„Pólska njeby šansu měła“
Luxemburgski wonkowny minister kritizuje Waršawske knježerstwo
Berlin (dpa/SN). Luxemburgski wonkowny minister Jean Asselborn na tym dwěluje, zo je Pólska zrała stać so z čłonom EU. „Dźensniša Pólska z Jarosławom Kaczyńskim na čole njeby šansu měła Europskej uniji přistupić“, rjekny Asselborn žurnalistam nowiny Tagesspiegel. K wopodstatnjenju najdlěje w EU jako wonkowny minister skutkowacy politikar praji, zo Pólska Kopenhagenske kriterije njerespektuje, kotryž ma kóždy kraj do přistupa k EU spjelnić. K tomu słuša demokratiski a prawostatny porjad. Komisija EU Waršawskemu knježerstwu mjez druhim wumjetuje, zo njezaruča njewotwisnosć justicy. „Knježerstwo w Pólskej přinjese so při wobmjezowanju prawostatnosće do dźeń a wjetšich wuskosćow. Hdyž wo to dźe, prawniski stat zezhibować, hladaja prawdźepodobnje na madźarskeho knježerstwoweho šefa Viktora Orbána, Asselborn rjekny. „Tola w Pólskej přińdźe hišće něšto wažneho k tomu: Jarosław Kaczyński, šef knježaceje strony Prawo a sprawnosć, je ideologa.
Za dobrowólny nawrót wabić
Za trajacu prezencu USA
To a tamne (27.02.17)
W bydlenju swojeje prawowki randalěrował je 16lětny w Porynsko-Pfalcy, dokelž internet njefungowaše, 78lětna žona z Weilerbacha bě drje spěšny internetny přistup skazała. Tón pak chcyše fachowc hakle spočatk tydźenja přizamknyć. Dokelž w tym času žadyn přistup k internetej móžny njebě, započa młodostny pjatk wječor cychnować. 78lětna ćekny z bydlenja a zawoła policiju. Zastojnicy dowjezechu młodostneho k jeho wowce. Hač je tam internet fungował, njeje znate.
Pytajo za swojim bydlenjom je so pjany póstniski nora w Augsburgu do bydlenja susoda zadobył. Mějićel bydlenja słyšeše, kak něchtó wokno rozbije. W kupjeli wuhlada wón susoda w kostimje róžojteho zajaca. Tón pak móžeše ćeknyć. Policija namaka muža skónčnje we łožu swójskeho bydlenja. Tež tam bě wón durje z nohu rozbił.
Do wólbneho programa SPD
Budyšin (SN/at). Z jasnymi słowami nastupajo wobsah programa za wólby zwjazkoweho sejma 24. septembra wobroćichu so čłonojo Budyskeho městneho zwjazka SPD na zwjazkowe předsydstwo kaž tež na zapósłancow swojeje strony w zwjazkowym sejmje, kotrychž wólbny wokrjes je w serbskim sydlenskim rumje. Kaž předsyda Budyskeje SPD dr. Měrćin Krawc w nowinskej zdźělence informuje, žadaja sej we wólbnym programje SPD dwaj eksistencielnej zajimaj serbskeje ludnosće wobkedźbować. K tomu namjetuja sćěhowacej formulaciji:
„1. Serbska rěč je bytostna za wutworjenje identity a za skrućenje serbskeho ludu we Łužicy. Škit, nałožowanje a rozšěrjenje rěče ma so podpěrać.
2. Wotbagrowanje serbskeho sydlenskeho ruma ma so skónčić. Do wotkryća abo rozšěrjenja brunicowych jamow we Łužicy ma so wobšěrnje pruwować, kak so to na serbski lud wuskutkuje.“
Strona SPD chce swój program za wólby zwjazkoweho sejma w zažnym lěću wobzamknyć.
Jednanja wo Opelu hišće traja
Paris (dpa/SN). Francoski minister za hospodarstwo a financy Michel Sapin liči z tym, zo so jednanja wo přewzaću awtotwarca Opela přez francoski koncern PSA bórze skónča. „Wšitcy su na tym zajimowani, zo předołho za to njetrjebaja“, rjekny Sapin po rozmołwje z němskej hospodarskej ministerku Brigittu Zypries (SPD). Sapin z toho wuchadźa, zo jednanja hišće měsacy traja. Medije běchu rozprawjeli, zo chcedźa zrěčenja hižo spočatk měrca podpisać.
Za EU wšelakich spěšnosćow
Louvain-la-Neuve (dpa/SN). Prezident komisije EU Jean-Claude Juncker zasadźa so za Europu wšelakich spěšnosćow. Tak móhli „koncentriske kruhi wokoło kruteho žra“ nastać, rjekny Juncker na zarjadowanju w belgiskim měsće Louvain-la-Neuve. Wón z toho wuchadźa, zo njemóža so wšitke kraje na wšitkich zhromadnych projektach wobdźělić, na přikład w zakitowanskich prašenjach abo hospodarskich programach. Komisija chce přichodny tydźeń wotpowědny koncept jako zakład diskusije předpołožić.
Wichory zachadźeli
