CDU zahaji kampanju za kontrolu mjezy
Podstupim (dpa/SN). Podpismowa akcija pjeć wokrjesnych zwjazkow CDU na dobro krutych kontrolow podłu němsko-pólskeje mjezy zbudźa kritiku tamnych politiskich stron. Wokrjesne zwjazki na juhowuchodźe zwjazkoweho kraja žadaja sej pomjezne kontrole, spěšniše azylowe jednanja a konsekwentne wotsunjenje požadarjow wo azyl bjez perspektiwy na trajne přebywanje w Němskej. Krajny zwjazk CDU žadanja křesćanskich demokratow wokrjesow Dubje-Błóta, Sprjewja-Nysa, Hornje Błóta-Łužica, Wódra-Sprjewja a Choćebuz podpěruje.
Nutřkowny minister Michael Stübgen (CDU) žada sej hižo dlěši čas krute pomjezne kontrole. Wón je připowědźił, ze sylnišej prezencu policije ćišć na pašowarjow ludźi zwyšić. Po informacijach nutřkowneho ministerstwa su kontrolne akcije minjeny tydźeń zahajili. CDU pak tole njedosaha. Frakciski šef CDU Jan Redmann kritizuje w tym zwisku zwjazkowu nutřkownu ministerku Nancy Faeser (SPD), kotraž pomjezne kontrole wotpokazuje. „Nastanje zaćišć, zo ministerka połoženje při mjezy chutnje dosć njebjerje“, wón rjekny.
Biden: „Póńdu nětko do łoža“
Washington (dpa/SN). Republikanski předsyda Domu reprezentantow USA Kevin McCarthy je přepytowanja za móžny proces wotsadźenja přećiwo prezidentej Joewej Bidenej zahajił. Wón ma „wěrjomne dopokazy, zo bě Biden na ilegalnych pjenježnych akcijach swojeho syna wobdźěleny“, rjekny McCarthy wčera we Washingtonje. „Konkretnje dźe wo wumjetowanja nastupajo znjewužiwanje zastojnstwa, zatajenje njeskutkow a korupciju, kotrež sej dalše přepytowanja žadaja“, McCarthy rjekny. „Tohodla sym wuběrkej dźensa přikazał, formelne přepytowanja přećiwo Joewej Bidenej k móžnemu wotsadźenju zahajić.“
Krok McCarthyja je změna strategije. Dotal bě wón stajnje rjekł, zo jedna so wo formelne přepytowanja přećiwo Bidenej. Hač z toho konkretne kročele do směra na wotsadźenje prezidenta slěduja, bě stajnje njewěste. Nimo toho wšak dyrbi kongres na kóncu wo wotsadźenju rozsudźić. Tam maja demokraća Bidena snadnu wjetšinu.
Měnjenje swobodne
EU přepytuje subwencije Chiny
Straßbourg (dpa/SN). Europska unija zahaja přepytowanja statneje podpěry Chiny za twarcow elektroawtow dla. „Płaćizna tutych awtow je hoberskich statnych subwencijow dla kumštnje znižena, tole zawinuje skomolenja europskich wikow“, rjekny prezidentka komisije Europskeje unije Ursula von der Leyen dźensa w Europskim parlamenće w Straßbourgu. To njeje akceptabelne. Swětowe wiki su wot tunich chinskich elektroawtow tuchwilu „zapławjene“, wona rjekny.
Přepytowanja subwencijow dla móža mjez druhim k tomu wjesć, zo žadaja sej přichodnje chłostanske cła na tute awta. Tuchwilu we wjacorych hospodarskich wobłukach na tym dźěłaja, wotwisnosć EU wot statow kaž Chiny znižić a domoródne předewzaća podpěrować. W měrcu bě komisija EU naćisk zakonja k zastaranju ze surowiznami předstajiła. Z nim chcedźa zaručić, zo njewostanje EU pola wažnych surowiznow wjace wot jednotliwych krajow kaž Chiny wotwisna. Europa je hospodarskemu wubědźowanju a dobrym stykam k Chinje wotewrjena, von der Leyen potwjerdźi. „Dyrbimy pak so njefairnemu zadźerženju wobarać.“
To a tamne (13.09.23)
Antikske narowne kamjenje z Jemena su we wobchodźe meblow w Londonje namakali. Kamjenje słužachu předawanišću jako dekoracija. Kupc bě policiju informował. Zastojnicy zwěsćichu, zo jedna so wo dźěle antikneho rownišća, kotrež bu loni wurubjene. Wobsedźer wobchoda kamjenje policiji přewostaji, zo móhła je Jemenej wróćić.
