Wola Puigdemonta přiwšěm?
Barcelona (dpa/SN). Tři strony, kotrež so za njewotwisnosć Katalonskeje zasadźeja, schadźowachu so dźensa dopołdnja na wurjadnym posedźenju parlamenta. Wuradźować chcychu wo wosebitej próstwje, po kotrejž móhli bywšeho šefa regionalneho knježerstwa Carlesa Puigdemonta bjez jeho přitomnosće tola hišće za prezidenta wolić. Puigdemont sedźi dale w němskim jastwje. Wottam wón zdźěli, zo wostanje njewotwisnosć Katalonskeje wot Španiskeje jeho zaměr. Mjeztym přiwisnicy Puigdemonta w španiskim regionje dale přećiwo jeho zajeću protestuja.
Překwapjacy wopyt w Chinje
Peking (dpa/SN). Sewjerokorejski mócnar Kim Jong-un je wčera wopytał chinsku stolicu Peking, hdźež zetka so z tamnišim statnym šefom Xijom Jinpingom. Tema bě konflikt wokoło programa atomowych bróni a raketow Sewjerneje Koreje. Kaž Kim wobkrući, je wón pod wěstymi wuměnjenjemi zwólniwy program zakónčić. Zdobom chce so na wjeršku z južnokorejskim prezidentom Moonom Jae-inom a prezidentom USA Donaldom Trumpom zetkać. Termin njeje hišće jasny.
Heil na debatu přihotowany
Z něhdźe 4 000 macoškami zwosadźeja zahrodnicy zhromadnje z ...
To a tamne (28.03.18)
Njesměrne zbožo měła je Paris Hilton. Před dnjemi bě wona swój dwaj milionaj eurow drohi pjeršćeń při rejwanju zhubiła. Hektisce su slubjeny Chris Zylka, wěstotni zastojnicy a hosćo w Los-Angeleskim nócnym klubje za nim pytali. Skónčnje jón Zylka w sudobju z lodom nańdźe. Po wšěm zdaću bě 20karatowy ćežki diamant rejwarce z ruki zlećał. Hač drje by jón cuzy namakar wróćił?
Pčołki su wuspěšny wobchodniski model. Tak přenajimaja předewzaća wokoło města Bremena cyłe ludy. Ideja pčolaceho sharinga je, pčołarjam a ratarjam pomhać. Pčołarstwo nima hižo telko financielneho powabka, ratarjo pak trjebaja pčołki za popróšenje. Hdyž rostliny kćěja, dochadźa často k wuskosćam, dokelž njeje dosć pčołkow. Trěbne pčolace ludy móža sej zajimcy nětko wotnajeć.
Přećiwo rěčnemu wusmužej
Klub wuchowarjow rěče jubilejne zarjadowanje wotměł
Budyšin (CS/SN). Hladajo na 20lětne wobstaće je sej klub wuchowarjow rěče Budyšin-Hornja Łužica wysokorjadnych hosći z politiki do Budyskeho Dźiwadła na hrodźe přeprosył, zo bychu wo temje „rěč po wólbje – wólba rěče“ diskutowali. Šěroko sahacy wobłuk to, wo kotrymž móžachu wobdźělnicy z moderatorom, intendantom Němsko-Serbskeho ludoweho dźiwadła Lutzom Hillmannom rěčeć.
Mjeztym zo njeje strona FDP žanoho zastupjerja na zarjadowanje pósłała, běchu zapósłanc zwjazkoweho sejma Karsten Hilse (AfD), bywši zapósłanc krajneho sejma Peter Porsch (Lěwica), Budyski wyši měšćanosta Alexander Ahrens (SPD) a zapósłancaj Sakskeho krajneho sejma Franziska Schubert (Zeleni) a Marko Šiman (CDU) přišli.
Wuradźuja wo naprawach
Moskwa (dpa/SN). Po wupokazanju diplomatow z wjacorych krajow EU, mjez nimi Němskeje, USA a dalšich statow wuradźuja w Moskwje wo přećiwnych naprawach. Wonkowne ministerstwo přihotuje hižo dalše kročele, zdźěli šef Krjemla Dmitrij Pjeskow. Hdy je wobzamknu, njeje jasne. Doskónčnje rozsudźić ma prezident Wladimir Putin. Naprawy płaća za wšitke kraje, kotrež ruskich diplomatow wupokazuja, zdźěli rěčnica wonkowneho ministerstwa Marija Zacharowa.
Zaměr wostanje přistup k EU
Warna (dpa/SN). Po wjerškowym zetkanju Europskeje unije z turkowskim statnym prezidentom Recepom Tayyipom Erdoğanom je přichod dwělomneho přistupa Turkowskeje k EU dale njejasny. Wobě stronje njejstej so hladajo na mjezsobne konflikty dojednałoj, rěka wuslědk zetkanja wčera wječor w bołharskim měsće Warnje. Polěpšić měł so na přikład turkowski poćah k Grjekskej a Cypernej. Zaměr Turkowskeje wostanje přistup k EU, Erdoğan podšmórny.
