Brüssel/Drježdźany (SN/at). Wo přichodźe Łužicy staj sakski hospodarski statny sekretar dr. Harmut Mangold a jeho braniborski kolega Hendrik Fischer ze zastupjerjemi wšelakich generalnych direkcijow EU srjedu a wčera w Brüsselu rěčałoj a tam wo podpěru strukturneje změny we Łužicy wabiłoj, kaž sakske hospodarske ministerstwo wčera zdźěli.

Po słowach statneho sekretara Mangolda je přinošk Němskeje při zwoprawdźenju wobšěrnych – wot Europskeje unije wobzamknjenych klimypolitiskich ćežišćow – přetwar brunicoweje industrije, kotryž je z hłuboko sahacej strukturnej změnu zwjazany. „Wot toho wosebje potrjechenej stej w Sakskej łužiski brunicowy rewěr a srjedźoněmski rewěr blisko Lipska“, rjekny Mangold.

Europske klimoškitne zaměry docpěješ jeno ze socialnje znjesliwym přetworjenjom hospodarskich strukturow we wosebje potrjechenych regionach. Za to je wažne, jara zahe wšěch akterow a spěchowanske móžnosće zapřijeć, zo móhli łužiske hospodarske struktury dale wuwić. Naprawy na europskej runinje słušeja k tomu, je Fischer přeswědčeny.

Bjezdwěla njeje puć z knježerstwoweje krizy hišće rubany. Tola małe swětleško so na wobzoru hižo jewi. Při wšěm rozumjenju za spočatnu poziciju němskeje socialdemokratije – dalšeje, třećeje wulkeje koalicije z CDU a CSU so wzdać – wšitko tak wupada, zo móhli jenož unija a socialdemokraća kraj před wjetšej škodu zachować. Wobsahowe zbliženje, tehdyši Gerharda Schröderowy kurs SPD jako „strony srjedźizny“ a „socialodemokratizowanje CDU“ přez Angelu Merkel, wobeju jónu wulkeju ludoweju stronow zaruča hišće trěbnu měru zhromadnosćow, kotraž knježerstwowe zwjazkarstwo wudźeržuje. Tónle fakt by za wospjetnu wulku koali­ciju rěčał. Ale za kotru płaćiznu? W kon­sekwency čorno-čerwjeneju koalicijow docpě SPD jenož hišće 20 procentow. Narokej „ludoweje strony“ to wězo njewotpowěduje. Hač wolerjo pak prócowanja SPD za kraj připóznaja? Axel Arlt

Nimale pjećmetrowska pyton z mjenom Tinkerbell je sej w Stockporće, wulkokónčinje Manchestera, k susodam „wulećała“. Mějićelej staj to hakle pytnyłoj, jako chcyštaj hada nazajtra picować. Mataj dźesać pytonow, ale šěsćlětna Tinkerbell pobrachowaše. Hnydom staj policiju zawołałoj. Howno hada na susodźic zahrodźe pak pokaza jimaj prawy puć. Hromadźe wonaj podchłódźenu pyton domoj donjeseštaj a běštaj zbožownaj, jako móžeštaj ju zaso „potołkać“.

Woruch za samodruhe žony je w Hamburgu zasadźenje wohnjoweje wobory zawinił. W drastowym wobchodźe w St. Pauliju běchu wóń kura zwěsćili a nuzowe čisło wolili. Wobornicy drje to tež čujachu, přičinu pak njenamakachu. Ta wšak so bórze wukopa. Susodna gynekologiska praksa poskića samodruhim žonam wosebitu woruchowu terapiju.

Berlin (dpa/SN). Do zahajenja zetkanja Pětrohródskeho dialoga w Berlinje zwěsća jeho předsyda Ronald Pofalla w přewšo poćeženych němsko-ruskich poćahach po aneksiji połkupy Krim prěnje signale wotputanja. Jako přikładaj wón mjenuje, zo ruska strona mjeztym lěpje z kritiku wobchadźa, kaž tež namjet prezidenta Wladimira Putina, na wuchodnej Ukrainje módronahłownikow Zjednoćenych narodow zaměstnić.

Mjenje přinoška, wyša renta

Berlin (dpa/SN). Najebać wotwidźomny financny ćišć rentowe kasy přinoški klětu snadnušce zniža, zdobom pak renty čujomnje zwyša. Přinoškowa sadźba za zakonske rentowe zawěsćenje woteběra wot 1. januara 2018 wo 0,1 dypk na 18,6 procentow. Zwjazkowy kabinet je wčera wotpowědnemu postajenju socialneho ministerstwa přihłosował. Zdobom wšitko za to rěči, zo změja rentnarjo na wuchodźe a zapadźe wot 1. julija tři procenty wjace renty.

Mladić na čas žiwjenja do jastwa