Z hospodarskimi nazhonjenjemi do politiki
Budyšin (CRM/SN). Jeho poprawne žiwjenske srjedźišćo je pjekarstwo, to po- twjerdźi Njedźichowski pjekarski mišter Roland Ermer wčera wječor při stajnym zjawnym blidźe Budyskeho měšćanskeho zwjazka CDU. Hižo w lěće 1989 sta so dźensa 53lětny katolski křesćan a nan třoch dźěći z wyšim mištrom pjekarjow w Sakskej a běše z tym najmłódši w Němskej. Mjeztym je wón tež prezident Sakskeho rjemjeslniskeho zwjazka. Jeho zasada je, zo maja ludźo z nazhonjenjemi w hospodarstwje tohorunja politiku sobu postajeć. Tohodla kandiduje wón jako čłon CDU we wólbnym wokrjesu 156 za 19. němski zwjazkowy sejm.
„Politika je dźensa přejara wot žiwjenskeje reality wobydlerstwa wotsalena“, wón měni. Zasadnje pak mamy k našim hódnotam, wuchadźacym z křesćanstwa, tež woprawdźe stać. Ekstremistiske prudy wón raznje wotpokazuje – wšojedne, hač su to politiske abo nabožne. Tohodla zastupuje wón hišće sylniše zabranje stejišća přećiwo AfD a podobnym zeskupnjenjam ze stron ciwilneje towaršnosće.
To a tamne (15.12.16)
Dokelž njebě ručne spinadło přićahnył, jako chcyše wustupić, je muž we wuchodnej Friziskej swoje nowe awto přisadźił. Muž bě při něhdyšim zastanišću přewózneje łódźe při rěce Ems zastał. Při wustupjenju dyrbješe přihladować kak štyri tydźenje stare awto po nahłej skłoninje runu smuhu do rěki zjědźe a so podnuri. Wohnjowa wobora dospołnje skóncowany wóz zaso z wody wućahny.
Dočasne narodninske zbožopřeća přinjesu njezbožo. Na to je bamž Franciskus wěriwych skedźbnił, kotřiž běchu jemu na wčerawšej generalnej awdiency w Romje k 80. narodninam gratulowali, kotrež bamž zajutřišim, sobotu, swjeći. „W mojej domiznje přinjese wulke njezbožo, hdyž přezahe gratuluješ“, wón rjekny. Přichwatani běchu bamžej tortu darili, na kotrejž běchu swěčki w formje 80. nastajane. Bamž zamó wšitke wuduć.
Biskopserbske wosady wopytał
Wotćah z města so dliji
Aleppo (dpa/K/SN). Powěsće nastupajo sewjerosyriske wulkoměsto Aleppo so kusaja. Jónu su je knježerstwowe jednotki hižo dospołnje zabrali, na tamnej stronje je rěč wo třěleńcach. Kaž ruske žórła praja, je so Assadowy režim z rebelemi dojednał, zo smědźa město wopušćić hromadźe z tysacami ciwilistow. Awtobusy za transporty su po powěsćach žurnalistow přihotowane. Dowjezć maja wone wšitkich do prowincy Idlib.
Wotsunu 50 Afghaničanow
Frankfurt n. M. (dpa/K/SN). Dźensa drje wotsunu prěni raz zhromadnje migrantow, kotřiž w Němskej njejsu azyl dóstali. Z Frankfurta nad Mohanom chcedźa 50 Afghaničanow z lětadłom do Kabula dowjezć. Rěčnica nutřkowneho ministerstwa je naprawu wobkrućiła. Organizacija za čłowjeske prawa Pro Asyl namołwja Zelenych w knježerstwach zwjazkowych krajow, wotsunjenju njepřipóznatych próstwarjow wo azyl zadźěwać.
Schulz so rozžohnował
Přirodoškitny zwjazk BUND Sakskeje zasadźa so za agrarnu změnu. Po ...
Dwójny etat rozjimać započeli
Drježdźany (SN/MkWj). Sakski krajny sejm je dźensa dwudnjowske zakónčace wuradźowanja wo dwójnym etaće swobodneho stata za 2017 a 2018 zahajił. Hišće nihdy w swojich stawiznach njeje Sakska telko pjenjez wudać móhła, kaž nětko za přichodnej lěće planuje: dobre 37,5 miliardow eurow.
Posedźenje bě so z raznej debatu wo politice krajneho knježerstwa zahajiło. Ministerski prezident Stanisław Tilich (CDU) pokaza na powšitkownje dobre hospodarske połoženje. Wón připowědźi wobšěrne inwesticije na polu digitalizacije a spěšneho interneta, zo by sakske hospodarstwo na wužadanja přichoda přihotowane było.