Tunl do twarjenja wyšeho sudnistwa Montenegra su njeznaći w stolicy Podgorica ryli. Objekt saha hač do komory, w kotrejž składuja dokumenty sudniskich jednanjow. Prawdźepodobnje pak ničo njepobrachuje. Tunl su sobudźěłaćerjo skerje připadnje namakali. Zamołwići su sej wěsći, zo chcychu kriminelne cwólby jatych ze sudniskeje žurle wuswobodźić a jim ćěkanje zmóžnić. Organizowana kriminalita je w Montenegru přewšo rozšěrjana.
Zelenskyj nadźija so pomocy
Kijew (dpa/SN). Po zetkanju z němskej wonkownej ministerku Annalenu Baerbock (Zeleni) w Kijewje je ukrainski prezident Wolodymyr Zelenskyj hladajo na dalšu wojersku pomoc Němskeje optimistiski. Je wažne, zo partnerojo wo potrěbnosćach Ukrainy a jeje wojakow a nastupajo škit energijoweje infrastruktury zhonja, rjekny Zelenskyj w swojim wječornym widejowym poselstwje. Zelenskyj je sej wěsty, zo dóńdźe k wuslědkam.
Biden namołwja k jednoće
Anchorange (dpa/SN). Prezident USA Joe Biden je składnostnje róčnicy terorowych nadpadow 11. septembra 2001 kraj k jednoće namołwjał. Zjednoćene staty njesměli začuće narodneje jednoty nihdy zhubić, rjekny Biden na wojerskim zepěranišću w zwjazkowym staće Alasce na wopominanskim zarjadowanju k 22. róčnicy nadpadow. Ataka je kraj swój čas zjednoćiła, Biden rjekny. Dźensa su USA politisce pačene, kaž nihdy do toho.
Trump chce sudnicu wotwołać
Po dźewjeć dnjach su w Turkowskej na ekspediciji ćežko schorjeneho ...
Hamor wobara so zetkanju reichsbürgerow
Hamor (AK/SN). Ze wšej mocu chce so Hamorska gmejna wot reichsbürgerow planowanemu zarjadowanju „100 lět Bjerwałdski hród + 11 lět kralowstwo Němska“ wobarać, kotrež ma so kónc tydźenja z něhdźe 500 hosćimi wotměć. Tak mjenowane Kralestwo Němska z iniciatorom Peterom Fitzekom na „wiki“ a „zetkanje w syći splećenych“ mjenowane zarjadowanje přeprošuja. Při tym chcedźa projekt „Bjerwałdska wjes zhromadnosće“ předstajić a tam swjedźensku halu poswjećić.
Pomocnicy po puću do Libyskeje
Přećiwo kumštnej płaćiznje
Dźěłarnistwo ver.di warnuje před socialnym njeměrom miliny dla
Berlin (dpa/SN). Předsyda posłužboweho dźěłarnistwa ver.di, Frank Werneke, je so přećiwo jenož za industriju potuńšenej płaćiznje miliny wuprajił. „Wot ryzy industrijneje płaćizny miliny móžu politisce zamołwitym jenož wotradźić“, rjekny Werneke nowinarjam. Tež priwatne domjacnosće a socialne institucije dyrbjeli do statnje wurunaneje płaćizny miliny zapřijate być. „By hoberski potencial socialneho njeměra měło, by-li wobydler, kiž ze zakonskej minimalnej mzdu runje tak běžny měsac zmištruje, za milinu 35 centow za kilowattnu hodźinu płaćić dyrbjał, hdyž wulkoindustrija z pomocu statnych subwencijow jenož pjeć abo šěsć centow płaći“, Werneke rjekny. „A akcionarow koncernow potom tež hišće dale posłužuja“, wón doda.
