Nowy pospyt rehabilitacije
Drježdźany (SN). Sakske ministerstwo za wobswět je minjene měsacy wobzamknjenju krajneho sejma jenož wahajo wotpowědowało. Dźe wo rehabilitaciju dweju sobudźěłaćerjow biosferoweho rezerwata Hornjołužiska hola a haty, kotrejuž běchu dospołnje njewoprawnjenje pušćili. Wahanje ma nětko konsekwency, kaž sćelak MDR rozprawja. Andreas Skomudek, bywši předsyda biosferoweho rezerwata, bě zhromadnje z 200 wobydlerjemi w meji 2016 Sakskemu krajnemu sejmej peticiju zapodał, zo by pušćenje sobudźěłaćerjow zjawnje předźěłać dał. Z peticiju sej žadachu, potrjecheneju dospołnje rehabilitować a wotpowědnje wotškódnić. To pak njeje so po měnjenju Skomudeka dosahajcy stało. Tuž so wón wo to prócuje, peticiju znowa na dnjowy porjad peticiskeho wuběrka zapisać dać.
To a tamne (10.12.18)
Něhdźe 1 100 wobdźělnikow w čerwjenym kabaće a z čapku na hłowje je wčera na mjeztym 10. Mikławšowym běhu w Michendorfje južnje Berlina startowało. To je nimale runje telko kaž loni, organizatorojo zdźěleja. Zajimcy móžachu so rozsudźić, hač chcedźa połtřeća, pjeć abo dźesać kilometrow zmištrować. Nimo toho bě stafla za sportowske swójby zarjadowana. Tež dźěći mějachu swoje wubědźowanje, wšako bě so 120 z nich přizjewiło. Mikławšowy kostim znajmjeńša bě za wšěch běharjow winowatosć.
Wosrjedź sławneho Španiskeho schodu w Romje stejo wostał je 27lětny ze swojim awtom. Kaž nowiny rozprawjeja, bě wón kontrolu nad wodźidłom zhubił a hakle na baroknych schodach stejo wostał. Awto bě chětro skóncowane, schód z 18. lětstotka bu hač na čornu smuhu borzdźidła lědma wobškodźeny.
Za wěsty přichod w rewěrach
Drježdźany (SN). Sakski wyši hórniski zarjad je so z předewzaćom Łužiska energija (LE-B AG) a Srjedźoněmskej hórniskej towaršnosću (MIBRAG) na to dojednał, wutworić rezerwy za znowawužiwanje krajiny po wudobywanju brunicy. Wotpowědne zrěčenje staj jednaćelej hórniskich koncernow nětko podpisałoj. Dojednanje měri so na přichod Wochožanskeje a Rychwałdskeje brunicoweje jamy na wuchodźe Němskeje kaž tež na jamu Schleenhain w srjedźoněmskim rewěrje.
Dowěru sej wróćo zdobywa
Hamburg (dpa/SN). Krótko do wólbow noweho nawodnistwa CDU sej unija dowěru wolerjow wróćo zdobywa. To wujewja aktualny wólbny trend ARD. Po nim by strona při wólbach 30 procentow hłosow nažnjała. To su štyri procentne dypki wjac hač při naprašowanju minjeny měsac. Zeleni bychu přisadźili a na 20 procentow spadnyli. SPD a AfD byštej při 14 procentach wostałoj, FDP a Lěwica byštej kóžda na wosom procentow přišłoj.
Jara strašnu rozbuchlinu našli
Liča z eskalaciju namocy
Dźensa rozsudny dźeń
Pasma bjez wjelkow trěbne
Hannover (dpa/SN). Ratarska ministerka Delnjeje Sakskeje Barbara Otte-Kinast sej žada, wjelki z wěstych kónčin zwjazkoweho kraja wućěrić. „Sym jara za pasma bjez wjelkow w Delnjosakskej“, rjekny politikarka CDU Osnabrückskim nowinarjam. „W někotrych regionach našeho zwjazkoweho kraja njeje městna za wjelka, za to w druhich“, wona doda. W druhich europskich krajach su tajke pasma hižo dawno zarjadowali. Wosebje na pobrjohu morja měli wo tym rozmyslować. „Tam, hdźež wowcy k škitej před wulkej wodu přinošuja, njeje městno za wjelka.
Pozdatny nadpad wjelka w Delnjej Sakskej bě naposledk njeměr zbudźił. Gmejnski dźěłaćer w Steinfeldźe 30 kilometrow sewjernje Bremena je twjerdźił, zo bě jeho wjelk kusnył. Wědomostnicy pak njemóžachu při analyzy DNA žane slědy wjelka zwěsćić. Delnjosakska CDU žada sej nětko nowe přepytowanje.
Žada sej lěpši škit
To a tamne (07.12.18)
Wuměłska figura z mjenom Hyäne Fischer, štož podoba so mjenu šlagroweje spěwarki Heleny Fischer, chce klětu na Eurovision song contesće w Israelu za Awstrisku nastupić. Kaž tamniši rozhłosowy sćelak ORF zdźěli, chcedźa požadanje nětko dokładnje pruwować, wšako cyle jasne njeje, wo koho so nastupajo młodu žonu jedna. Dotal wupada za tym, zo tči dźiwadźelnica feministiskeje sceny z Wiena za požadanjom.
Elvis je žiwy! Tomu je znajmjeńša w hessenskim městačku Friedbergu tak, hdźež wjesela so wobydlerjo nětko nad figuru znateho spěwarja na amplach. Tři signalowe lampy wokoło Elvisa Presleyjoweho naměsta su specielnje wuhotowane. Hdyž so zelena lampa za pěškow swěći, pokazuje so jim kral rock ’n’ rolla w swojim znatym rejwanskim stilu.
Dalše přilubjenje knježerstwa
Paris (dpa/SN). Do wočakowanych nowych protestow a móžnych namócnosćow je so francoske knježerstwo z dalšim přilubjenjom na demonstrantow wobroćiło. Francoski statny prezident Emmauel Macron je planowane zwyšenje dawkow na bencin a diesel – štož bě protestne hibanje „žołtych lacow“ zawinowało – za cyłe lěto 2019 wotprajił. Spočatnje běchu zwyšenje jenož wo šěsć měsacow přestorčili.
Płaćizny wolija stabilizować
Wien (dpa/SN). Organizacija zemski wolij eksportowacych krajow (OPEC) je dźensa we Wienje wo tym wuradźowała, mnóstwo wudobywaneho wolija pomjeńšić, zo bychu so płaćizny stabilizowali abo samo zaso zwyšili. Minjeny čas bě so wolij na swětowych wikach potuńšił. Powšitkownje nětko wočakowachu, zo so na mjenje produkcije dojednaja. Prezident USA Donald Trump je OPEC namołwjał, „dotalne mnóstwo wobchować. Swět wyše płaćizny wolija nochce a njetrjeba.“
Wjelči centrum wotewrjeny
