Katalonska: Dóńdźe k „pačenju“?
Budźe Katalonska bórze njewotwisna? Po studiji instituta katalanskeho knježerstwa Centre d‘ estudis d’opinió z julija tuchwilu po zdaću přihłosowanje wobydlerstwa za njewotwisnosć pobrachuje: Jeno 34,7 procentow woprašowanych přeje sej njewotwisnu Katalonisku.
Runočasnje ma 62 procentow wobydlerjow tuchwilne awtonomne prawa Katalonskeje za njedosahace. Wěste pak je: Katalanojo chcedźa wothłosować. A wot 6. septembra je za jich knježerstwo jasne: Referendum wo njewotwisnosći Katalonskeje wotměje so zajutřišim, 1. oktobra.
Hač pak smědźa Katalanojo woprawdźe wolić, je tuchwilu njejasniše hač hdy prjedy. Španiski ministerski prezident Mariano Rajoy njewustawajcy ludowe wothłosowanje jako wustawje so spřećiwjace wopisuje. Katalanski knježerstwowy šef Carles Puigdemont chce pak najebać to wolić dać. Prawniski stat tam abo sem, za njeho je to demokratiske prawo Katalonskeje. Fronty su skostnjene. Wojerska jednotka Guardia Civil je hižo přihotowana.
Biskop: Serbske wosady wostanu
Struktura serbskich katolskich wosadow Drježdźansko-Mišnjanskeho biskopstwa so hač do lěta 2025 njezměni. To je biskop Timmerevers rozsudźił.
Budyšin (SN/JaW). Serbske wosady Drježdźansko-Mišnjanskeho biskopstwa, kotrež mjenuja wotnětka oficialnje Serbski pastoralny rum (SPR), dyrbja hač do lěta 2025 zhromadny pastoralny koncept wuwić a wothłosować. To je biskop Heinrich Timmerevers jim do nadawka dał. Jako nawodu SPR wobkrući wón Budyskeho tachantskeho fararja Wita Sćapana. Hač do lěta 2025 wostanje tuž struktura serbskich wosadow, kajkaž tuchwilu je.
Wo rozsudźe biskopa informowaše zastupnikow serbskich wosadow a dalšich cyrkwinskich městnow generalny wikar Andreas Kutschke srjedu w Budyšinje. „Z widom na specifisku situaciju zmóžnja biskop wosadam Chrósćicy, Njebjelčicy, Wotrow, Radwor, Ralbicy a Baćoń kaž tež farskej wikariji Pančicy-Kukow wurjadne rjadowanje“, zdźěla biskopstwo.
Jednotu EU wobchować
Tallinn (dpa/SN). W diskusiji wo reformy Europskeje unije chce prezident Rady EU Donald Tusk w přichodnymaj lětomaj plan za dalše postupowanje zdźěłać. Tole bě z kruhow šefow knježerstwow tuchwilu wotměwaceho so wjerška EU w estiskim Tallinnje słyšeć. Jasne je, zo měła so jednota EU wobchować. Přiwšěm měła EU wobydlerjow konkretnje podpěrać, ale so tež nowym idejam wěnować.
Zežiwidła pruwować
Konstanz/Friedrichshafen (dpa/SN). Po nańdźenju zajědojćenych žiwidłow we wobchodźe w bliskosći Bodamskeho jězora, warnuje policija před dalšimi manipulacijemi. Njeznaty je hrozył, dalše produkty zajědojćić. Z tym chce sej wjacore miliony eurow wudrěwać. Wčera bě policija fota muža wozjewiła, kotrež něhdźe 50lětneho zwobraznjeja. Dotal su wjacore konkretne pokazki dóšli. Přiwšěm měli ludźo po cyłej Němskej žiwidła na manipulacije pruwować.
Stej přećiwo pačenju krajow
Infobus lětušich Budyskich tydźenjow demokratije je wčera ...
Wowčerjowbóle spěchować
Drježdźany (SN/BŠe). Zaběraš-li so ze statistiku wobstatka wowcow w Sakskej, je spóznajomne, zo jich ličba dale a bóle woteběra. Minjene 15 lět je so wona społojčiła. Tónle zjaw tež w tamnych zwjazkowych krajach wobkedźbuja. Něhdźe pjeć procentow wowcow cyłkowneho němskeho wobstatka je w Sakskej. Ličby su alarmowace a přičina so z nimi zaběrać. To je Sakski krajny sejm spóznał a so nětko temje wěnował.
