Charlottesville (dpa/K/SN). Njewšědne namócnosće, kotrež běchu sobotu w měsće Charlottesvillu (stat Virginia) wudyrili a sej jedyn smjertny wopor a 19 zranjenych žadali, jako prawicarski ekstremist z awtom wotpohladnje do skupiny přećiwnych demonstrantow zajědźe, nawodnych politikarjow USA runjewon wužaduja. Prezident Donald Trump dóstawa raznu kritiku demokratow, ale tež mnohich prominentnych republikanow, dokelž njeje rasistow a prawicarskich ekstremistow z mjenom mjenował a město toho powšitkownje „mnohe strony“ namocy winował. Běły dom wšak Trumpowe wuprajenje zakituje, je dźě wón „wo neonacijach, nacionalistach a wšitkich ekstremistiskich zeskupjenjach rěčał“.

Berlin (dpa/K/SN). Kandidat SPD na kanclerstwo Martin Schulz wustupuje šěsć njedźel do wólbow zwjazkoweho sejma jako wěsty dobyćer, najebać snadnu akceptancu we woprašowanjach. W lěćnym interviewje ZDF wčera wječor wón rjekny: „Ja budu kancler.“ Dobyće njeby jeho překwapiło, hač do 24. septembra je hišće šěsć njedźel wólbneho boja. „Nimam tež ničo přećiwo wulkej koaliciji pod mojim nawodom“, Schulz doda. „Jeli chcyła CDU jako juniorski partner do njeje zastupić, tak ma sej to přemyslić.“ Předsydka frakcije Zelenych Katrin Göring-Eckardt ma wulku koali­ciju „za stagnaciju“.

Rom (dpa/SN). Wěstotnych rizikow w Srjedźnym morju před pobrjohom Libyskeje dla su wjacore pomocne organizacije swoju misiju, wuchować migrantow, přetorhnyli. Jedyn dźeń po wotpowědnym připowědźenju organizacije Lěkarjo bjez mjezow přizamknyštej so wčera tež organizaciji Sea Eye a Save the Children. „Hłowna přičina je změnjene wěstotne połoženje w zapadnym dźělu Srjedźneho morja“, zdźěli Regensburgska Sea Eye.

Drohe sportowe awto zešrotował je muž na probowej jězbje minjeny pjatk w Załomju. 46lětny bě so z 510 PSsow sylnym wozom typa Alfa Romeo na mokrej dróze suwać započał, do wjacorych štomow zrazył a skónčnje na ležownosći stejo wostał. Šofer a sobu jěducej wosobje wostachu njezranjeni. Policija pak trochuje wěcnu škodu na 70 000 eurow. Telko awto hižo w swojim zakładnym wuhotowanju płaći.

Štyrilětny pachoł je swoju mać a jeje znatu w Göppingenje z bydlenja na balkon wuzamknył a so na to spać lehnył. Jako wonej něšto pozdźišo pytny­štej, zo su durje zawrjene, hólčk hižo hłuboko a kruće spaše. Žonje zawołaštej tuž policiju. Po tym zo su zastojnicy na to podarmo při durjach bydlenja klinkali, dyrbješe wohnjowa wobora zamk durjow namócnje wułamać.