Dalšich jědnaće kandidatow
Ličba namjetowanych kandidatow z Delnjeje Łužicy za wólby Serbskeho sejma přiběra. Po towarstwje Pónaschemu je minjeny kónc tydźenja dalši cyłk, Łužiska alianca, nominowansku zhromadźiznu wotměł a jědnaće swójskich namjetow wobzamknył.
Huštań (SN/at). Z namjetowanych kandidatow nastupja dźesaćo w Delnjej Łužicy, jedyn w Hornjej Łužicy, informuje předsyda Łužiskeje aliancy Hanzo Wylem-Kel. Tři wosoby su ze srjedźneje Łužicy. „Podamy tak njepřewidźomne regionalnopolitiske znamjo w zmysle bazoweje demokratije a regionalneho samopostajowanja.“ Přewšo zwjeselace je z wida Łužiskeje aliancy aktiwne sobuskutkowanje mnohich Łužičanow. Předsyda skedźbni „na dóšłe dalše přeća wo kandidaturu, kotrež snano z dodatnej nominowanskej zhromadźiznu wobkedźbujemy“.
Wizije za „2030+“
Budyšin (SN/bn). Towarstwo Partnerstwo za demokratiju (PFD) je wčera w Budyšinje na hłownej žurli krajnoradneho zarjada konferencu „Budyska dźěłarnja za přichod“ wuhotowało. Zastupjerjo zjednoćenstwow, drustwow, wobydlerskich iniciatiwow, policije a měšćanskeje rady diskutowachu za třomi ćežišćowymi blidami wo stawje a perspektiwach sprjewineho města a wokoliny.
Prěni kružk wěnowaše so prašenju, hač a w kotrej měrje je wobdźělenje na towaršnostnym žiwjenju w Budyšinje zaručene. Kaž debata wujewi, drje je poskitk wulki, zajim na nim pak skerje snadny. Měło so přepytować, hač zaleži to na wopačnym wusměrjenju poskitkow abo na njedosahacym wašnju komunikacije. Za druhim blidom pytachu pod hesłom „kooperacija“ bjez konkretneho wuslědka za móžnosćemi, towarstwa a předewzaćelow lěpje ze sobu zwjazać. Třeće, njekontrowersne ćežišćo bě wažnosć čestnohamtskeho skutkowanja za towaršnostnu zhromadnosć.
Poražka za Trumpa
New York (dpa/SN). Mustwo prezidenta USA Donalda Trumpa je ćežku poražku poćerpjeło. Něhdyšeho wólbnobojoweho managera Paula Manforda je sudnistwo dawkoweho jebanstwa a wobšudnistwa dla wobwinowało. Nimo toho je wjelelětny prawiznik Trumpa Michael Cohen přiznał, zo je zakoń wo financowanju wólbneho boja ranił. Woběmaj hrozy wjelelětne jastwo. Politiska škoda za Trumpa njeje hišće wotwidźomna.
Zwjazk: Mizerabelne žně žita
Berlin (dpa/SN). Suchoty dla su ratarjo w mnohich kónčinach Němskeje lětsa wjele mjenje nažnjeli. Pola žita je to z 35,6 milionami tonow 22 procentow mjenje hač loni, kaž Zwjazk ratarjow dźensa na swojej žnjowej bilancy w Berlinje zdźěli. K tomu přińdu wulke škody předewšěm při plahowanju picy za skót. W někotrych regionach dyrbjachu straty mjez 50 procentami a totalnym wupadom registrować. Prezident zwjazka Joachim Rukwied žada sej tuž nuznje trěbny pomocny program Zwjazka a krajow na dobro ratarjow.
Digitalna rada zasadźena
W Ruskej swjeća dźensa swjatk narodneje chorhoje. Byrnjež ...
Přepytowanje: Spěšny kónc brunicy móžny
Berlin (dpa/SN). Přirodoškitna organizacija WWF wupraja so za spěšny kónc zmilinjenja brunicy. Socialnje znjesliwy kónc je móžny, Němska móhła tak swoju klimowu bilancu a kmanosć wubědźowanja jasnje polěpšić. Tele wuprajenje wuchadźa ze studije w nadawku WWF a poskićowarja ekomiliny Lichtblick, kotraž powěsćerni dpa předleži. Brunicowa industrija ze swojimi subwencijemi a lěpšinami je přirunujo ze spochi tuńšimi wobnowjomnymi energijemi hospodarsce dźeń a wjetše riziko.
Komisija zwjazkoweho knježerstwa, kotraž skónčenje zmilinjenja brunicy rozjimuje, chce so znowa schadźować. Hač do kónca lěta ma wona koncept zdźěłać, kak ma so wudobywanje brunicy skónčić. Zdobom ma namjety předpołožić, kak ma so strukturna změna we łužiskej a porynskej kónčinje financować a zwoprawdźić.
Njemóžny nadawk
Liči kruće z talibanami
To a tamne (22.08.18)
Pod mostom tčace nakładne awto je policija we wuchodowestfalskim měsće Bünde wuswobodźiła. Šofer drje njebě wobkedźbował, zo je móst za awto přeniski. Zastojnicy organizowachu njeběrokratisku pomoc: Woni pušćichu powětr z wobručow a prošachu pěškow, zo bychu na Lkw zalězli. Něhdźe dźesać ludźi skónčnje dosahaše, zo móžeše šofer pomału dozady pod mostom wujěć. Kelko škody je nastało, policija w swojej rozprawje njenaspomnja.
Runje zmandźeleny porik wobkradnył je paduch w Rödermarku pola Frankfurta nad Mohanom. Wón spakosći wulku wutrobu z čerwjenych róžow, kotraž bě na kwasnym awće ze srěbačkami přičinjena. Porik wobradu wuhlada, jako so po wěrowanju ze stawnistwa k awtu wróći. Na asfalće před awtom ležeše runje hišće jeničke kćenje.
Smjertny wulět do wudrjeńcy
Civita (dpa/SN). Znajmjeńša dźesać ludźi je při njejapkim zapławjenju wudrjeńcy w južnej Italskej žiwjenje přisadźiło. Šesćo so zranichu. 23 ludźi móžachu pomocnicy wuchować. Za třomi dalšimi hišće pytaja. Njezbožo sta w dolinje Raganello w kalabriskej hórskej gmejnje Civita. Sylny zliwk bě zapławjenje zawinił. Wot wody překwapjeni wulětnicy buchu sobu storhnjeni. Wudrjeńca je tam 40 metrow hłuboka.
Ćěkancy njesmědźa na kraj
Rom (dpa/SN). Po wjacorych dnjach na Srjedźnym morju je łódź italskeje mórskeje straže ze 177 migrantami minjenu nóc do sicilskeho přistawa Catania dojěła. Přiwšěm njesmědźa wuchowani łódź wopušćić, powěsćernja Ansa zdźěli. Wobchadny minister Danilo Toninelli wot hibanja Pjeć hwězdow bě łódźi dowolił do přistawa přijěć. Nutřkowny minister prawicarskeje Lega Matteo Salvini pak ćěkancam zakaza na kraj stupić, doniž nima „wotmołwy Europy“, kaž rěkaše.
Dźěłaja dlěje a zasłužeja mjenje