Kaž zapósłanča krajneho sejma Kathrin Kagelmann (Lěwica) na srjedownym posedźenju zwěsći, je w Sakskej tak a tak hižo jara mało wowcow. Jich plahowanje jako kulturna technika z wowčernjemi dale a bóle woteběra. Lěwica chce plahowanje wowcow na pastwach jako ekologiske dźerženje skotu zesylnić. W přichodnej spěchowanskej periodźe zhromadneje europskeje agrarneje politiki maja so wotpowědne naprawy planować. Kagelmann namjetowaše wosebitu premiju za maćerne wowcy.
Dobry rozsud
To a tamne (29.09.17)
Dokelž je nowe domske za kruwu Kelly přemałke, su za nju nětko w hródźi telewizor instalowali. W bywšim bydlenju móžeše mjeztym 1 300 kilo ćežka Kelly durje wočinić a zady so zaso začinić. Popołdnju wobstawaše wona na poprjancach, w zymje wohrěwaše so při kachlach. Nětko je wšo hinak. Kelly wjac přez durje noweho domu njepřińdźe, byrnjež to jeje hladanskaj „staršej“ předwidźane měłoj. Ekstra jeje dla běštaj Freddy Jansen a Heike Rüdiger wotpowědne kachlicy wukłasć dałoj, zo njeby so wobsunyła. Zo njeby so tak samotna čuła, móže nětko w hródźi znajmjeńša telewizor hladać.
Interkontinentalny nuzowy telefonat je wutoru Mnichowsku wohnjowu woboru zaběrał. Přizjewił bě so młody muž, kotrehož přećelka měješe diabetesy dla ćeže w kaliforniskej metropoli San Francisco. Němscy wobornicy reagowachu a wołachu swojich kolegow na tamnym kontinenće wo pomoc.
Diskutuja wo Europje
Tallinn (dpa/SN). Zwjazkowa kanclerka Angela Merkel (CDU) a jeje kolegojo krajow Europskeje unije zetkaja so dźensa wječor w estiskej stolicy Tallinnje, zo bychu wo přichodźe Europy wuradźowali. Francoski prezident Emmanuel Macron je sej wutoru w narěči daloko sahace reformy žadał. Hižo srjedź septembra bě prezident komisije EU Jean-Claude Juncker swoju wiziju wo EU předstajił. Wobaj konceptaj chcedźa w Tallinnje rozjimać. Z rozsudami pak hišće njeliča.
Schäuble jako prezident sejma
Berlin (dpa/SN). Dotalny financny minister Wolfgang Schäuble (CDU) ma so z prezidentom zwjazkoweho sejma stać. Hladajo na wotwidźomne konflikty noweho parlamenta ze sydom stronami chce unija nazhoniteho zapósłanca jako naslědnika Norberta Lammerta namjetować. Schäuble móže z wjetšinu hłosow ličić, wšako stej SPD a FDP podpěru hižo signalizowałoj. Jako minister njeby 75lětny tuž wjace k dispoziciji był.
Hartung zastojnstwo złožił
W přitomnosći Thomasa hrabje von Arnima a Ingrid Varga, zhotowjerki ...
Sakska CDU žada sej reformy EU
Drježdźany (dpa/SN). Rozsud Wulkeje Britaniskeje, z Europskeje unije wustupić, měł po zhladowanju CDU w Sakskim krajnym sejmje tež konsekwency za zhromadźenstwo měć. „Sakska trjeba tež po brexiće fungowacu EU. Za to su reformy trěbne“, wuzběhny wčera europski politikar a serbski zapósłanc krajneho sejma Marko Šiman (CDU) na posedźenju w Drježdźanach. Štóž sej nětko pohłubšenje běrokratiskich strukturow Europskeje unije žada, njeje „poselstwo Wulkeje Britaniskeje zrozumił“, Šiman rjekny.
Politika za regiony ma so zesylnić, štož ma so w hospodarskim planje wotbłyšćować. Srědki EU maja so na městnje zasadźić, zo móhli kraje na wuchodźe Němskeje nachwatać“, politikar CDU podšmórny. Jeli system wotewrjenych mjezow w EU njefunguje, maja narodne staty zamołwitosć za swojich wobydlerjow přewzać a wotpowědnje reagować.
Po słowach zapósłanca Haralda Baumanna-Hasskeho dyrbi EU mechanizmy wuwić, z kotrymiž móže přisłušne kraje k dodźerženju zrěčenjow nuzować.
