Předsyda Łužiskeho burskeho zwjazka Jurij Bjermich narodźi so 23. žnjenca 1884 do ratarskeje swójby w Haslowje. Wón ratarješe w ródnej wsy a podpěraše po kóncu Prěnjeje swětoweje wójny narodne hibanje Arnošta Barta-Brězynčanskeho a pozdźišo srjedź dwacetych lět 20. lětstotka małoburske hibanje. Załoži sobu z Hermannom Sykoru z Delnjeje Hórki 1926 Łužiski zwjazk a přewza po smjerći Sykory funkciju předsydy zwjazka, zasadźujo so aktiwnje za socialne a narodne prawa serbskich małoratarjow. Pjeć lět bě zwjazkej aktiwnje předsydarił. Wón podpisa z dalšimi nawodami burskich zjednoćenstwow Sakskeje namołwu za Krajny kongres dźěławych w Drježdźanach, wobdźěli so na hłownej zhroma­dźiznje ­Cyłoněmskeho burskeho zwjazka w nazymniku 1928. Tam bu do jeho nawodnistwa wuzwoleny. 1929 bě delegat na Mjezynarodnym kongresu antifašistow w němskej stolicy a 1930 bě delegat Europskeho burskeho kongresa w Berlinje. Po 1933 bě z dowěrnikom Domowiny a podpěraše ju tež ilegalnje po jeje zakazu 1937. Po 1945 bě zaso aktiwnje w Domowinje a w Zjednoćenstwje mjezsobneje ratarskeje pomocy – VdgB. Bjermich zemrě 6.

Nałožk łapanja kokota pěstuja w Delnjej Łužicy tež dźensa hišće po starodawnym wašnju – z woprawdźitym kokotom. Tež w Strobicach blisko Choćebuza zwaži so lětsa šěsć njebojaznych młodych muži do wubědźowanja. Jich přewodźeše dźesać młodych žonow w serbskej drasće kaž tež zastupjerjo wšelakich wjesnych towarstwow. Na kóncu wudoby sej Max Behla hłowu honača a tak titul žnjenskeho krala. Hižo mnohe lěta zakituje wón tute čestne zastojnstwo. Konje, na kotrychž jěchachu ­młodźency lětsa přez čestne wrota, bě jim konjacy dwór w Běłej Górje k dispoziciji stajił. Foto: Michael Helbig

Drježdźany (dpa/SN). Dźensa drje njejsu temperatury hišće tajke wysoke, ale přichodne dny wone zaso zaměrnje stupaja. Tole wuskutkuje so wězo tež na suchotu w lěsach a z tym zwisowace riziko lěsnych wohenjow. Wosebje w kónčinach wokoło Lipska wočakuja hač do kónca tydźenja jara wysoke riziko. W zbytku swobodneho stata su přiwšěm wysoke riziko připowědźili, ale wón nima nadměru strašny być. Lěćne temperatury traja hišće dlěje.

Kuriozne swětowe mišterstwa powětrowych gitarow dobył je Zachary Knowless z Kanady w finskim Oulo. Wón přesadźi so přećiwo 15 konkurentam. Němski wobdźělnik Patrik Culek wobsadźi njedźakowne štwórte městno. Wubědźowanje napodobnjeneho wirtuozneho hraća gitary přewjeduja tam wot lěta 1996. Jenož 2020 a 2021 dyrbjachu festiwal korony dla wotprajić.

Dźiwje huso je so pytajo za picu do bydlenja w Kielu zabłudźiło. Wobsedźer njewědźeše sej žiweje rady a wołaše policiju wo pomoc. Jako zastojnicy přijědźechu, bě huso cyłu kuchnju přeborkało a wotpowědny chaos zawostajiło. Po krótkej honjeńcy po bydlenju móžachu zwěrjo popadnyć a do přikrywy zawalić. Při rěce w nutřkownym měsće je wusadźichu. Tuchwilu hišće prawje njewědźa, kak je huso do bydlenja přišło.