Kijew (dpa/SN). We wobłuku wjetšeho přerjadowanja ukrainskeho knježerstwa je tež wonkowny minister Dmytro Kuleba swój wotstup připowědźił. Tole je wón dźensa medijam zdźělił. Hižo wčera bu znate, zo su wjacori ministrojo swój wotstup zapodali. Na přichodnym posedźenju parlamenta chcedźa wot­powědne próstwy pruwować.

Po informacijach medijow su za brónjensku industriju zamołwity minister Olexander Kamyšin, justicny minister Denys Maljuška a wobswětowy minister Ruslan Strilec wo wuwjazanje ze zastojnstwa prosyli. Pozdźišo bu znate, zo stej tež zastupowacej ministerskej prezidentce Olha Stefanišyna a Iryna Werešćuk ­demisiju zapodałoj. Werešćuk bě za prašenja ćěkancow zamołwita, Stefanyšina za europsku integraciju Ukrainy. Pječa dyrbja połojcu ­knježerstwa wuměnić.

Berlin (dpa/SN). Po sylnym zwyšenju w tutym lěće so wobydlerski pjenjez 2025 njezměni. Tole je minister za dźěło Hubertus Heil (SPD) w sćelaku RTL připowědźił. Při wulkej inflaciji dyrbjeli so sadźby přiměrić. Nětko pak płaćizny zaso widźomnje woteběraja. Tuž wobydlerski pjenjez klětu njezwyša. „To je tež prawje tak.“ Heil připowědźi zdobom naprawy přećiwo tym, kotřiž dźěło wotpokazuja. Přijimarjo su k sobudźěłu zawjazani, wón rjekny. Štóž terminy prawidłownje skomdźi, dyrbi z wotpowědnymi naprawami ličić. Raznišo chłostać chcedźa tež tych, kotřiž nimo toho hišće čornje dźěłaja.

Berlin (dpa/SN). Po wólbach w Sakskej a Durinskej so w rjadach CDU móžnej koaliciji ze Zwjazkom Sahry Wagen­knecht (BSW) přiběrajcy spjećuja. „Sahra Wagenknecht wšitko do prašenja staja, štož unija CDU/CSU zastupuje: krute wjazanje na zapad, zjednoćenu Europu a čłonstwo w Nato, w najwjetšim měrowym projekće stawiznow“, rjekny sewjerorynsko-westfalski čłon CDU Frank Sarfeld nowinarjam. Wón BSW wumjetuje, zo přiwobroća so strona runje tak kaž AfD awtoritarnym systemam. „Z tajkimi skupinami njesměmy hromadźe dźěłać.“

Sarfeld rěči po informacijach nowiny Tagesspiegel w mjenje něhdźe 40 čłonow CDU, kotřiž chcedźa sej wot přichodneho zwjazkoweho zjězda strony žadać, zakaz dźěła z BSW wobzamknyć.

Dotal zakazuje tajke wobzamknjenje jenož zhromadne dźěło z AfD a Lěwicu. Po komplikowanym wuslědku wólbow krajneho sejma bě so předsydstwo durinskeje CDU předwčerawšim, póndźelu, za prěnje rozmołwy z BSW wuprajiło.

Bertolt Brecht je jónu ironisce poručił: Hdyž je lud dowěru knježerstwa přěhrał, njech knježerstwo rozpušći lud, zo by sej nowy lud woliło. CDU je w Sakskej přirunujo ze „złotymi lětami“ pod „kralom Kurtom“ Biedenkopfom w 90tych lětach połojcu wolerstwa přisadźiła. Najradšo bychu najebać to jenož z FDP jednali, ta pak w sejmje njeeksistuje. K nuzy z SPD, ta pak je přesłaba. Ze Zelenymi poprawom wjac koalěrować nochcychu, ale nětko jich tola přeprošuja. A tež BSW su přeprosyli – přećiwo tomu pak hižo mócna skupina politikarjow CDU na zwjazkowej runinje protestuje. Z AfD a Lěwicu CDU wězo njerěči. Čehodla jako najsylniša strona swoju sylnosć w tym njepokazaja, zo wšě strony na rozmołwu njeproša – a po zetkanju na přikład ze zastupjerjemi AfD jasnje wopodstatnja, čehodla z nimi woprawdźe kooperować njemóžeš? Samo w gmejnach katolskich Serbow je štwórćina wolerjow za AfD hłosowała. Z tym dyrbiš so na wyšim niwowje rozestajeć hač wěčnje wospjetować, zo je to zahubny wotum. Marcel Brauman