Urban je naslědnik Petry
Jutře wo naprawach wuradźuja
Barcelona (dpa/SN). We wobłuku konflikta wokoło hibanja wo njewotwisnosć Katalonskeje su separatistiske organizacije wobydlerjow regiona namołwjeli bankam zeškodźeć. Tak měli ludźo masiwnje pjenjezy ze swojich kontow najwjetšich pjeć bankow wotzběhować. Akciju chcychu dopołdnja w postajenym času wotměć. Namołwa měri so přećiwo zajeću prezidentow wobydlerskeje iniciatiwy katalanskeje narodneje zhromadźizny a kulturneho towarstwa Omnium Cultural.
Konflikt mjez katalanskim regionalnym a španiskim centralnym knježerstwom je so po wotběženju ultimatuma wčera přiwótřił. Španiski ministerski prezident Mariano Rajoy bě sej žadał, hibanja wo njewotwisnosć zakońčić. Tole je regionalny prezident Carles Puigdemont wotpokazał. Tuž připowědźi Rajoy nućenske naprawy, wo kotrychž chce rada ministrow jutře w Madridźe wuradźować. Mjeztym su kónc tydźenja w Barcelonje demonstracije předwidźane.
Přiražki zwyšić
Drježdźany (SN). Sakske statne knježerstwo je na swojim kabinetnym posedźenju wutoru wobzamknyło změnić zakoń, po kotrymž dóstanu slepi wobydlerjo wosebitu přiražku. Tole měli Sakskemu krajnemu sejmej předpołožić. Naćisk změny zakonja předwidźi zwyšenje přiražkow potrjechenym. Tak měli sylnje słabowidni měsačnje dźesać eurow wjac dóstać, štož wučinja potom 62 eurow. Wosobam bjez słucha chcedźa město 103 eurow měsačnje 115 eurow dać. Sylnje zbrašenym dźěćom chcedźa přiražku wot 77 eurow na 100 eurow měsačnje zwyšić. Prěni raz předwidźi naćisk zakonja tež měsačnu přiražku slepym a hłuchim we wysokosći měsačnje 147 eurow.
„Moderatne zwyšenja su hladajo na socialnu politiku woprawnjene. Chcemy wšitkim potrjechenym polěpšenje žiwjenskeje situacije zmóžnić“, zwurazni sakska socialna ministerka Barbara Klepsch (CDU). Za swójby ze zbrašenymi dźěćimi je spěchowanje a hladanje logistiske a časowe wužadanje. Ze zwyšenjom přiražki ma jich sakske knježerstwo bóle podpěrać.
To a tamne (20.10.17)
Žona šefa chudeho kraja w Africe smě tež raz stokaratny diamantny pjeršćeń w hódnoće 1,35 milionow dolarow měć. Ke kwasnemu dnjej je sej mandźelska prezidenta Simbabwe Grace Mugabe přeće spjelniła a wosebitu debjenku skazała. Zjawnosć njeby drje ženje wo tym zhoniła, tola pjeršćeń je nětko pad za sudnistwo. Po měnjenju Mugabe njebě debjenka kwalitatiwna dosć, tuž žada sej wot wikowarja 1,23 miliony dolarow wotškódnjenja.
Z rekordnymi 6,52 promilomaj w kreji su wopiteho muža w Mnichowje našli. Wutoru bě so na tamnišim dwórnišću zwjezł, zwjazkowa policija zdźěli. Kaž so wukopa jednaše so wo 61lětneho ze sakskeje Šwikawy. Policija dowjeze muža do chorownje. Kaž zastojnicy dale rozprawjachu móžeše wón samo hišće rěčeć a twjerdźeše, zo je tola jenož jednu měrku (Maß) piwa pił.
Znamjo za wjelči management
Drježdźany (SN/at). Sakski wobswětowy minister Thomas Schmidt (CDU) je so w Brüsselu pola Europskeje unije wuspěšnje za změny nastupajo wobchad z wjelkami zasadźał. Kaž ministerstwo w Drježdźanach zdźěli, je Schmidt z Humbertom Deladom Rosu rěčał, generalnej direkciji wobswět přisłušnym wotrjadnikom za přirodoškit. Předmjet rozmołwy bě prawniska dowolenosć, wjelki we wobłuku monitoringa z tak mjenowanymi „Soft Catch Traps“, škitej zwěrjatow wotpowědowacymi a šonowacymi wjelčimi paslemi, popadnyć. Komisija je připrajiła, wotpowědnemu namjetej přihłosować. Wona přicpěwa móžnosći wužiwanja tychle paslow wosebity wuznam, bjez toho zo so škit zwěrjatow zanjecha, rěka ze sakskeho wobswětoweho ministerstwa.
