Hdyž sirena wuje, poprawom ženje žane dobre začuće nimaš, dokelž njewěš, što je so stało a hač njeje snano samo přiwuzny abo znaty wot někajkeho njezboža potrjecheny. Minjeny pjatk w Chrósćicach tajke začuće scyła njemějach, dokelž wědźach, zo jedna so wo zwučowanje. A sprawnje prajene sym so tam samo někak derje čuł. Wšako móžach so wo tym přeswědčić, zo tamniši wohnjowi wobornicy a ći z wokolnych wsow w nuznym padźe jara spěšnje pomhać přijědu. Zo wšo a wšitko hnydom prawje njefunguje, je čłowjeske. Zmysł tajkeho zwučowanja dźě je, zo móžeš to a tamne nawuknyć. To druhe čehoždla so wosrjedź wobornikow derje čujach, bě, zo bě to takrjec ryzy serbske ­zwučowanje. Tež wohnjowa wobora móže potajkim tajki rěčny rum być, hdźež ­cyle samozrozumliwje mjez sobu serbuja, a byrnjež přez škričkowanski nastroj było. Tež za to słuša wobornikam kompliment! Marian Wjeńka

Ministerscy prezidenća wuchodnych brunicowych krajow ćišć zesylnjeja

Berlin (dpa/SN). Ministerscy prezidenća wuchodoněmskich brunicowych krajow žněja ze swojimi žadanjemi nastupajo datum kónca zmilinjenja brunicy kritiku wuhloweje komisije. „W Němskej hač do lěta 2040 wuhlo spalić je dospołnje njediskutabelne a rani koaliciske zrěčenje, kiž su stronscy nawodźa třoch ministerskich prezidentow podpisali a kotrež spřećiwja so zdobom mandatej wuhloweje komisije“, rjekny Martin Kaiser wot wobswětoškitneje organizacije Greenpeace powěsćerni dpa. Kraje njesměli dlěje šansy dźěła komisije ignorować. Kaiser je čłon wot zwjazkoweho knježerstwa zasadźeneje wuhloweje komisije. „Třo ministerscy prezidenća njemóža so wšitkim změnam spjećować a sej runočasnje pjenjezy žadać“, Kaiser kritizuje. „Wězo ma so trěbna strukturna změna přewodźeć. Kónc brunicy pak ma so widźomnje pospěšić, štož sej tež swětowa klimowa rada žada.“

„Wobrazy myslow a słowow“ rěka hesło personalneje wustajeńcy twórbow Isy Bryccyneje (na wobrazu), kotruž su minjeny štwórtk w Choćebuskim Serbskim domje wotewrěli. W hač do 18. januara přistupnej přehladce pokazuje serbska wuměłča tušowe a akrylowe grafiki kaž tež akwarele. Wosebitej ćežišći stej seriji „BRUNICA“ a „DIAMANT“. W tak mjenowanymaj słowo-wobrazowymaj slědomaj rozestaja so Kubšičanka z „bohatstwom a ćežmom Łužicy“ resp. wliwom swětowych podawkow na tudyše žiwjenje. Lawdatorka na wernisaži, kotruž je młoda Choćebuska pianistka Natalja Kowalčuk hudźbnje wobrubiła, bě Christina Kliemowa. Foto: Michael Helbig

Jenož hodźiny po kradnjenju kolesa je žona mountainbike swojeho muža na internetnej platformje wuhladała a předawarjej pasle stajiła. 40lětna skontaktowa poskićowarja kolesa, kotrež běchu nje­znaći rano z ležownosće swójby w Düsseldorfje pokradnyli. Žona informowaše policiju a dorěča sej z předawarjom zetkanje na zastanišću. Tam ciwilna policija paduchow zaja. Štyrjo podhladni w starobje 14 do 16 lět su policiji hižo znate. Nětko přećiwo nim přepytuja.

Bosy a jenož w nócnym wobleku bě wosomlětny wčera rano we Wilkauwje-Haß­lauwje w Zwickauskim wokrjesu na dróze po puću. Kaž wón policiji pozdźišo rjekny, nochcyše mać mylić, kiž hišće spaše, jako poda so na wopyt k swojej wowce, kotraž w samsnym měsće bydleše. Kedźbliwa wobydlerka bě policiju informowała, a ta hólca zaso k maćeri dowjeze.