Socialdemokraća w Danskej dobyli
Kopenhagen (dpa/SN). Změna knježerstwa w Danskej: Socialdemokraća su wólby danskeho parlamenta dobyli a tak w Němskej a druhdźe ćežko w krizy tčacej stronje rědki wuspěch wobradźili. Strona ze swojej předsydku Mette Frederiksen je sej po dotalnym hamtskim kónčnym wuslědku nimale 26 procentow wolerskich hłosow wuwojowała. Najebać dobry wuslědk liberalneje strony ministerskeho prezidenta Larsa Rasmussena steji Danska nětko před změnu knježerstwa.
Najwjetši přěhračk wólbow je Danska ludowa strona. Prawicarscy populisća poćerpjechu z runje hišće 8,7 procentami raznu wólbnu poražku. Z wólbow parlamenta 2015 běchu woni hišće z 21,1 procentom hłosow wušli. Tež při wólbach Europskeho parlamenta běchu přisadźili.
„To je historiske dobyće“, rjekny přichodna ministerska prezidentka Mette Frederiksen minjenu nóc swojim přiwisnikam. Wuslědk wólbow dopokazuje, zo sej Danojo nowe knježerstwo a nowe politiske wusměrjenje přeja.
Skandal ma konsekwency
Wukubłanje a strategiju sakskeje policije chcedźa zasadnje změnić
Drježdźany/Rózbork (UM/SN). Wukubłanje a dalekubłanje sakskeje policije chcedźa zasadnje změnić. To je konsekwenca přepytowanja, kotrež bě sakski nutřkowny minister Roland Wöller (CDU) po pruwowanskim skandalu na Rózborskej wyšej policajskej šuli wukazał. Nazymu 2018 bě jedyn z docentow wysokeje šule studowacym pruwowanske nadawki do pruwowanja spřistupnił. Na to zasadźi minister komisiju, kotraž měješe organizaciju a strukturu wukubłanja sakskeje policije přepytować. „Při tym dźěše wo wjace hač jenož wo pruwowanja“, rjekny Wöller minjenu póndźelu, jako kónčnu rozprawu komisije přednjese. „Policajska wyša šula ze swojimaj kubłanišćomaj w Rózborku a Budyšinje je wot nawodnistwa sakskeje policije daloko zdalena a čuje so častodosć kaž ‚pjate koleso‘“, komisija zwěsći. Jako wotpowědnje snadne hódnoća přistajeni připóznaće, kotrež za swoje dźěło žněja. „To ma so změnić, kubłanje dyrbi zaso bóle w srjedźišću stać.“
Hladarjo protestowali
Lipsk (dpa/SN). Sta sobudźěłaćerjow chorownjow a starownjow su wčera składnostnje konferency strowotniskich ministrow w Lipsku za lěpše dźěłowe wuměnjenja demonstrowali. Woni žadachu sej po wšej Němskej płaćiwe tarifowe zrěčenje za hladarjow starych ludźi a zakonsce postajeny personalny kluč w strowotniskich powołanjach. Tak hodźało so něšto přećiwo njedostatkej personala činić. „A štó hlada nas?“, steješe na jednym z transparentow.
Nastork protestow je dwudnjowska konferenca strowotniskich ministrow zwjazkowych krajow, kotruž su wčera w Lipsku zahajili. Sakska konferencu strowotniskich ministrow lětsa nawjeduje. Na zarjadowanju we wobłuku konferency staj strowotniski minster Jens Spahn a sakska ministerka za strowotnistwo Barbara Klepsch (wobaj CDU) z protestowacymi rěčałoj. Ministrojo su na konferency tež wo digitalizaciji w strowotnistwje a wo tak mjenowanej telemedicinje rěčeli. Rozjimali su tohorunja hygienu w chorownjach, winowatosć so šćěpić dać a zawjazowace rjadowanja w zwisku z darowanjom organow.
To a tamne (06.06.19)
Z ryzy wostudy je pjećlětna ze zahrody staršeju ćeknyła a ze železnicu wotjěła. Lokomotiwnik wobkedźbowaše, kak holčka w Postbauer-Heng do ćaha zalěze, a informowaše policistow, kotrajž w samsnym ćahu na słužbu do Nürnberga jědźeštaj. Jimaj holca powědaše, zo bě so jej doma wostudźiło a zo chcyše zaso wróćo do pěstowarnje jěć. Na policajskej straži staršej swoju dźowku wotewzaštaj.