Na wjeršku EU w Brüsselu
Brüssel (dpa/SN). Na wjeršku Europskeje unije dźensa w Brüsselu chce zwjazkowa kanclerka Angela Merkel (CDU) z jeje kolegami wo europskej ćěkancowej a zakitowanskej politice rěčeć. Tež poćah k Turkowskej steji na agendźe wuradźowanjow. Předewšěm póndźe tule wo wobmjezowanje financnych srědkow za Turkowsku. Dale chcedźa so šefojo europskich knježerstwow z digitalizaciju nastupajo spěšny internet a digitalnych posłužbow zaběrać.
Sonděruja dale
Berlin (dpa/SN). Po jednotliwych rozmołwach předsydstwa Unije chcetej dźensa móžnej koaliciskej stronje FDP a Zwjazk 90/Zeleni zhromadnje wuradźować. Žadanja wobeju su chětro rozdźělne, wosebje hladajo na energijowu a klimowu kaž tež europsku a ćěkancowu politiku. Přiwšěm su wšitcy wobdźěleni sonděrowanskich jednanjow połnje optimizma a nadźijeja so dalšich rozmołwow. Akterojo pak pokazachu na to, zo budźe to dołhi a ćežki puć.
Swětowa konferenca w Bonnje
Njewšědne ćopłe wjedro wabi tójšto ludźi do Błótow, zo bychu ...
Woči sej zamućić njedać
Wotwisnosć Sakskeje wot transfernych płaćenjow dale přewulka
Budyšin (SN/at). Sakski zličbowanski zarjad (SRH) je spočatk tydźenja swoju lětnu rozprawu ze zwěsćenjemi nastupajo etat a pruwowanske wuslědki ze statneho zarjadnistwa předstajił. Najebać rekordne dawkowe dochody w šěstym lěće za sobu pak widźa pruwowarjo strach njedosahaceje refleksije dołhodobnych etatnych rizikow a trěbnych naprawow profylaksy. Prezident zličbowanskeho zarjada prof. dr. Karl-Heinz Binus warnuje, zo rekordne dawkowe dochody woči zamućeja, dźe-li wo trěbne systematiske přiměrjenje wudawkow. Skutkowny nošny etat dyrbi po jeho słowach „tež na njewočakowane přidatne wudawki reagować móc. Trěbne su dołhodobne planowanja financow.“ K najwjetšim etatnym rizikam Sakskeje słušeja wuskutki demografiskeje změny. „Koncept wo tym, kak z demografiskej změnu a jeje wuskutkom na dołhodobnu nošnosć zjawnych financow Swobodneho stata Sakskeje wobchadźeć, dotal w trěbnej měrje njepředleži. Při tym wuskutki demografiskeje změny za dawkowe dochody kraja njenahladne njejsu“, prof.
To a tamne (19.10.17)
Při pospyće swój kluč z gullyja wudźić, je muž w Hamburgu tčacy wostał a z tym wobšěrne zasadźenje wohnjoweje wobory zawinił. Hač k bjedram bě wón we wuskej dźěrje popadnjeny. Jenož noze běštej hišće widźeć. Hakle po 40 mjeńšinach móžeše wohnjowa wobora muža wuswobodźić. Za to běchu powjazy při rěblu woborneho awta připrawili a jeho z nimi wućahnyli. 23 wobornikow bě na akciji wobdźělenych. A kaž nowina Bild rozprawja, dźeržeše muž při wuchowanju swoje kluče kruće w rukomaj.
1,3 tony kokaina wušiknje jako PVC-roły tarnowane je peruska policija našła. Kaž so wukopa běchu skućićeljo drogi z materialom plastikowych rołow předźěłali. Cyłkownje je policija 17 ludźi zajała. Mjez nimi tež chemikarja, kiž měješe w Mexiku drogi z plastiki wurozpušćować, zdźěli peruske nutřkowne ministerstwo.
Nječuja so dosć zapřijate
Podstupim (SN/JaW). Braniborska chce wukubłanje maćernorěčnych wučerjow, kotřiž njestuduja serbšćinu, lěpje spěchować. To zhonichu čłonojo Radow za serbske naležnosće Sakskeje a Braniborskeje na zhromadnym wuradźowanju wčera w Podstupimje. Přikład za to ma być sakski zakoń wo powołanskich akademijach, hdźež je rjadowane, zo dóstawaja maćernorěčni Serbja, kotřiž studuja wučerstwo na přikład na biologiju abo matematiku w posudźowanju přidatny dypk. „Tak mytujemy tych, kotřiž maćernorěčne kubłanje tež w druhich předmjetach na so bjeru“, rozłoži předsydka sakskeje serbskeje rady Marja Michałkowa. „Braniborska wotpohladuje tajke spěchowanje, wobzamknjene pak hišće ničo njeje“, wobkrući předsyda braniborskeje serbskeje rady Torsten Mak.
