Merkel wzda so předsydstwa CDU
Berlin/Wiesbaden (dpa/SN). Zwjazkowa kanclerka Angela Merkel (CDU) je po masiwnych wólbnych stratach CDU w Hessenskej zwólniwa, zastojnstwo předsydki strony spušćić. To je wona na dźensnišim posedźenju prezidija strony w Berlinje připowědźiła, kaž powěsćernja dpa z kruhow wobdźělnikow zhoni. Zdobom pak chce Merkel zwjazkowa kanclerka wostać. Dotal bě wona stajnje na tym wobstawała, zo wobě zastojnstwje hromadźe słušatej.
Naslědnistwo na čole CDU móhli hižo na přichodnym zjězdźe strony spočatka decembra w Hamburgu zrjadować. Při wólbach Krajneho sejma Hessenskeje stej CDU a SPD wčera razne straty poćerpjełoj. CDU dósta jenož hišće 27 procentow hłosow, wostanje pak přiwšěm najsylniša politiska móc kraja. SPD spadny na 19,8 proc. a je nětko runje tak sylna kaž Zeleni, kotřiž dóstachu tohorunja 19,8 proc. Tak móža CDU a Zeleni swoju dotalnu koaliciju dale wjesć, maja pak runje hišće wjetšinu jeničkeho hłosa we Wiesbadenskim parlamenće.
Zasadźa nětko elektriski bus
Frankfurt n. M. (dpa/SN). Předewzaće Flixbus zasadźa nětko ryzy elektriski bus na dróhach Němskeje. Wot dźensnišeho ma bus z chinskeje produkcije mjez Frankfurtskim lětanišćom a Mannheimom tam a sem jězdźeć, zdźěli wčera wobchadne předewzaće. Bus modela C9 ze 40 městnami móže po informacijach twarca BYD hač do 320 kilometrow daloko jěć. Na něhdźe 115 km dołhej čarje ma bus tež w Heidelbergu zastać.
Jězdźidło je po informacijach wobchadneho předewzaća dwójce tak drohe kaž normalne dieselowe. Manager němskeje wotnožki Flixbusa Fabian Stenger rěčeše wo signalu, zo je přewrót na polu mobility móžny. „Zdobom je prěni elektriski dalokobus w rjedźe našich wozydłow pohon busytwarcam, inowacije pospěšić a alternatiwy k ryzy dieselowym motoram wuwić. Flixbus chce jězdźidło jónu abo dwójce wodnjo a w nocy z ekomilinu partnera Greenpeace Energy nabiwać. Stacije za to maja w Frankfurće a Mannheimje. Flixbus bě hižo w měrcu ryzy elektriski bus na čarje Paris–Amiens zasadźił. Tež tón pochadźa wot chinskeho busytwarca Yutong.
To a tamne (29.10.18)
Mału granatu namakał je wudźer w Hamburgu. Po informacijach policije bě muž z pomocu magneta w rěce Alster wudźił, zo by metaliske wěcy we wodźe namakał. Při tym wućahny dwaj centimetraj šěroku granatu, kajkuž běchu za čas Druheje swětoweje wójny k wotwobaranju lětadłow wužiwali. Policija je ju wotwjezć dała. Po měnjenju fachowcow bě granata hišće strašna.
Za swój spontany koncert na balkonje w Praze je popspěwar z USA Jason Derulo w socialnych medijach wjele chwalby žnjał. „Balkonowa serenada móže so legendarna stać“, pisa fan na portalu Instagram. Koncert 29lětneho we wjacezaměrowej hali w Praze dyrbjachu štwórtk wječor techniskich přičin dla krótkodobnje wotprajić. Na to stupi so Derulo na balkon, zo by čakacym fanam zaspěwał. Koncert chce pozdźišo nachwatać.
Wo Syriskej so dorěčałoj
Paris (dpa/SN). Do wjerškoweho zetkanja k Syriskej w Turkowskej staj francoski prezident Emmanuel Macron a prezident USA Donald Trump swoju poziciju wothłosowałoj. „Zjednoćene staty a Francoska maja samsne wěstotne, humanitarne a politiske zajimy w Syriskej“, zdźěli palast prezidenta w Parisu. Do toho běštaj statnikaj telefonowałoj. Statni a knježerstwowi šefojo Turkowskeje, Ruskeje, Němskeje a Francoskeje chcedźa so jutře w Istanbulu zetkać.
