Wjace wučby nabožiny
Berlin (B/SN). Ewangelska cyrkej Berlin-Braniborska-šleska Hornja Łužica zasadźuje so za wjace hodźin nabožinskeje wučby. Wona namołwja krajnu cyrkej w Berlinje, Braniborskej a Sakskej, „spěchować židowsku, křesćansku a muslimsku nabožinu, zo by so dialog w šuli na tutu temu zawjedł a dale pěstował“.
Towaršnosć LEO w kritice
Magdeburg (B/SN). W zwisku ze znowa w kritice stejacym towarstwom za žiwjensku orientaciju (LEO) w SakskoAnhaltskej wujasnja Ewangelska cyrkej Srjedźoněmskeje (EKM), zo njejedna so na posedźenjach wo poskitk cyrkwinskeho razu. Towarstwo steji w kritice, dokelž poskićuje seminary k wuhojenju homoseksualnych, zdźěli Zwjazk lesbow a homoseksualnych (LSVD) Saksko-Anhaltskeje. Před štyrjomi lětami su zwjazkej LEO nastajenja k homoseksualiće dla zjawne spěchowanje šmórnyli. Předsyda LEO, farar Bernhard Ritter, bě wuspěšnje přećiwo tomu skoržił, tak zo je LEO nětko zaso jako swobodny nošer Pomocy dźěćom a młodostnym we wokrjesu Mansfeld-Južny Harz připóznaty.
EU chce deeskalaciju
Sakska za Tilicha so wuprajiła
Drježdźany (SN). Sakska je so za to wuprajiła, zo předsyduje bywši ministerski prezident Stanisław Tilich (CDU) planowanej komisiji, kotraž ma w Zwjazku wo kóncu wudobywanja wuhla rozsudźić. Po słowach knježerstwoweho rěčnika Ralpha Schreibera je Tilich „prawy prawiznik“ za Saksku w naležnosći, wón ma mnohe nazhonjenja a tójšto wědy, kaž dpa minjeny pjatk rozprawješe.
Po słowach Lěwicy w Sakskim krajnym sejmje je Tilich wopačny muž za tule komisiju. Klimopolitiski rěčnik frakcije Marco Böhme ma bywšeho knježerstwoweho šefa za wuprajeneho přećiwnika nastupajo kónc wudobywanja wuhla.
Wotewrjene je, hač koaliciski partner SPD Tilicha jako kopředsydu komisije akceptuje. Tajka móhła hač do třoch předsydow měć. Komisija „rozrost, strukturna změna a dźěło“ ma bórze dźěłać započeć a hišće lětsa datum za kónc wuhloweje miliny w Němskej mjenować. Njerozrisane dale je, štó dokładnje w gremiju sobu dźěła a hač budźe opozicija w zwjazkowym sejmje zastupjena. Tež wobydlerske iniciatiwy z potrjechenych kónčin žadaja sej městna.
Klawsura na horje
Zugspitze (dpa/SN). Čoła frakcijow unije a SPD su so dźensa na najwyšu horu Němskeje Zugspitze podali, zo bychu tam rozjimali, kak chcedźa wažne předewzaća koaliciskeho zrěčenja zwoprawdźić. Volker Kauder (CDU), Andrea Nahles (SPD) a předsyda skupiny CSU Alexander Dobrindt rěčachu mjez druhim wo nuznje trěbnych nowych bydlenjach a wo naprawach přećiwo spochi přiběracym podružam w městach.
Israel hrozy Iranej
Tel Aviv (dpa/SN). Israelski ministerski prezident Benjamin Netanjahu je Iran wojerskeje prezency w Syriskej dla raznje kritizował. „Nochcemy z Iranom konfrontaciju. Dyrbjało-li pak k tomu dóńć, da radšo nětko hač pozdźišo“, rjekny 68lětny na posedźenju kabineta. Kraj je rozsudźeny, „iransku agresiju přećiwo Israelej“ wotwobarać. W Tel Avivje su sej wěsći, zo spyta Iran w Syriskej nowu frontu přećiwo Israelej wutworić.
Wolij tak drohi kaž lěta 2014
Dobrindt zbudźa raznu kritiku
Berlin (dpa/SN). Nawoda krajneje skupiny bayerskeje CSU w zwjazkowym sejmje Alexander Dobrindt je sej ze swojimi dwělomnymi wuprajenjemi k azylowej politice tójšto mjerzanja načinił. Zwjazk prawiznikow Němskeje jemu wumjetuje, zo prawniski stat wosłabja. Tež ze stron SPD a Zelenych dyrbi sej politikar tójšto kritiki naposkać. Dobrindt bě hladajo na prawiznikow a pomocne organizacije rjekł, zo kóždy, kiž z pomocu skóržbow spyta wotsunjenju kriminelnych ćěkancow zadźěwać, přećiwo towaršnostnemu měrej dźěła. Wón rěčeše w tym zwisku wo „agresiwnej wotsuwanjam zadźěwacej industriji“.
