London (dpa/SN). Britiska premierministerka Theresa May dyrbi z tym ličić, zo so jeje konserwatiwna frakcija z prašenjom njedowěry přećiwo njej staji. Wčera bě jej wliwny konserwatiwny zapósłanc Jacob Rees-Mogg njedowěru wuprajił, po tym zo bě May naćisk zrěčenja z EU wo wustupje kraja z Europskeje unije předstajiła. W tym zwisku běchu wjacori ministrojo a statni sekretarojo wotstupili. Mjeztym hrozy May w zwadźe brexita dla nowy problem. Konserwatiwna sewjeroirska demokratiska a unijonistiska strona DUP žada sej wotstup premierministerki. Hewak njebudźe strona zrěčenju wo brexiće přihłosować, piše The Daily Telegraph. May je w parlemenće na hłosy DUP po­kazana. Tuta w zrěčenju předwidźanu rólu­ Sewjerneje Irskeje wotpokazuje.

Berlin/Lübeck (dpa/SN). We wubědźowanju wo naslědnistwo Angele Merkel na čole CDU su wšitcy třo kandidaća na prěnjej regionalnej konferency ponowjenje strony přilubili a so zdobom za zhromadne dźěło ze zwjazkowej kanclerku wuprajili. W CDU knježi nowy rozmach, rjeknychu generalna sekretarka Annegret Kramp-Karrenbauer (56), bywši frakciski šef Friedrich Merz (63) a minister za strowotnistwo Jens Spahn (38) wčera w Lübecku w přepjelnjenej žurli před něhdźe 800 čłonami.

Merz a Spahn potwjerdźištaj w diskusiji z wopytowarjemi, zo nochcetaj so tež hnydom wo kanclerstwo prócować. Merz přiwšěm na to skedźbni, zo ma wšelake diferency z Merkel. Spahn rjekny, zo chcył so w prěnim rjedźe wo ponowjenje CDU starać. „Trjebamy stronu, kotraž na bazy rozsudźi a nic wothorjeka“, wón zwurazni. Kramp-Karrenbauer, kotruž maja mnozy za zwjazkarku Angele Merkel, chce tohorunja bazu strony bóle do rozsudow zapřijeć. „400 000 čłonow je najwjetši pokład strony.“

Dalše temy wječora běchu mandźelstwa jenakosplažnych, politika ćěkancam napřećo a socialna sprawnosć.

Zo je serbski napis při Sakskim krajnym sejmje w Drježdźanach skónčnje připrawjeny, je chwalobne, runje tak kaž fakt, zo je serbske pismo runje tak wulke kaž němske. Štož mje trochu zamyla je wašnje, kak su serbski napis wotkryli: takrjec připódla a trochu zaćichim. Prezident krajneho sejma Matthias Rößler je třoch serbskich zapósłancow Marka Šimana, Alojsa Mikławška a Hajka Kozela krótkodobnje zwołał, zo by jim najnowše wudobyće prezentował. Sym sej wěsty, zo móhło so tole tež we wjetšim a swjatočnišim ramiku stać. Dopominam so derje na posedźenje sejma w juniju, jako na jednym z prěnich dypkow dnjoweho porjada – a nic kaž hewak na poslednim – wo serbskej rozprawje debatowachu. To mějach zaćišć, zo je so suk skónčnje torhnył. Po wčerawšim „wotkryću“ pak njemóžu so zaćišćej dowobarać, zo su sakskim politikarjam serbske naležnosće přeco hišće trochu njepřijomne. Marko Wjeńka

Za internetnu wěstotu zamołwity minister w Japanskej njeje hišće nihdy kompjuter wužiwał. „Wot swojeho 25. žiwjenskeho lěta sym sobudźěłaćerjam a sekretaram přikazował. Tuž njejsym nihdy w swojim žiwjenju kompjuter trjebał“, rjekny Yoshitaka Sakurada srjedu w parlamenće. 68lětny je wot oktobra minister za přihot olympiskich hrow 2020. Při tym dyrbi tež wěstotu we internetnym wobłuku zaručić. Opozicija reagowaše na wuprajenja ministra chětro zludana.

Pjećlětnemu hólcej awto darił je čečenski mócnar Ramsan Kadyrow. Do toho bě hólc při rekordnym pospyće pječa 4 000 ležnych zepěrow zmištrował. Na to dari jemu Kadyrow Mercedes. Hólc, kiž je w swojej domiznje tež jako „čečenski Arnold­ Schwarzenegger“ znaty, je sej tutón dar ze swojim wukonom zasłužił, da autokratnje knježacy Kadyrow wozjewić.