Podpisma za čas festiwala zběrał
Mjez dźewjeć direktnymi kandidatami za wólby zwjazkoweho sejma we wólbnym wokrjesu 156 (Budyšin I) je Tobias Faku z 29 lětami najmłódši. To jeho wot tamnych kandidatow runje tak wotzběhuje kaž jeho połne mjeno: Christoph Tobias Mzingisi Faku. Žadyn nowačk na politiskim parkeće pak syn němskeje maćerje a južnoafriskeho nana njeje. Hižo wjacore razy je wón za Hibanje za wobydlerske prawa Solidarita (BüSO) za zwjazkowy sejm a krajny sejm w Sewjerorynsko-Westfalskej kandidował.
Ćežke njewjedro w Rumunskej
Bukarest (dpa/SN). Při krótkim, ale jara ćežkim njewjedrje na zapadźe Rumunskeje je wčera znajmjeńša wosom ludźi žiwjenje přisadźiło. Ličba zranjenych leži po rozdźělnych medijowych informacijach mjez 60 do 80. Njewjedro zachadźeše wosebje w regionje Timişoara. W mnohich kónčinach njemějachu wobydlerjo žanu milinu, tež železnica njemóžeše nachwilnje jězdźić.
Snano nowu čaru wotkryli
Frankfurt nad Wódru (dpa/SN). Zwjazkowa policija je na wuchodźe Braniborskeje nakładne awto z 51 ćěkancami zadźeržała a tak po wšěm zdaću nowu čaru pašowarjow wotkryła. Na nakładnym awće, w Turkowskej přizjewjenym, nańdźechu zastojnicy 17 dźěći a 34 dorosćenych. Policija nětko pruwuje, hač jedna so wo jednotliwy pad abo hač su paralele k dalšim podawkam na mjezy k Pólskej. Hakle před dnjemi bě policija 40 irakskich migrantow w Mužakowje lepiła.
Žada sej direktne rozmołwy
Prawo narodnych mjeńšin njewobmjezować
Strasbourg (SN). Po cyłej Europje je trjeba dodźeržeć prawa mjeńšin. Tole pokazuja najnowše diskriminowace naprawy na přikład na Ukrainje, hdźež je tamniše knježerstwo kubłansku rěč na jednu wobmjezowało. „Europska unija ma mjeńšiny škitać a zaručić, zo nam prawa, kotrež mamy, preč njebjeru“, žadaše sej prezident Federalistiskeje unije europskich narodnych mjeńšin (FUEN) Loránt Vinzce w Strasbourgskim Europskim parlamenće. Delegacija FUEN bě so tam minjene dny z mjeńšinowej interskupinu Europskeho parlamenta zetkała, zo bychu so wo stawje peticiskeje kampanje Minority SafePack dorozumili. Vinzce zapósłancam rozłoži, zo su kampanju w Sedmihródskej a Słowakskej hižo zahajili, hdźež dobrowólnicy dom wot domu chodźa a trěbne podpisma zběraja. Tež w Madźarskej, Němskej a Danskej to hižo aktiwnje činja.
Dźěłaja w EU za režim Kima Jong Una
Waršawa (dpa/SN). Z njesměrnje wjele dźěłaćerjemi we wukraju financuje Sewjerna Koreja swoje dewizy. Po informacijach ameriskeho zastupnistwa pola UNO dźěła tuchwilu 100 000 Sewjerokorejčanow we wukraju a nahospodarja režimej na lěto poł miliardy dolarow. Jako je Bjezstrašnostna rada UNO tydźenja wo sankcijach přećiwo krajej diskutowała, rozjimachu tohorunja temu požčenych dźěłaćerjow ze Sewjerneje Koreje. Wobzamknjena rezolucija mjez druhim postaja, zo nimaja tući přichodnje hižo žanu dźěłowu dowolnosć za wukraj dóstać.
Tež w Europskej uniji mjenowana problematika njeznata njeje. Po słowach diplomatow EU su samo rozmyslowanja, staćanow Sewjerneje Koreje z EU wupokazać, kotřiž žanu płaćiwu dźěłowu dowolnosć nimaja. Tež w Europje nahospodarjeja Sewjerokorejčenjo statysacy eurow kóžde lěto do wulkeho hornca, z kotrehož diktator Kim Jong Un swoje raketowe a atomowe testy financuje. Po informaciji statistiskeho zarjada Eurostat měješe loni 625 staćanow Sewjerneje Koreje krajach w EU płaćiwu dźěłowu dowolnosć, 534 z nich w Pólskej.
Kajke mamy zbožo!
To a tamne (18.09.17)
Dźěle hoberskeje dule tuka, kotraž bě wopłóčkowy kanal w Londonje zatykała, chce tamniši měšćanski muzej kupić. „To by jedyn z najwurjadnišich objektow wšěch muzejowych zběrkow Londona był“, wuzběhny direktorka Sharon Ament w nowinskej zdźělence. Dula móhła wopytowarjow inspirować, zo problemy rosćacych metropolow lěpje rozrisaja.
