Witaja wusud Europskeho sudnistwa na dobro narodnych mjeńšin

Flensburg (SN/MkWj). Z wulkim spokojenjom je Federalistiska unija europskich narodnych mjeńšin (FUEN) rozsud Europskeho sudnistwa w Luxemburgu na wědomje wzała, po kotrymž je komisija EU winowata, naležnosće mjeńšin chutnišo brać a so z jich problemami zaběrać. Sudnicy w Luxemburgu su minjeny pjatk rozsudźili, zo bě reakcija komisije EU, zapodatu iniciatiwu Minority SafePack wotpokazać, wopačna.

Prezident FUEN Loránt Vincze zwura­zni: „To je wulke dobyće za awtochtone mjeńšiny w Europje. Njejsmy hišće na kóncu swojich prócowanjow, ale dźensa smy wažnu kročel zmištrowali. Rozsud sudnistwa EU-komisiju nuzuje, iniciatiwu narodnych mjeńšin jara chutnje brać. Mjezsobna solidarita mjeńšin je so jako dobra wopokazała. Partnerstwo, nastate pod třěchu FUEN, je k wuspěchej wjedło. Wutrobny dźak wšitkim sobuwojowarjam za dobry přihot sudniskeho jednanja.“

Wopity, k tomu hišće bjez cholowow a čriji, je šofer pućowanskeho busa w Kaiserslauternje za wodźidłom sedźał. 53lětny bě sobudźěłaćerjej wěstotneje firmy napadnył, dokelž chcyše bjez dowolnosće do ameriskeje kaserny jěć. Přiwołana policija zwěsći w jeho kreji wjace hač dwaj promilej alkohola. Pobrachowacu drastu namakachu w busu, w kotrymž nichtó druhi njesedźeše. Zastoj­nicy wzachu šofera sobu na stražu.

Na wšě 87 zmužitych zymskich płu­warjow wobdźěli so wčera na Drježdźanskim póstniskim płuwanju we Łobju, kaž organizatorojo zdźěleja. Woda bě z 0,5 stopnjemi chětro zymna, powětr njeměješe wjace hač štyri stopnje. Najstarši wobdźělnik bě 73 lět.

Luxemburg (SN). Federalistiska unija europskich narodnych mjeńšin (FUEN) je sej dźensa zhromadnje z dalšim woby­dlerskim komitejom sudniski wuspěch wuwojowała: Europske sudnistwo w Luxemburgu je rozsudźiło, zo njesmě komisija­ Europskeje unije naležnosć wobydlerskeje iniciatiwy „Minority Sa­fe­Pack“ bjeze wšeho wotpokazać. Iniciatiwa chcyła docpěć, zo so na europskej runinje naležnosće mjeńšin bóle wobkedźbuja a mjeńšiny zaměrnišo spěchuja. Tak žadaja sej naprawy k spěchowanju mjeńšinowych rěčow, přećiwo jich diskriminowanju a za jich lěpše politiske sobudźěło. Za to běchu wobydlersku iniciatiwu załožili, kotraž chce za swoje žadanja podpisma zběrać. Europska komisija pak bě iniciatiwu lěta 2013 wotpokazała, dokelž so wona do „kompetencneho ramnika“ komisije EU njehodźi. Přećiwo tomu bě FUEN na Europskim sudnistwje skoržiła. Po rozsudźe sudnikow dyrbi komisija EU swój rozsud z lěta 2013 znowa formulować, zdźěli generalna sekretarka FUEN Susan Šenkec našemu wječornikej.

Valletta (dpa/K/SN). Na kupje Malta wotměchu dźensa šefojo statow a knježerstwow Europskeje unije wurjadny wjeršk. Woni wuradźuja wo migraciskej krizy a wo tym, kak wobmjezować ćěkanje po centralnej srjedźomórskej čarje. Rozsudne při tym je zhromadne dźěło z Lybiskej. Loni bě so po tejle čarje něhdźe 180 000 ludźi do Europy dóstało. Wobzamknyli su dźesaćdypkowy program přećiwo dalšim migrantam ze sewjerneje Afriki.

Tójšto zhromadnosćow

Washington (dpa/K/SN). Wonkowny minister Sigmar Gabriel (SPD) je w rozmołwach ze swojim ameriskim kolegu Rexom Tillersonom a z wiceprezidentom Mikom Pencejom zwěsćił, zo je z Washingtonom tójšto politiskich zhromadnosćow. Z prezidentom Donaldom Trumpom je drje diferencow nastupajo ćěkancow, Ukrainu a zadźerženje napřećo Ruskej,­ pola swojeju rozmołwneju part­- nerow pak so wone njejewja.

Schulz mócnje ćehnje