Berlin (dpa/K/SN). Po zahubnym nad­padźe na Berlinske dohodowne wiki je zwjazkowy justicny minister Heiko Maas (SPD) přistupniši za krućiše zasahi přećiwo wohrožowarjam. „Dyrbimy wšo za to činić, zwuzdźić wohrožowarjow tak derje kaž móžno, ewentualnje tež zasudźić. Zasadźenje­ elektroniskich putow na nohomaj njesmě při tym tabu być.“ Jako wohrožowarjow­ zastopnjuja zwjazkowe wěstotne­ organy wonych ekstremistow, kotrymž­ přicpěwaja, zo atentaty skuća. Jutře chce Heiko Maas ze zwjazkowym nutřkownym ministrom Thomasom de Maizièrom (CDU) wuradźować wo konsekwencach, wurosćacych z atentata Anisa Amrija w Berlinje.

Moskwa (dpa/SN). Składnostnje prawosławnych hód je ruski prezident Wladimir Putin wuznamnu rólu cyrkwje w towaršnosći wuzběhnył. „Cyrkej sylni zhromadne skutkowanje statnych a towaršnostnych strukturow w kubłanju, roz­- swětlerstwje a dobroćelstwje. Wona skruća swójbne institucije a přinošuje ke kubłanju młodeje generacije“, rjekny Putin sobotu w swojim hodownym posel-stwje. Kritikarjo ruskej prawosławnej cyrkwi stajnje zaso wumjetuja, zo je statej přebliska.

Patriarch Kyril wěriwych namołwješe, modlić so za wopory smjertnych katastrofow a namocy. Při tym poćahowaše so předewšěm na atentat na ruskeho wulkopósłanca Andreja Karlowa w Turkowskej a na znjezbožene ruske wojerske lětadło z 92 pasažěrami nad Čornym morjom kónc decembra. Mjezy čłowjeskeje logiki njedowoleja Božu předwidźiwosć zrozumić. Wotmołwa leži w modlitwje, rjekny hłowa ruskeje prawosławneje cyr­kwje telewizijnemu sćelakej Rossija 1.

Wosada njeje cyle tak sylnje klinčała, kaž by wona kěrluš „Kak rjenje swěći zernička“ po němskim teksće spěwała. Najebać to spyta tójšto němskich wosadnych na wotběhowym łopjenu podaty serbski tekst druheje štučki sobu spěwać a serbskich kemšerjow tak poděrać. W reformaciskim zmysle je serbšćina tež na ekumeniskej Božej słužbje k zahajenju jubilejneho lěta minjeny pjatk w Budyskej cyrkwi swj. Pětra swoje krute městno měła. Nimo zhromadneho spěwanja je serbski superintendent Jan Malink tele wulke wudo­byće w našej maćeršćinje wozjewił, a ministerski prezident Stanisław Tilich je swoju próstwu němsce a serbsce přednjesł. Na sławnym městnje we Łužicy su ewangelscy a katolscy, němscy a serbscy křesćenjo na jara dostojne wašnje w Sakskej lěto k 500. róčnicy přibića Lutherskich tezow­ na durje Wittenbergskeje hrodo­weje cyr­kwje zahajili. Axel Arlt

FDP na tradicionalnym zetkanju na Třoch kralow nadźiju wuprudźała

Budyšin (SN/CS/BŠe). Na tradicionalnym zetkanju na Třoch kralow strony FDP sobotu w Budyskim Dźiwadle na hrodźe zhladowachu referenća na wólbne lěto 2017. Tak rěčachu wokrjesny předsyda FDP Mike Hauschild, jednaćel wobhospodarjenja kraja Wesenitztal Póckowy Marco Birnstengel a sakski předsyda FDP Holger Zastrow. Před něhdźe 70 přitomnymi wuprudźachu woni dowěru a nadźiju. „Mamy wotmołwy a rozrisanja na tuchwilne prašenja“, Mike Hauschild zwurazni. Ze zmylkow zašłosće su wuknyli a so znowa orientowali. Stronscy kolegojo a wón začuwaja, zo so stronje zaso lěpje dźe a pytnu rozmach. Zdobom su sej zamołwići wuwědomili, zo jednaja politikarjo w nadawku ludźi. Starosće wobydlerjow měli chutnje brać a so wo politiku prócować, kotraž je ludźom bliska. Wutworić měli wobłukowe wuměnjenja, kotrež žiwjenje wobydlerjow wolóžeja a jim hižo žane přidatne wobćeženja njepřinjesu. Stat dyrbi efektiwnje dźěłać, ale tež ludnosć ma wjac swójskeje zamołwitosće přewzać.