojnikam so to poradźi. 22lětny jězbu zapłaći. Poli­cisća jeho wěsće doma wotedachu.

Rom (B/SN). Bamž Franciskus je biskopow, měšnikow a rjadnikow w Libanonje namołwjał, potrjechenym wobydlerjam wosebje bliscy być. Katastrofa eksplozije w Beiruće žada sej wot wšitkich „za de­rjeměće tutoho woblubowaneho kraja hromadu dźeržeć a dźěłać“, rjekny bamž. W tutym času njesměła cyrkej ćerpjacych ludźi samych wostajić. Po njedawnej sylnej detonaciji, při kotrejž je znajmjeńša 150 ludźi zahinyło, hroža krajej hłód a problemy ze zastaranjom.

Nowy farar

Paris (dpa/SN). Po dobyću FC Bayern Mnichowa přećiwo Paris Saint-Germain w kónčnej hrě champions league je wčera wječor w francoskej stolicy k namócnosćam dóšło. Policija w Parisu je 148 ludźi zajała. Nimo toho su 400 chłostanjow wuprajili, dokelž njewužiwachu ludźo nahubniki, kaž bě wukazane. Cyłkownje 16 policistow je so zraniło. Namócni demonstranća zapalowachu wotpadkowe sudobja a rozbichu wukładne wokna wobchodow. Policija zasadźi sylzopłun.

Opozicija namołwja do stawka

Minsk. Opozicija w Běłoruskej je dźensa k zahajenju tydźenja k nowym stawkam w statnych zawodach a k demonstracijam namołwjała. „Žadamy sej wotstup Lukašenka. Kóžda mjeńšina, kotruž je wón dale na mocy, zawinuje wulke škody w hospodarstwje“, zdźěli koordinowaca rada opozicije. Lukašenko je po infor­macijach medijow guwernerej regiona Grodno kazał, wot dźensnišeho stawkowace statne zawody kompletnje zawrěć. Wčera běchu w Minsku statysacy ludźi přećiwo Lukašenkej demonstrowali.

Ministrojo wuradźowali

Liberec (dpa/SN). Prěni króć po wudy­rjenju koronakrizy staj so sakski ministerski prezident Michael Kretschmer (CDU) a čěski ministerski prezident Andrej Babiš zetkałoj. Zawrjenje mjezow wot srjedź měrca hač do spočatk junija na čěskim boku njebě prawdźepodobnje hinak móžne, je pak „tójšto problemow“ zawinowało, rjekny sakski politikar. „To njesmě so wospjetować, to smój sej pře­zjednaj“, rjekny Kretschmer po rozmołwje z Babišom we wědomostnej bibliotece w sewjeročěskim Liberecu. Zhromadna dźěłowa skupina z Bayerskej a Awstriskej ma nětko zjednorjenja za mjezu překročacych powołanskich dojězdźowarjow zdźěłać, na přikład wjacerěčne chorobne lisćiki. Zhromadnje wobhladaštaj sej Kretschmer a Babiš wysoku šulu ze 6 400 studentami a pobyštaj na Ještědźe.