Dóstanu spěchowanje
Drježdźany/Budyšin (SN). We wobłuku spěchowanskeho programa „Mosty do přichoda“ dóstanu wšelake zarjadnišća Budyskeho wokrjesa spěchowanske srědki dohromady 453 000 eurow za inwesticije a zachowanske naprawy, kaž wokrjes zdźěli. Tak podpěruja wobnowjenje tepjenja wyšeje šule we Łutach (Lauta) z nimale 200 000 eurami a wobnowjenje tepjenja Budyskeho krajnoradneho zarjada z 90 000 eurami z budgeta „Zwjazk“. Z budgeta „Sakska“ dóstanje Radebergski gymnazij za energetiske saněrowanje něhdźe 94 000 eurow a Sakska šula kamjenjećesarjow w Zemicach-Tumicach za nowe tepjenje 71 250 eurow. Sakska statna sekretarka za socialne naležnosće a škit přetrjebarjow Andrea Fischer chce wotpowědne wopisma přichodnu srjedu 1. přirjadnikej Budyskeho krajneho rady Udo Wićazej we Łutach přepodać.
Dohromady 800 milionow eurow wopřijima spěchowanski program „Mosty do přichoda“ hač do lěta 2020. Swobodny stat Sakska bě před lětomaj zakoń wo zesylnjenju inwesticiskeje mocy nastorčiła.
Müller wostanje měšćanosta
Berlin (dpa/SN). Politikar SPD Michael Müller wostanje knježacy měšćanosta Berlina. Dom zapósłancow je jeho dźensa w prěnim wólbnym kole wuzwolił. Müller, kiž budźe jutře 52 lět, nawjeduje jako knježerstwowy šef nětko po wšej Němskej prěnje zhromadne knježerstwo SPD, Lěwicy a Zelenych. Müller je wot lěta 2014 Berlinski měšćanosta, po tym zo bě Klaus Wowereit wotstupił.
Kubłanje w digitalnym swěće
Berlin (dpa/SN). Za kubłanje a šulu zamołwići ministrojo wšitkich 16 zwjazkowych krajow Němskeje su dźensa w Berlinje wo strategiji „kubłanja w digitalnym swěće“ wuradźowali. Z njej chcyše konferenca kultusowych ministrow postajić, kelko kompjuteroweje kompetency měli šulerjo wobsedźeć, hdyž šulu wopušća. Wotpowědne naroki a zaměry měli kraje „přichodne lěta“ zwoprawdźić, kaž na konferency rěkaše. Strategiju chcychu w běhu dnja předstajić.
Nowe knježerstwo trěbne
SPD: Wulka koalicija so kónči
OSZE chcyła wěstotu w Europje skrućić
Hospodarski plan jězoriny schwaleny
Łaz (AK/SN). Zaměrowy zwjazk Łužiska jězorina chce klětu 1,8 milionow eurow inwestować. Swójski podźěl wučinja 340 000 eurow. Tole zdźěli jednaćel Daniel Jung na hłownej zhromadźinje zwjazka wutoru we Łazu, hdźež su radźićeljo etatowe wustawki a hospodarski plan za lěto 2017 schwalili.
Tak chcedźa za přebywanišćo turistow na južnym pobrjohu Lejnjanskeho jězora w prěnim wotrězku 485 000 a w druhim wotrězku hišće raz 144 000 eurow nałožić. Nastać maja multifunkcionalne twarjenje, maritimne připrawy, nimo toho městna za campingowe mobile a stany. Tež mosćik za čołmy chcedźa natwarić. Wotpowědne plany inženjerski běrow Sweco z Rěčic bórze předstaji.
Informaciski system za motorizowanych wopytowarjow ma 233 000 eurow płaćić, kaž hospodarski plan předwidźi. W tym zwisku chcedźa na wažnych dróhach a křižowanišćach informaciske tafle nastajić, zo móhli so turisća lěpje orientować. Potrjechene komuny budu při wothłosowanju nastupajo teksty na infotaflach zapřijate.
