Washington/Tel Aviv/Gaza (dpa/SN). Wójsko USA powjetši hladajo na wočakowany nadběh Irana swoju prezencu na Bliskim wuchodźe. Zakitowanski minister Lloyd Austin je wukazał, zo ma so z atomowym motorom wuhotowany nurjak „USS-Georgia“ do regiona podać. Nimo toho měli lětadłonošak „USS Abraham Lincoln“ a čołmy nurjak přewodźeć a tak jeho transit do regiona pospěšić. Tole zdźěli centrala wójska Pentagon.

Mjenowany lětadłonošak ze swojimi modernymi jetami typa F-35 přidruži so hižo w regionje přebywacej skupinje lětadłonošaka „USS Theodore Roosevelt“. W rozmołwje ze swojim israelskim kolegu w zastojnstwje bě minister Austin hladajo na „eskalěrowace regionalne napjatosće“ hišće raz winowatosć USA wu­zběhował, „kóždy móžny krok nastupić, Israel zakitować“, rěka w zdźělence Pentagona dale. Galant warnowaše w mje­zyčasu hižo režim w Iranje kaž tež libanezisku Hisbollah-milicu před wulkim nadběhom na Israel. Po zamordowanju wažneju funkcionarow Hisbollyh a Hammas běštej Iran a Hisbollah nadpady na Israel připowědźiłoj.

Mnohe wjeski dyrbjachu blisko grjekskeje stolicy hižo ewakuěrować

Athen (dpa/SN). Grjekskej wohnjowej woborje njeje so poradźiło wulki woheń, kotryž howri wot wčerawšeho popołdnja blisko Athena, zhašeć. Wobydlerjow ­dwanaće wjeskow wokoło městow Marathon a Penteli napominachu z pomocu SMS swoje domske wopušćić, zdźěli rěčnik wohnjoweje wobory w grjekskim rozhłosu.

„Ručež słónco schadźa, chcemy 29 hašenskich lětadłow a helikopterow za­sadźić“, wón přida. Penteli je něhdźe 15 kilometrow, Marathon něhdźe 30 wot grjekskeje stolicy zdaleny. Grjekske me­dije wo tym rozprawjeja, zo dyrbjachu wuchowanske mocy mnohich ludźi z ćežemi dychanja do chorownjow donjesć. Tež dwě chorowni dyrbjachu ewakuěrować, zdźěli knježerstwo.

Dokelž woheń mócnje kuri, běše Athen hodźiny dołho husće zakurjeny. Něhdźe 100 kilometrow daloko saha kur nětko hižo a je połkupu Peloponnes docpěł, wo tym wobydlerjo rozprawjeja.

Pisane chorhoje, čorne kapy, mjez nimi policija. „Ost-, Ost-, Ostdeutschland!“ so woła po hasach Budyšina. Fokus medijow leži znowa na sprjewinym měsće. Zaso raz su prawicarjo PR za tutu kónčinu cyle na wuchodźe, za prowincu. Strach jako zakładne začuće při demonstraciji za queerne žiwjenje. To, štož měło poprawom ­wjesołe zarjadowanje być, bě zaso raz bój přećiwo brunej nadmocu. Reprezentacija mjeńšinow, wšojedne hač seksualnych abo narodnych, je substancielny podźěl našeje demokratije. Škit tutych mjeńšinow runje tak. Budyšin je dobry přikład za to, zo na škiće hišće klaca. Čehodla dowoli wokrjesny zarjad zarjadowanja nacio­nalsocialistisce zmyslenych skupinow? Wulki wliw AfD we wokrjesnym sejmiku je snano jedna přičina za to. Budyšin ­nima jenož problem z naci­jemi, Budyšin jich ­aktiwnje wita. De­monstracije sobotu su jasne znamjo za to. Situacija bywa dale a strašniša. Strach přiběra. Maximilian Gruber

Awstriski předewzaćel Richard Lugner je njeboh. Rodźeny Wienjan zemrě dźensa, póndźelu w starobje 91 lět. Tole wobkrućichu jeho swójbni. Znaty bě Lugner wosebje za swoje derje inscenowane wustupy na operowym balu we Wienje, na kotrež jeho často hwěžki z Hollywooda přewodźachu. Hakle w juniju bě so Lugner šesty raz woženił, z 42lětnej Simone Reiländer.

W měsće Cairns na sewjeru Awstralskeje je helikopter na třěchu hotela zrazył. ­Pilot při njezbožu swoje žiwjenje přisadźi, zdźěli policija zwjazkoweho stata Queensland. Dźěle hotela „Double Tree by Hilton“ so po zražce zapalichu. Hotel leži při Esplanade, woblubowanej po­brjóžnej promenadźe. Na terrainje je lětanje zakazane. Firma, kotrejž helikopter słušeše, zdźěli, zo njebě lět helikoptera dowoleny.