To a tamne (10.09.19)
Sobujěduceho na parkowanišću zabyła je pućowanska skupina na dompuću do Pólskeje 70 kilometrow južnje Podstupima při awtodróze A 9. Kaž policija zdźěla, njemóžeše 31lětny bus telefonisce wjace docpěć a na so skedźbnić, dokelž bě baterija mobilneho telefona wučerpana. Pomocliwy pěšk wołaše tuž policiju, kotraž muža z parkowanišća Hagen West do Michendorfa dowjeze. Tam namaka wón krajana, kiž jeho ze swojim wosobowym awtom do směra na Pólsku sobu wza.
Chětro zahe wo hodownu dekoraciju starali su so paduši w Plauenje. Woni zadobychu so do zamknjeneje pincy wjaceswójbneho domu. Namócnje wotewrěchu jednu z pinčnych boksow a wzachu tři kartony sobu. W nich bě bjez wuwzaća swjedźenska dekoracija za hodowny čas. Cyłkowna hódnota: 200 eurow.
Bamž přećiwo wumjezowanju
Antananarivo (dpa/SN). Po tym zo bě bamž Franciskus Mosambik a Madagaskar wopytał, poda so swjaty wótc dźensa na kupu Mauritius, poslednju staciju swojeho wopyta w Africe. Lud kupy je přez zetkawanje wšelakich ludow nastał a čerpa z bohatosće wšelakich kulturow a nabožinow, bě nawoda swětoweje katolskeje cyrkwje we widejowym poselstwje rjekł. Wčera je wón na Božej mši w Madagaskaru před wumjezowanjom druhich nabožinow warnował.
Namołwjataj k mjezsobnosći
Johnsonej hrozy dalša poražka
London (dpa/SN). Britiskemu premierministrej Borisej Johnsonej hrozy dźensa dalša poražka w delnjej komorje britiskeho parlamenta. Knježerstwowy šef chce, zo parlament za 15. oktober nowowólby wobzamknje. Opozicija je hižo připowědźiła, zo njebudźe tomu přihłosować. Za nowowólby trjeba Johnson hłosy dweju třećinow zapósłancow. Wulku Britanisku chce wón 31. oktobra z Europskeje unije wjesć, wšojedne hač na rjadowane abo dospołnje njerjadowane wašnje.
Putin a Macron telefonowałoj
Moskwa (dpa/SN). Dźeń po dotal njesłyšanej wuměnje jatych mjez Moskwu a Kijewom staj ruski prezident Wladimir Putin a francoski prezident Emmanuel Macron dalše měrowe jednanja na wuchodźe Ukrainy wobrěčałoj. Tajke zetkanje měło dokładnje přihotowane być. Toho běštaj sej wobaj přezjednaj, kaž je Putin po telefonaće z Macronom medijam zdźělił. Po lětach konfrontacije běštej Ruska a Ukraina wčera 35 jatych wobeju bokow wuměniłoj.
Rozsudźa wo knježerstwje
Hnujace sceny dožiwili su sobotu na lětanišću Borispol njedaloko ...
Europska rada: Mjeńšiny hišće bóle podpěrać
Strasbourg (SN). Poradźowanski wuběrk Wobłukoweho zrěčenja wo škiće narodnych mjeńšin Europskeje rady je aktualne stejišća narodnych mjeńšin w Georgiskej a Nižozemskej wozjewił.
Minjene tři lěta je Georgiska prawniske móžnosće nastupajo škit narodnych mjeńšin dale zesylniła, widźomnje so za to zasadźejo, wšelakorosć spěchować. Přiwšěm je analyza datow trěbna, hač su naprawy we wobłuku spěchowanja rěče w kubłanju a w zwisku z jeje wužiwanjom na zarjadach skutkowne dosć. Runje tak měło so přepytować, kak georgiska towaršnosć na mjeńšinowe prašenja scyła reaguje a hač su tam populistiske rozestajenja.
Strona Krjemla so přesadźiła
Moskwa (dpa/SN). Při regionalnych wólbach w Ruskej je w Krjemlu knježaca strona po informacijach wólbneho nawodnistwa w najwjace regionach wjetšinu mandatow zakitować móhła. Po tym zo běchu do wólbow dźesatki opoziciskich kandidatow z wólbow wuzamknyli, je sej knježaca strona Zjednoćena Ruska w Moskowskej měšćanskej radźe 25 z cyłkownje 45 sydłow wuwojowała, kaž powěsćernja Interfax rozprawja. W Moskwje běchu prominentni opozicionelni, kotrychž běchu z wólbow wuzamknyli, ludźi k „smartnemu wothłosowanju“ namołwjeli. Wobydlerjo móhli wšitke strony wolić, jenož nic kandidatow Krjemloweje strony.
