Washington (dpa/K/SN). USA su pjeć Rusam napołožili sankcije, dokelž běchu pječa čłowjeske prawa ranili. Mjez „pochłostanymi“ je šefpřepytowar Aleksander Bastrykin. Tež něhdyšej sobudźěłaćerjej tajnych słužbow Andrej Lugowoj a Dmitrij Kowtun k nim słušataj. Jeju maja za hłowneju podhladneju w padźe zajědojćenja eksagenta tajneje słužby FSB Aleksandra Litwinjenka w lěće 2006.
Sankcije njezwisuja z pozdatnym ruskim hackerskim zasahowanjom do lońšich nazymskich wólbow ameriskeho prezidenta. Nałožuja je na zakładźe tak mjenowaneho „Magnitsky-acta“ z lěta 2012. Wonym pjeć ruskim mužam je zakazane do USA zapućować. Maja-li tam zamóženje, so wone zamróži, a ameriscy staćenjo njesmědźa z nimi wikować. Z „Magnitsky-acta“ je mjeztym 44 wosobow potrjechenych. Tónle zakoń je pomjenowany po ruskim prawizniku Sergeju Magnickim, kotrehož běchu lěta 2009 w jastwje zabili.
Budyšin (dpa/SN/BŠe). Přichod přistajenych w němskich wotnožkach kanadiskeho koncerna Bombardier je dale njewěsty. Wčerawše zetkanje němskeho nawodnistwa koncerna ze zwjazkowym hospodarskim ministrom Sigmarom Gabrielom (SPD) kaž tež ze sakskim ministerskim prezidentom Stanisławom Tilichom (CDU) a jeho braniborskim kolegu Dietmarom Woidku (SPD) w Berlinje njeje k wuslědkej wjedło. Přiwšěm su akterojo wo tym wuradźowali, kak hodźał so koncern přerjadować. „Wuchodna Němska trjeba industrijne dźěłowe městna“, Sigmar Gabriel wuzběhny. Politikarjo měli wšitko za to činić, zo dźěłowe městna zawěsća. „To pak je hišće daloki puć“, minister podšmórny.
Předewzaće Bombardier Transportation ma něhdźe 40 000 sobudźěłaćerjow, w Němskej 8 500. Po tuchwilnych planach chce koncern po cyłym swěće něhdźe 5 000 městnow šmórnyć. Najwjetše zawody w Němskej su w Budyšinje, Zhorjelcu a Hennigsdorfje sewjernje Berlina. Spekulacije, jedyn z nich zawrěć chcyć, nawodnistwo wčera wotpokaza.
Hejataj šoferaj awta staj w pfalcskim Frankenthalu zasadźenje policije zawiniłoj. Wobaj běštaj sej na wuskim puću napřećo přijěłoj, njepřińdźeštaj pak nimo sebje. Dokelž 49lětny muž runje tak kaž 36lětna šoferka wobaj na tym wobstawaštaj, zo tón tamny něhdźe 80 metrow wróćo storči, so tam třištwórć hodźiny ničo doprědka ani dozady njehibaše. Skónčnje wołaštaj policiju. Zastojnicy jimaj radźachu, wěc wzajomnje rozrisać. Jako woni po hodźinje hišće raz za nimaj pohladachu, běštej wobě awće preč.
Wopačny zbrašeny je spytał drogi do Šwicarskeje pašować. Wudawajo so jako wužiwar koleskateho stoła měješe 22lětny wosom kilogramow marihuany w zawku pod sobu schowane. Cłownicy pak jeho w ćahu na italsko-šwicarskej mjezy lepichu. a statne rěčnistwo je „zbrašeneho“ mjeztym wobskoržiło.
London (dpa/K/SN). Wot wčerawšeho pózdnjeho wječora je sławna Londonska metro 24 hodźin stawka přistajenych dla w dalokej měrje zastajena. Najwjetši dźěl wšěch stacijow cyłeje wobšěrneje metro- syće je zawrjeny. Z někotrych ćahi jeno sporadisce jězdźa. Akcija potrjechi miliony dojězdźowarjow kaž tohorunja syły turistow. Dźěłarnistwa protestuja z njej přećiwo wottwarej dźěłowych městnow kaž tež přećiwo zawěranju předawarnjow jězdźenkow.
Dobre wuhlady za Cypern
Genf (dpa/SN). Społnomócnjeny UNO za Cypern je hladajo na nowe jednanja k přewinjenju dźělenja kraja optimistiski. Wobě stronje, grjekscy kaž tež turkowscy Cypernjenjo, matej moderatnych wodźacych politikarjow, kotřiž su wo lěpšinach znowazjednoćenja přeswědčeni, rjekny Norwegčan Espen Barth dźensa do zahajenja jednanjow w Genfje. Na kóncu dyrbjał lud rozsudźić. Cypern je po grjekskim puču a turkowskej wojerskej interwenciji wot lěta 1974 dźěleny.
Wojowanja pitneje wody dla
Moskwa (dpa/SN). Składnostnje prawosławnych hód je ruski prezident Wladimir Putin wuznamnu rólu cyrkwje w towaršnosći wuzběhnył. „Cyrkej sylni zhromadne skutkowanje statnych a towaršnostnych strukturow w kubłanju, roz- swětlerstwje a dobroćelstwje. Wona skruća swójbne institucije a přinošuje ke kubłanju młodeje generacije“, rjekny Putin sobotu w swojim hodownym posel-stwje. Kritikarjo ruskej prawosławnej cyrkwi stajnje zaso wumjetuja, zo je statej přebliska.
Patriarch Kyril wěriwych namołwješe, modlić so za wopory smjertnych katastrofow a namocy. Při tym poćahowaše so předewšěm na atentat na ruskeho wulkopósłanca Andreja Karlowa w Turkowskej a na znjezbožene ruske wojerske lětadło z 92 pasažěrami nad Čornym morjom kónc decembra. Mjezy čłowjeskeje logiki njedowoleja Božu předwidźiwosć zrozumić. Wotmołwa leži w modlitwje, rjekny hłowa ruskeje prawosławneje cyrkwje telewizijnemu sćelakej Rossija 1.
Budyšin (SN/CS/BŠe). Na tradicionalnym zetkanju na Třoch kralow strony FDP sobotu w Budyskim Dźiwadle na hrodźe zhladowachu referenća na wólbne lěto 2017. Tak rěčachu wokrjesny předsyda FDP Mike Hauschild, jednaćel wobhospodarjenja kraja Wesenitztal Póckowy Marco Birnstengel a sakski předsyda FDP Holger Zastrow. Před něhdźe 70 přitomnymi wuprudźachu woni dowěru a nadźiju. „Mamy wotmołwy a rozrisanja na tuchwilne prašenja“, Mike Hauschild zwurazni. Ze zmylkow zašłosće su wuknyli a so znowa orientowali. Stronscy kolegojo a wón začuwaja, zo so stronje zaso lěpje dźe a pytnu rozmach. Zdobom su sej zamołwići wuwědomili, zo jednaja politikarjo w nadawku ludźi. Starosće wobydlerjow měli chutnje brać a so wo politiku prócować, kotraž je ludźom bliska. Wutworić měli wobłukowe wuměnjenja, kotrež žiwjenje wobydlerjow wolóžeja a jim hižo žane přidatne wobćeženja njepřinjesu. Stat dyrbi efektiwnje dźěłać, ale tež ludnosć ma wjac swójskeje zamołwitosće přewzać.