Frakciski šef Lěwicy Rico Gebhardt wšak kritizowaše, zo nima knježerstwo wotmołwy na palace politiske prašenja a na přiběracy populizm, ale zo dale čini kaž dotal. Připowědźene naprawy mjenowaše wón „nuzowe rozrisanja“, wosebje w šulskej politice. Korektury předewšěm na dobro dalšeho personala w statnej słužbje su po słowach Gebhardta wuslědk dotalneje wopačneje politiki skrótšenja we wšitkich wobłukach zjawneje słužby.
Emocialna debata wjelkow dla
Drježdźany (dpa/SN). Sakska chce nastupajo wjelči management něšto změnić, zapřijimajo při tym nazhonjenja z wukraja. Tole připowědźi wčera wobswětowy a agrarny minister Thomas Schmidt (CDU) na posedźenju krajneho sejma w Drježdźanach. Do toho bě plenum dosć emocionalnje debatował. Zapósłanc sakskeho sejma Jan Hippold (CDU) rjekny, zo z rosćacej populaciju tež konflikty mjez zwěrjećom a čłowjekom přiběraja. Na wsach knježa starosće a strach, dokelž so wjelki sydlišćam dale a bóle bliža. Zwjazkowe wobswětowe ministerstwo ma skónčnje zamołwitosć přewzać.
Zapósłanča Lěwicy w Sakskim krajnym sejmje Kathrin Kagelmann měnješe, zo njeje wjelča populacija problem, ale jednotliwe zwěrjata. Agrarny minister kaž tež politikarjo SPD a opozicije zwuraznichu, zo su hižo dźensa móžnosće, napadne wjelki morić. Z namjetom, zawjesć hranicu ličby wjelkow w Sakskej, je strona AfD zwrěšćiła.
To a tamne (14.12.16)
Z karu je 14lětny spytał 114 kilogramow praskotakow do Berlina pašować. Na němsko-pólskej mjezy w Frankfruće nad Wódru pak zastojnicy jeho z dźewjeć kistami ilegalneje pyrotechniki lepichu. Z regionalnym ćahom bě so młodostny wčera z něhdźe 8 600 praskotakami na puć do Berlinskeho měšćanskeho dźěla Wedding nastajił. Skedźbliwa wodźerka taksija, kotraž bě jeho na ćah dowjezła, pak zawoła policiju.
Znata rjekowka Wonder Woman njeje hižo dlěje pósłanča UNO. Comicowa figura chcyše so poprawom za zesylnjenje žonow w towaršnosći a boju wo runostajenje angažować. To pak zbudźi protest, dokelž njezastupuje figura feministiske zaměry. Zjednoćene narody su tuž nětko zhromadne dźěło z Wonder Woman zakónčili, zdźěli nakładnistwo, w kotrymž comic wuńdźe.
Zběrka dokumentow wušła
Berlin (B/SN). K prašenjam swójby wuda Němska biskopska konferenca njedawno zběrku dokumentow swětoweje synody. W njej namakamy tež prědowanja bamža Franciskusa a zakónčacy dokument synody. Nimo toho su tu podate rěčne přinoški němskich wobdźělnikow na synodźe a wuslědki wuradźowanja dźěłoweje skupiny. Brošurka hodźi so internetnje pod www.dbk.de skazać.
Konflikt mjez ÖRK a Israelom
Mnohe domjacnosće chude
Berlin (dpa/K/SN). W Němskej je dale a wjace domjacnosćow kaž tež ludźi zadołženych. Tole wuchadźa z rozprawy zwjazkoweho knježerstwa wo chudobje, z kotrejež nowina Bild cituje. Loni je 2,05 milionow domjacnosćow zadołženych było, dwě lěće do toho 1,97 mio. Potrjechenych bě tuž loni 4,17 mio. ludźi. Jako přičinu přirosta zadołženja rozprawa mjenuje, zo ma spochi wjace ludźi přemało dochodow. Tónle trend traje mjeztym hižo něhdźe dźesać lět.
Hollande w němskej stolicy
Berlin (dpa/K/SN). Francoski prezident François Hollande je dźensa němsku stolicu wopytał. Při zhromadnym wobjedźe z kanclerku Angelu Merkel dźěše wo europske a mjezynarodne naležnosće. Po nowinarskej konferency wobdźělištaj so wonaj na němsko-francoskej konferency wo digitalizaciji hospodarstwa we woběmaj krajomaj. Wo zhromadnym dźěle we wobłuku digitalizowanja je wjace hač 300 načolnych ekspertow z předewzaćow wuradźowało.
Połoženje katastrofalne