Při wólbach guwernerow su so zastupnicy Krjemla we wšitkich regionach přesadźili. Naprašowanja běchu Krjemlowej stronje njespokojnosće ludźi hospodarskeho połoženja dla masiwne straty wěšćili. W Chabarowskej kónčinje nad Pacifikom docpě wona runje 12,5 procentow. Wólbne wobdźělenje bě jara słabe, w Moskwje runje 21,63 procentow.
Bliscy a derje docpějomni być
Zhorjelski wokrjes zarjaduje přichodnje wobydlerske běrowy
Zhorjelc (AK/SN). Z cyłkownje 28 projektami chce Zhorjelski wokrjes přichodnje ludźom přichileniši a transparentniši być. Na to měri so nowy program „Zarjadnistwo 4.0“. Decentralne wobydlerske běrowy zmóžnjeja krótke puće a dobry serwis, rozłoži komornik Thomas Gampe minjeny pjatk w Zhorjelcu. Běrowy maja w Lubiju, Běłej Wodźe, Niskej a Žitawje nastać. Hłowny zaměr je, zo njetrjeba žadyn wobydler přichodnje dale hač 20 kilometrow jěć, zo móhł posłužby zarjadnistwa wužiwać.
W prěnim kwartalu 2020 chcedźa wobydlerski běrow w Lubiju wotewrěć. W třećim abo štwórtym kwartalu ma běrow w Běłej Wodźe slědować. Stej to prěnjej pilotowej projektaj toho razu.
To a tamne (09.09.19)
Mašina za zhotowjenje popcorna je we Wuchodnej Friziskej zasadźenje wohnjoweje wobory zawiniła. Nastroj běchu na dnju wotewrjenych duri wužiwali. Awtomatiski sensor za kur direktnje nad nim pak wołaše wohnjowu woboru. Kameradow wotškódnichu z jědźu, napojemi a popcornom. Nimo toho jim wobswědčichu, zo běchu atrakcija swjedźenja.
Skradźu na měsačk sobu wzaty list misije Apollo 15 su w Hamburgu za 11 000 eurow přesadźowali. Anonymny kupc bě z Azije. Astronawća David Scott, James Irwin a Alfred Worden běchu 1971 bjez dowolnosće zamołwitych dźesatki listow skradźu sobu do swětnišća wzali a sej to zapłaćić dali. Němsko-ameriski překupc bě akciju swój čas organizował a listy po misiji předewzaću listowych znamkow w Badensko-Württembergskej dale předawał. Mjenowani astronawća pak njesmědźachu wjace do swětnišća lećeć.
Wutwarja mobilnu syć
Berlin (dpa/SN). Z přidatnym wutwarom mobilneje syće profituja přichodnje wužiwarjo handyjow wosebje we wjesnych kónčinach. Zwjazk je wotpowědne zrěčenje z předewzaćemi Telekom, Vodafone, Telefónica a 1&1 Drillisch wotzamknył. Tež zwjazkowy minister za wobchad Andreas Scheuer (CSU) rěči wo ofensiwje. Loni w lěću su so předewzaća a Zwjazk na wutwar dojednali. Hač do kónca lěta 2021 ma tuž 99 procentow domjacnosćow w Němskej spěšny mobilny zwisk k dispoziciji měć. Wotpowědne dojednanje bu wčera podpisane.
Zrudźacy rekord wozjewili
Wiesbaden (dpa/SN). Młodźinske zarjady w Němskej wozjewjeja zrudźacy rekord. Loni su pola něhdźe 50 400 dźěći a młodostnych zwěsćili, zo je jich derjeměće wohrožene. To zdźěla Zwjazkowy statistiski zarjad we Wiesbadenje, kotryž wot lěta 2012 statistiku zestaja. Loni běchu młodźinske zarjady 24 900 padow jako akutne zastopnjowali, štož bě 15 procentow wjace hač lěto do toho. W dalšich 25 500 padach njebě wohroženje wuzamknjene. W 53 000 padach zwěsćichu, zo njejsu dźěći wohrožene, swójby pak přiwšěm podpěru trjebaja.
Merkel žada sej kónc namocy