Wobmyslenja dale wobsteja
Woidke wostanje społnomócnjeny Zwjazka
Podstupim/Frankfurt nad Wódru (RD/SN). Braniborski ministerski prezident Dietmar Woidke skutkuje tež za nowe zwjazkowe knježerstwo jako koordinator za němsko-pólske zhromadne dźěło. Politikar SPD njedźelu rjekny, zo je wospjetny poskitk zwjazkoweho wonkowneho ministra Heika Maasa (SPD) „jara rady přiwzał“. Po słowach Woidki „mamy styki blisko hranicy hajić. Tam so tójšto stawa, za to sym kóždemu jednotliwcej jara dźakowny, kiž so w małym abo we wulkim angažuje.“ Kaž Woidke rozłoži, „mamy z pólskim knježerstwom we Waršawje dobry a konstruktiwny dialog pěstować“. Tohodla wón wuraznje wita, zo staj zwjazkowa kanclerka Angela Merkel (CDU) a wonkowny minister Maas swojej prěnjej jězbje do wukraja krótko po wutworjenju knježerstwa do Francoskeje a Pólskeje wotměłoj.
Puigdemonta Španiskej njepřepodać
Schleswig/Neumünster (SN). Pad w Němskej zajateho bywšeho katalanskeho regionalneho prezidenta Carlesa Puigdemonta budźe justicu w Němskej dlěje zaběrać. 55lětny wostanje dale zajaty, rozsudźi wčera wječor hamtske sudnistwo w Neumünsteru. Sudniski přikaz, Puigdemonta hišće tónle tydźeń Španiskej přepodać, je njepředstajomny.
Mjeztym je so tež Federalistiska unija narodnych mjeńšin (FUEN) k padej wuprajiła, namołwjejo španiske kaž katalanske knježerstwo k dialogej. Chłostanske přepytowanje njeby institucionelnu krizu rozrisało, ale hišće wjac wolija do wohenja lało. Němska měła w europskim zajimje jednać a jednanja wobeńć, kotrež wjedu k dalšej konfrontaciji. Tohodla njeměła Puigdemonta Španiskej přepodać, prezident FUEN Loránt Vincze jasnje zwurazni.
„Europa měła zwólniwa być, w tak łoskoćiwych situacijach wotmołwy dać. Wot wšeho spočatka smy rjekli, zo dyrbi Europa nastupajo katalansku krizu mjez Barcelonu a Madridom posrědkować. Brüssel měł wobě stronje za jednanske blido dóstać.“
To a tamne (27.03.18)
„Muski Cinderella“ bě policiji minjeny pjatk w Połčnicy twochnył. Njeznateho z jenož hišće jednym črijom nětko pytaja. Muž bě w kupnicy 27 titkow worješkow družiny Macadamia spakosćił. Jako chcyše jeho filialny nawoda zadźeržeć, njeznaty twochny. Zhubił pak je po puću črij a wjacore titki z worješkow. Tež w Kamjencu je policija paducha lepiła. Wón smědźeše jej dźesać taflow šokolody přepodać a dósta za to chłostanje.
Poprawom měł sobujěducych w ćahu zastarać, město toho pak je so sobudźěłaćer Němskeje železnicy sam posłužował. Natutkany bě pasažěram njedawno w ćahu z Basela do Berlina napadnył. Tuž so hóršachu. Šef ćaha sobudźěłaćerja bistra tuž prošeše na zastanišću w Braunschweigu wulězć, hdźež policisća hižo na njeho čakachu. K jědźi a piću tuž hač do Berlina ničo njedawaše.
Ruce preč wot „Króny“
Diskusija wo Budyskej měšćanskej hali dale a emocionalniša
Budyšin (CS/SN). Zajim na diskusiji wo přichodźe Budyskeje měšćanskeje hale „Króna“ je jara wulki. To pokaza ličba wobdźělnikow, kotřiž běchu minjeny štwórk přeprošenje strony SPD sćěhowali a do Serbskeho domu přišli. Financny měšćanosta Robert Böhmer (CDU) rysowaše swój wid. Hladajo na kup twarskeho kompleksa přez město je wón chětro skeptiski a warnowaše tuž před njej. Prjedy hač bě so Böhmer słowa jimał, bě šef SPD za město Budyšin a wokolinu dr. Měrćin Krawc swoju poziciju rysował. Po jeho słowach měła so měšćanska towaršnosć do rozsuda zapřijeć. Naposledk pak dyrbja měšćanscy radźićeljo rozsudźić.
Moderny pasion
Lipsk (B/SN). „Hdźež maš ty prawje ...“ rěka moderny pasion, kotryž su Lipšćanscy młodostni sobotu w ewangelskej měrowej młodźinskej cyrkwi w Gohlisu wuspěšnje předstajili. Spisana wot Grit Markert zwjazuje hra aktualne žiwjenske situacije z ćerpjenjom Jězusa.
Starosć wo wěriwych wažna
Vatikan (B/SN). W minjenym tydźenju zetka so Rada kardinalow, kotraž bamža Franciskusa při reformach poradźuje. Wuslědk bě, zo měł so Vatikan bóle wo jednorych wěriwych a wo jich wšědne starosće starać. Franciskus bě do toho w lisće pisał, zo so wo elitu lajkow angažowanych staraja, ale na tamnych bohužel zabywaja.
Festiwal k zničenju Israela