Njewšědny pišćelowy koncert je kantor Wiesbadenskeje cyrkwje na nohi stajił. Tydźeń do wólbow zwjazkoweho sejma zaklinčachu na wčerawšim koncerće twórby pod hesłom Merkel, Lindner a Schulz. Twórby pak njejsu originalni wólbni kandidaća spisali. Kantor Hans Kielblock je za wuměłcami ze samsnym swójbnym mjenom kaž politikarjo slědźił a tajke tež našoł. Tak zaklinčachu wčera twórby Gustava Adolfa Merkela, Wolfganga Lindnera a Hermanna Schulza.
Socialny měr a kulturna diwersita
Z westfalskeho Münstera pochadźacy, po přewróće w Drježdźanach dźěłacy a wot lěta 1994 w swojej nowej domiznje jako měšćanski radźićel w Großröhrsdorfje politisce angažowany Günter Hutschalik je direktny kandidat Swobodnych wolerjow Budyskeho wólbneho wokrjesa za přichodny Zwjazkowy sejm Němskeje. Justiciar srjedźostawskeho předewzaća bě spjećowanja přećiwo wutwarej milinowětrnikoweho parka w zapadnej Łužicy dla z dalšimi iniciatiwu „Gegenwind“ wutworił a so naposledk jako „eksot w měšćanskej radźe za naše zajimy zasadźił – to bě tehdy za etablěrowane strony chětro njezwučene“. Takle rozjima wón zazběh swojeho politiskeho skutkowanja. „Wuspěch z našim spjećowanjom njemějachmy, běchmy pak sej wěsći, zo chcemy komunalny přichod wobwliwować. Mjeztym smy druhe najsylniše zastupjerstwo w radźe a tworimy z SPD zhromadnu frakciju. Na tej runinje je wěcywustojne dźěło mjez wšelakimi stronami a zjednoćenstwami móžne.
Zaměry budu dodźeržane
Berlin (dpa/SN). Zwjazkowa kanclerka Angela Merkel (CDU) je w telewiznej debaće wčera wječor přilubiła, zo Němska swoje klimoškitne zaměry hač do lěta 2020 dodźerži. Na prašenje přitomneje prěnjowolerki, čehodla nochce Němska wudobywanje brunicy prjedy zakónčić, kanclerka wotmołwi, zo njeje to hač do lěta 2020 trjeba. Za ludźi, kotřiž na přikład we łužiskich milinarnjach dźěłaja, dyrbja najprjedy alternatiwy nańć.
Znowa raketu třělili
Seoul (dpa/SN). Najebać sankcije UNO njedawneho atomoweho testa dla je Sewjerna Koreja znowa raketu do směra na Japansku třěliła, kotraž je kraj přelećała a na to do Pacifiskeho oceana zrazyła. Tole zdźěli dźensa generalny stab Južneje Koreje w Seoulu. Bjezstrašnostna rada UNO chce hišće dźensa nuzowe posedźenje zwołać a so z najnowšim raketowym testom rozestajeć. USA, Japanska a Južna Koreja wumjetuja knježerstwu w Pjönjangu dalšu prowokaciju a wohroženje.
SPD dalšu nižinu docpěła
Mjeńšinu w Braniborskej lěpje škitać
Podstupim (SN). Wjetšina Braniborskeho krajneho sejma chce so za lěpši škit Sintow a Romow zasadźeć. Krajne knježerstwo měło mjez druhim dojednanje z jich krajnym zjednoćenstwom wobzamknyć, rěka w próstwje pod nadpismom „Dopominać a přećiwo diskriminaciji jednać“ SPD, Lěwicy a Zelenych, kotruž běchu wutoru w krajnym sejmje zhromadnje předpołožili. Tak žadaja sej prawidłownu wuměnu myslow mjez zastupnistwom mjeńšiny a krajnej politiku. W šulach a na dalekubłanjach, na přikład sobudźěłaćerjow zarjadow, měli Braniborčanam zbližić stawizny a tuchwilne połoženje Sintow a Romow. Politika a ciwilna towaršnosć dyrbjałoj přećiwo rasistiskim wukročenjam jednać.
Migrantow w Mužakowje lepili
Zhorjelc (dpa/SN). 40 po wšěm zdaću přez hranicu pašowanych Irakčanow je zwjazkowa policija zawčerawšim w Mužakowje lepiła. Pokiw dóstała je wot Běłowodźanskeje policije, na kotruž su so wjacori wobydlerjo wobroćili, zo běchu wulku skupinu cuzych ludźi widźeli.
Kaž migranća rozprawjachu, běchu jich pašowarjo z nakładnym awtom z Turkowskeje do pólskeje Łęknicy dowjezli. Tam so w nocy na srjedu wotsalichu. Migranća podachu so na to pěši do Němskeje, zdźěla zwjazkowa policija z Ludwigsdorfa. Po wšěm zdaću jedna so pola Irakčanow wo wulkoswójbu. Mužojo, žony a dźěći su w dobrym strowotniskim stawje. Zastojnicy přepruwuja nětko jich dokładnu identitu.