Granatu namakała a sobu domoj wzała je 32lětna žona w hornjopfalcskim Kemnathu. Žona bě so při joggowanju namakanki dohladała a ju sobu wzała, njewědźo, što to poprawom je. Dokelž chcyše sudobjo jako dekoraciju wužiwać, je samo wobarbi. Po rešeršach pak zwěsći, zo jedna so wo granatu. Policija namakanku wotewza, kotraž wšak wukopa so na zbožo jako njestrašna atrapa.
Přećiwo brojenju žiwidłow
Lübeck (dpa/SN). Justicni ministrojo zwjazkowych krajow su dźensa w Lübe-cku wuradźowali. Při tym dźěše wo zdźěla jara łoskoćiwe temy. Wotsunjenje kriminelnych ćěkancow steješe runje tak na dnjowym porjedźe kaž žadanja za wyšimi chłostanjemi po nadpadach z nožom. Hamburg zapoda próstwu, po kotrejž měło přichodnje dowolene być preč ćisnjene žiwidła z wotpadkowych kontejnerow kupnicow zezběrać, štož je dotal zakazane. Wuslědki chcedźa jutře zjawnosći předstajić.
Italska we wizěrje EU
Brüssel (dpa/SN). Komisija EU je dźensa hospodarske wuwiće jednotliwych krajow analyzowała, wěnujo so předewšěm Italskej. Kraj je jedyn z najbóle zadołženych swěta. Kónc lěta 2018 wučinješe dołh 2,3 biliony eurow, štož wotpowěduje 132 procentam nutřkokrajneho bruttoprodukta. Dowolene je w europasmje najwjace 60 procentow. Italska, třeće najwjetše ludowe hospodarstwo Europy, dyrbi tuž z chłostanjom EU ličić.
Danojo wola parlament
Z wulkej wojerskej ceremoniju su dźensa na južnym pobrjohu ...
Mike Bischoff: Njedamyso znjeměrnić
Podstupim (dpa/SN). Nawoda frakcije SPD w Braniborskim krajnym sejmje Mike Bischoff je přećiwo nowowólbam na zwjazkowej runinje, hladajo tež na wólby krajneho sejma lětsa nazymu. „Nimam přechwatne rozsudy za dobre“, rjekny wón wčera w Podstupimje. „Koalicija ma jenož potom eksistencne prawo, hdyž so za zhromadne zaměry zasadźa a wobsahi zwoprawdźa. Tajke zhromadne zaměry a temy hišće mamy.“ Štóž sej hnydomne rozpušćenje wulkeje koalicije w Berlinje žada, „dyrbjał wobmyslić, zo stejimy w Braniborskej před zasadnymi rozsudami“. Bischoff skedźbni mjez druhim na planowany kónc wudobywanja brunicy. Młodźi socialdemokraća běchu sej póndźelu žadali, wulku koaliciju na zwjazkowej runinje „ručež móžno“ skónčić.
Hladajo na wólby krajneho sejma 1. septembra je Mike Bischoff najebać krizu SPD w Zwjazku optimistiski. „Njedamy so wot tajkich wuslědkow znjeměrnić.“ Wón je sej wěsty, zo móža wolerjo w Braniborskej krajnu a zwjazkowu politiku rozeznawać. Na europskich a komunalnych wólbach 26. meje bě braniborska SPD jasne straty poćerpjeła.
Dobrindt za swójski rukopis
CDU/CSU chcyła z dokumentom energijopolitiski profil wótřić
Berlin (dpa/SN). Předsyda krajneje skupiny CSU w zwjazkowym sejmje Alexander Dobrindt ma za wopačne, wažne politiske temy kaž kónc zmilinjenja brunicy ryzy fachowemu gremijej přewostajić. Hladajo na dźěło wuhloweje komisije je wón wčera w Berlinje kritizował, zo so tajka wažna tema ze zjawneje debaty prosće zhubi, hdyž politiske rozsudy na te wašnje do gremija ekspertow „wurisaja“. Ludnosć na te wašnje pozdatnje prawe politiske rozsudy hižo na wědomje njebjerje. „To płaći ćim bóle za skónčenje wudobywanja brunicy.“ Dobrindt sej žada, zo přichodnje wjace rozsudow w parlamentach a w politice rozjimaja.
Je-li tema změny klimy za wolerjow rozsudna a maja-li ju na lisćinje temow cyle horjeka, dyrbjeli so politikarjo z njej rozestajeć. Dyrbjał-li so w tutej komunikaciji problem mjez posrědkowarjom a přijimarjom informacije pokazać, su zamołwići wočiwidnje wopačny medij wužiwali, Dobrindt doda.