China a Japanska so zbližatej
Peking (dpa/SN). Hladajo na wikowansku zwadu z USA chce China hospodarske styki z Japanskej widźomnje zesylnić. Na to staj so japanski ministerski prezident Shinzo Abe a jeho chinski kolega Li Keqiang w Pekingu dojednałoj. Politiske poćahi měli so po wjelelětnych napjatosćach zaso normalizować. W hospodarskich a wikowanskich poćahach chcedźa „nowu fazu kooperacije“ zahajić. Minjeny čas bě mjez krajomaj stajnje zaso k napjatosćam dochadźało.
Nowe prawidła za cyrkwje
Trump hrozy migrantam
Merkel z kralom telefonowała
Hessenska koalicija wohrožena
To a tamne (26.10.18)
Motorizowany piwowy kašćik je policija w badensko-württembergskim Berglenje zadźeržała. Młody pasler bě nastroj z dźesać PS sylnym motorom na štyrjoch koleskach tak konstruował, zo móžeše z nim hač do 50 km/h spěšnje jěć. Wězo njeměješe žanu dowolnosć za nadróžny wobchad, kaž policija w swojej rozprawje piše. 21lětny dyrbješe swoju jězbu ze spěšnym piwowym kašćikom přetorhnyć. Nimo toho hrozy jemu chłostanske jednanje.
Zemske worješki su prěni króć w Tirolu žnjeli. Horce a suche lěćo wšak je plahowanje subtropiskeje rostliny zmóžniło. Žně na 300 kwadratnych metrach wulkej pospytnej płoninje njedaloko Innsbrucka pak njeběchu scyła tak jednore, dokelž dyrbjachu kóždu jednotliwu rostlinu wuryć a pod zemju narosćene worješki wotšćipać. Přiwšěm nažnjachu 200 kg.
Namołwjeja awtotwarcow
Berlin (dpa/SN). Zwjazk městow Němskeje je awtowu industriju k wjetšim napinanjam přećiwo hrožacym zakazam dieselowych awtow namołwjała. „Dlijenja a komdźenja maja so najspěšnišo skónčić“, rjekny hłowny jednaćel zwjazka Helmut Dedy powěsćerni dpa. „Awtowa industrija dyrbi skónčnje wotućić, zo by strowotu ludźi škitała a wodźerjam dieselowych awtow perspektiwu skićiła.“ Runja druhim městam dyrbja so nětko tež w Mainzu na to nastajić, zo dieselowym awtam jězdźić zakazaja.
Bomby kritikarjam Trumpa
New York (dpa/SN). Njeznaty je wjacorym prominentnym kritikarjam prezidenta USA Donalda Trumpa runočasnje rołowe bomby pósłał. Potrjecheni běchu mjez druhim bywši prezident Barack Obama, něhdyša wonkowna ministerka Hillary Clinton a bywši direktor CIA John Brennan. Pakćiki su podobne listowej bombje, kotruž běchu póndźelu w póšće miliardara Georgea Sorosa našli. Tón bě runja tamnym mjenowanym Trumpa stajnje zaso zjawnje a zdźěla dosć raznje nadběhował.
Žada sej niše dawki
Bartsch zasudźa manewer NATO
Berlin (dpa/SN). Předsyda frakcije Lěwicy w Němskim zwjazkowym sejmje Dietmar Bartsch jako signal wottrašenja Ruskeje mysleny wulkomanewer NATO w sewjernej Europje raznje kritizuje. „Je błazne, strašne a prowokantne napřećo Ruskej, w tuchwilnej klimje najwjetši manewer NATO w Norwegskej zahajić“, rjekny Bartsch nowinarjam. „Strach wójny je tak wulki kaž hižo dołho nic. Prezident USA hrozy Ruskej a Chinje z nowym jadrowym brónjenjom a wupowědźa zrěčenja wo wotbrónjenju. Kołwrótne!“
Najwjetši manewer NATO po kóncu zymneje wójny zahaji so minjenu nóc. Na nim wobdźěla so něhdźe 50 000 wojakow, mjez nimi 10 000 přisłušnikow Zwjazkoweje wobory. Woni maja dwaj tydźenjej w Norwegskej a wokolnych powětrowych a mórskich kónčinach zhromadnje zwučować. Nimo wojakow je 10 000 jězdźidłow kaž tež wjace hač 300 lětadłow, helikopterow a łódźow pódla. Zaměr manewra je, hladajo na Rusku, wotwobaranje nadpada na jedyn z 29 čłonskich statow aliancy zwučować.
