Kotre konkretne wuslědki za naš wšědny dźeń maja prawidłowne mjeńšinopolitiske kokanja zastupjerjow domoródnych mjeńšin Němskeje a „wulkeje politiki“ w Berlinje? Žane. Tohodla so lědma štó w Serbach woprawdźe za mjeńšinowu politiku zajimuje. Najebać to su tajke wuradźowanja wažne, wone tomu słušeja, štož so „pěstowanje politiskeje krajiny“ mje­nuje. Dokelž nazhonjenja serbskeho ludu w stawiznach na to pokazuja, zo njeje wšojedne, hač stat z nami derje měni abo nic. Před sto lětami su Serbske Nowiny wo to wojowali, zo njeby stat Serbam hižo tak škodźał. Dźensa diskutujemy wo wysokosći spěchowanja serbskeje rěče a kultury z dawkowych srědkow stata. A wo hustodosć skerje symboliskim wurazu našeje runoprawnosće. Komu je na přikład wažne před sudnistwom serbować móc? Ale derje, zo je tajke něšto móžno – a snadź budu přichodnym generacijam wěcy wažniše, kotrež nas tuchwilu za naše serbske žiwjenje njezajimuja. Marcel Brauman

Erkner (dpa/SN). Wjacore sta ludźi su minjenu sobotu po informacijach zarjadowarja w Erkneru pola Berlina přećiwo planam awtotwarca Tesla z USA nastupajo rozšěrjenje zawoda w Grünheide protestowali. Dźe wo to, zo chcedźa dalši lěs pušćić, rjekny Manu Hoyer wot wobydlerskeje iniciatiwy w Grünheide. Berlinska klimowa aktiwistka Karolina Drzewo rjekny, zo je mjeztym tež w Berlinje tójšto ludźi, kotřiž so wody dla starosća. Z narěčemi a podiumowymi diskusijemi zarjadowarjo pod hesłom „Tesli honač zawjertnyć“ na swoje wobmyslenja skedźbnichu.

Tesla chce na susodnej ležownosći ­zawoda swójske zawodowe dwórnišćo, płoniny za logistisku a zawodowu pěstowarnju natwarić, dokelž wobstejace płonicy za to njedosahaja. Gmejnska rada w Grünheide bě w decembru 2022 z wjetšinu za nastajenje noweho twarskeho plana hłosowała. Awtotwarc móže nětko płoninu sto hektarow kupić. Za to dyrbja dalši lěs pušćić.

Wosom literskich karanow piwa wšědnje wupije Günter Werner na oktoberskim swjedźenju w Mnichowje – a to mjeztym 64 lět. Lětsa je wón swoje 80ćiny woswjećił a nětko rozmysluje, snano jenož hišće kóždy druhi dźeń na naj­wjetši ludowy swjedźeń swěta přińć. Hižo wjele lět sedźi Werner na krutym městnje za blidom 180 w stanje „Schottenhamel“ w času mjez 12 a 23 hodź.

Na wšě 35 000 eurow płaći rjedźenje Braniborskich wrotow w Berlinje, po tym zo běchu klimowi aktiwisća sławny symbol němskeje stolicy z oranžowej barbu namórali. Hač do kónca tydźenja chcedźa barbu dospołnje z pěskowca wotstronić, štož je hladajo na strukturu materiala wobćežne. Aktiwisća běchu Braniborske wrota njedźelu popryskali. Hišće samsny dźeń běchu započeli, je wurjedźić.

Budyšin (SN/MiP). Tež lětsa zaso běše Friedricha Ebertowa załožba na Budyski forum přeprosyła – mjeztym hižo 34. raz. Móhłrjec zwjazowacy element wšelakorych zarjadowanjow zańdźeny štwórtk a pjatk běše Ruska respektiwnje Sowjetski zwjazk. Pjatkowniša podiumowa diskusija steješe pod hesłom: Němsko-sowjetske přećelstwo? (Wuchodo-)němski wid na Rusku. Za dwuhodźinske kónčne zarjadowanje foruma to jara wobšěrna tema – Berlinska žurnalistka a moderatorka zarjadowanja Tamina Kutscher pak njeje jenož wěsće a zabawnje žiwu diskusiju wodźiła, ale je něhdźe 80 zajimowanym připosłucharjam zdobom zjeće a wěcownu analyzu wšelakich komentarow podawała.