Prezident zwjazka prawizinikow Ulrich Schellenberg rjekny powěsćerni dpa: „Kóždy ma prawo, so we wobłuku płaćiwych zakonjow sudnisce wobarać a skoržić. Runje to je bytostne za prawniski stat. Ze swojimi wuprajenjemi Alexander Dobrindt prawniski stat wosłabja, město toho zo by jón skrućił. W Němskej maja sudnistwa poslednje słowo a nic politika.“
Putin přisahu za dalšu dobu złožił
Moskwa (dpa/SN). Ruski prezident Wladimir Putin je dźensa přisahu za dalšu hamtsku dobu złožił. Na ceremoniju w Moskowskim Krjemlu bě 5 000 hosći prošenych. 65lětny Putin je mjeztym 18 lět na čole najwjetšeho kraja swěta. Je to jeho štwórta hamtska doba jako prezident, kotraž traje hač do lěta 2024. Potom dyrbi wón po wustawje zastojnstwo wopušćić. Při prezidentskich wólbach w měrcu bě Putin po informacijach wólbneje komisije rekordny wuslědk 77 procentow hłosow docpěł.
Přewodźane bě zapokazanje do zastojnstwa wot wčerawšich namócnosćow we wjacorych městach, jako policija demonstracije přećiwnikow Putina rozpušći. Při tym zaja wjace hač 1 600 přiwisnikow opozicionelneho Alexeja Nawalneho. Tež wón bu zajaty, je pak mjeztym zaso swobodny a přichodny pjatk na sudnistwo skazany.
Ze spřisahanjom Putina je ruske knježerstwo awtomatisce rozpušćene. Powšitkownje pak wočakuja, zo budźe Dmitrij Mjedwjedew zaso ministerski prezident.
ANO dale ćehnje
To a tamne (07.05.18)
Dokelž bě jimaj pěsk na twarnišću wušoł, staj so twarskaj dźěłaćerjej cyle jednorje na hrajkanišću w delnjofrankskim Kitzingenje posłužowałoj. Mužej sobotu rano z łopaču pěsk do swojeju karow sypaštaj a wotwjezeštaj jón. Susodźa to wobkedźbowachu a wołachu policiju. Ta namaka pěsk kaž tež dźěłaćerjow na bliskim twarnišću. Pječa bě jimaj šef kazał pěsk z hrajkanišća wzać. Přiwšěm mataj wonaj ličić ze skóržbu padustwa dla.
Za „wuprózdnjenje swojeho žołdka do wašeho awta“ je so maturant pola Stuttgartskeje policije zamołwił. Zastojnicy běchu młodeho muža spočatk meje na nalětnim swjedźenju chětro wopiteho před swjedźenskim stanom ležaceho našli a sobu na stražu wzali. Po puću pak wón w policajskim awće bluwaše. „Móžu sej derje předstajić, kak njepřijomne wam to bě“, šuler w lisće pisaše.
Eksperiment z jědom w Čěskej
Praha (dpa/SN). W Čěskej su z čuwowym jědom „nowičok“ eksperimentowali. Tole je prezident Miloš Zeman wčera wječor w telewizijnym sćelaku Barrandov zdźělił. Eksperiment běchu loni w nowembru we wojerskim instituće w Brnje přewjedli a při tym snadne mnóstwo jěda syntetisce zhotowili, 73lětny rjekny. Atentatnicy běchu z tutym jědom loni w jendźelskim Salisbury bywšeho ruskeho agenta zajědojćili. Pječa bě Ruska za to zamołwita. Argument Moskwy, zo by tež Čěska tajku maćiznu zhotowić móhła, běchu w Praze stajnje wotpokazali.
Allianz do wuhla njeinwestuje
Mnichow (dpa/SN). Najwjetši zawěsćenski koncern Europy Allianz so wot wuhla wotwobroća. Wotnětka nochcedźa hižo wuhlowe milinarnje a jamy zawěsćeć, rjekny šef předsydstwa Oliver Bäte powěsćerni dpa w Mnichowje. Tež kapital nochcedźa hižo do předewzaćow inwestować, kotrež z wužiwanjom wuhla zaměry Pariskeho klimoweho zrěčenja wohrožuja, woćoplenje zemje na mjenje hač dwaj stopjenjej wobmjezować.
Wójsko znowa wusměrić