Hdźe je serbski film?
Nowe formy pašowanja
Marko Šiman žada sej wjace zwjazkowych policistow na mjezach
Budyšin (SN/MkWj). Serbski zapósłanc CDU w Sakskim krajnym sejmje Marko Šiman je swoje njedawne žadanje po- twjerdźił, namjezne kontrole zaso zawjesć, zo móhli přiběracej kriminaliće wobarać. Na wčerawšej nowinarskej rozmołwje ze zastupnikami medijow wón tole konkretizowaše. „Mamy nowe formy organizowaneho pašowanja ludźi do Europy“, Šiman zwěsći. Při tym zaběra Pólska po jeho słowach wosebje wažnu rólu. Fachowcy wobkedźbuja nowe čary, po kotrychž ludźo předewšěm z arabskich krajow do Europskeje unije přichadźeja: Z lětadłami přizemjeja na małych lětanišćach zwonka pólskich metropolow. Pašowarjo předawaja jim falšowane wizadokumenty za turistow, z kotrymiž móža so wukrajnicy po wšej Europje hibać. Za to płaća na wšě 7 000 hač do 10 000 eurow. Dokelž na němsko-pólskej mjezy dokumenty hižo njekontroluja, je takrjec ryzy připad, hdyž policija tajkich „turistow“ lepi.
Přistawny mosćik přepodaty
To a tamne (08.12.16)
Z pastwy ćeknjena kruwa je na zwjazkowej dróze B 96 pola Njeswačidła wčera wječor wobchadne njezbožo zawiniła a so na to zminyła. Wohnjowi wobornicy wjacore hodźiny bjez wuspěcha za prawdźepodobnje zranjenym skoćećom pytachu, ale njenańdźechu je. 61lětny muž bě z awtom do kruwy zrazył, kotraž z dalšim howjadom srjedź puća steješe. Na awće nasta škoda wjacorych tysac eurow. Šofer wuńdźe ze stróželemi.
110 hodownych štomikow, 130 swěčkowych rjećazow a 16 000 hodownych kulow pyša dom swójby Jeromin w delnjosakskim Rintelnje. Po cyłym domje su bohaće pyšene plastikowe štomy nastajene, jeničce spanska stwa je wuwzata. Zo by k adwentej wšitko hotowe było, započinaja z natwarom hižo w oktobru. Wšitko zaso wottwarić a zrumować traje potom dwaj tydźenjej.
Wójsko sej město zdobywa
Aleppo (dpa/K/SN). Syriske wójsko je po wudawanju aktiwistow dźensa cyłe stare město Aleppa zdobyło. Rebelojo su so z njeho cofnyli, dokelž bě jim wobkruženje hrozyło. Ale tež hewak so woni dale a mjenje spjećuja. Hižo wčera běchu jednotki wójska a jeho zwjazkarjow strategisce wažnu štwórć Al-Shaar wobsadźili. Po měnjenju wobkedźbowarjow traja wojowanja jenož hišće něšto dnjow.
Zemjerženje sej wopory žadało
Jakarta (dpa/SN). Ćežke zemjerženje je w indoneskej prowincy Aceh, kotraž bě hižo raz z woporom přirodneje katastrofy, wulke škody zawiniło. Znajmjeńša 97 ludźi je po dotalnych informacijach žiwjenje přisadźiło, wójsko kraja zdźěli. Dźesatki chěžow so sypnychu. Wočakuja, zo hišće tójšto wobydlerjow pod rozwalinami leži. Rženje měješe sylnosć 6,4. Aceh bě hižo lěta 2004 najhórje potrjechena kónčina, jako po zemjerženju tsunami kraj zapusći. 180 000 ludźi tehdy zahiny.
Grjekscy žurnalisća stawkuja
