Biden wotpalene město wopytał
Globalne poměry mocy změnić
Johannesburg (dpa/SN). Zwjazk pjeć razantnje so wuwiwacych hospodarstwow swěta Brics zetkawa so wot dźensnišeho na swój 15. wjeršk w južnoafriskej hos-podarskej metropoli Johannesburg. W srjedźišću wjerškoweho zetkanja, kiž traje hač do štwórtka, steji rozšěrjenje skupiny. Dotal přisłušeja zjednoćenstwu statow Brazilska, Ruska, Indiska, China a Južna Afrika. Nětko chce zwjazk dalše kraje přiwzać. Na wotpowědne kriterije čłonstwa chcedźa so dojednać. Dotal je wjace hač 40 krajow wo přiwzaće do skupiny Brics prosyło, mjez nimi Argentinska, Sawdi-Arabska, Zjednoćene arabske emiraty, Algeriska, Egyptowska, Iran, Venezuela a Thailandska.
Na wjeršk w Johannesburgu wočakuja chinskeho prezidenta Xi Jinpinga, brazilskeho prezidenta Inácia Lulu da Silvu, južnoafriskeho prezidenta Cyrila Rama-phosu a indiskeho premiera Narendra Modija. Rusku zastupuje wonkowny minister Sergej Lawrow. Staty Brics chcedźa globalne poměry mocy změnić, kotrež postajetej dotal USA a zapadny swět.
Mjeza poćežowanja docpěta
Zarjady za wukrajnikow wočakuja nawal próstwow wo staćanstwo
Drježdźany (dpa/SN). Wobdźěłanje próstwow wo spožčenje němskeho staćanstwa zarjadnišća w Sakskej lědma hišće dočinja. Komuny so boja, zo so tak a tak hižo dołhe časy wobdźěłanja z nowym zakonjom wo staćanstwje hišće podlěša, naprašowanje powěsćernje dpa pokazuje.
Zarjadnišća za spožčenje staćanstwa dźěłaja na mjezy poćežowanja a steja „praktisce krótko před kolapsom“, rjekny sakski społnomócnjeny za naležnosće wukrajnikow Geert Mackenroth (CDU). Zdźěla lěta dołhe čakanske časy njejsu akceptabelne. „W Lipsku, Drježdźanach a Kamjenicy čaka druhdy wjace hač tysac próstwow na wobdźěłanje. Tež na někotrych krajnoradnych zarjadach traje wobdźěłanje próstwow zdźěla 21 měsacow“, Mackenroth rjekny.
Po informacijach nutřkowneho ministerstwa Sakskeje su loni 2 276 ludźom němske staćanstwo spožčili. Lěto do toho bě jich 1 913. Z wotstawkom najwjace nowych staćanow pochadźa ze Syriskeje (790). Slěduja Ukrainjenjo (202), Vietnamjenjo (98), bjezstatni (75), Irakčenjo (69), Polacy (67), Rumunojo (58) a Rusojo (57).
W rěčacym štomje přeća zwuraznili
To a tamne (22.08.23)
Třoch wurubjowarjow pjenježnych awtomatow zajała je policija w sewjerorynsko-westfalskim Alpenje – z pomocu policajskeho psa. Do toho běchu mužojo pjenježny awtomat w měsće rozbuchnyli a na to ze „sylnje motorizowanym awtom“ ćeknyli, policija zdźěla. Zo bychu jich zadźerželi, połožichu zastojnicy desku z hozdźemi na jězdnju. Najebać rozkałane wobruče skućićeljo dale ćěkachu, zrazychu do wobhrodźenja a ćěkachu pěši dale. Psyk jich skónčnje na pobrjoze jězora w kerčinje wučušli.
Na awtodróze A 4 zawróćiła je so 48lětna žona kónc tydźenja mjez Hornim Wujězdom a Słonej Boršću. Přičina bě haćenje wobchada palaceho so nakładneho awta dla. Po tym wužiwaše tež hišće wuchowansku šćežku mjez awtami, zo by přichodny wujězd docpěła. Policija žonu z Němskeje zadźerža a ju wobskorži.
Wojacy dušepastyrsce zastarani
Rukla (B/SN). Z 1 500 wojakow z wosom narodow wobsteji bojowniska skupina w Litawskej, skutkowaca na wuchodnej fronće wojerskeje aliancy NATO, 800 z nich přisłuša Zwjazkowej woborje Němskeje. Wojacy přebywaja tam stajnje poł lěta. Wo nich starataj so katolski a ewangelski farar. Litawscy wobydlerjo su dźakowni, zo jich wójsko před móžnymi nadběhami škita.
Swjaty kraj bjez křesćanow?
Jerusalem (B/SN). Ewangelska fararka na Jerusalemskej Wolijowej horje Johanna Haberer, přebywaca tam na wotpočinku, je zwěsćiła, zo su křesćenjo w Israelu z 1,6 procentami ludnosće jenož hišće mjeńšina. Po jeje słowach budźe Swjaty kraj podobnje kaž Syriska a Irak na zakładźe přesćěhanja bórze bjez křesćanow, dokelž jich dźeń a wjace wupućuje.
Přewodźeja mrějacych
Skóržba wotpokazana
Mainz (dpa/SN). Krajne sudnistwo w Mainzu je skóržbu žony móžnych strowotniskich škodow po šćěpjenju přećiwo koronawirusej dla wotpokazało. Wopodstatnjenje chcedźa pozdźišo pisomnje posrědkować. Skoržaca žona ma kóšty sudniskeho jednanja přewzać, sudnicy w ciwilnym procesu dźensa zdźělichu. Prawiznicy žony chcedźa nětko na wyšim krajnym sudnistwje w Koblenzu rewiziju zapodać. Žona žada sej wotškódnjenje, dokelž bě po šćěpjenju 2021 słuch zhubiła.
Trump na debatu njepřińdźe
Washington (dpa/SN). Nowa telewizijna debata w předwólbach republikanow USA do prezidentskich wólbow wotměje so bjez bywšeho prezidenta USA Donalda Trumpa. „Zjawnosć wě, štó sym a kajke wuspěšne prezidentstwo sym měł“, piše Trump na swojej internetnej stronje. „Tohodla so na debatach njewobdźělu“. To rěka, zo dyrbja so nimo diskusije zajutřišim, srjedu, tež wšitke dalše debaty bjez Trumpa wotměć. Bywši prezident we woprašowanjach tuchwilu nawjeduje.
Start rakety wobkedźbował
Zelenskyj dźakuje so za lětadła F-16
„Luna“ zwrěšćiła
Linnemann: Wažne měsacy za CDU
Berlin (dpa/SN). Generalny sekretar CDU Carsten Linnemann je sej wěsty, zo steji strona před „ekstremnje wažnymi“ měsacami a wuhibkami. „Koliki, kotrež nětko zabijemy, su centralne“, rjekny wón powěsćerni dpa hladajo na nowy zakładny program strony. „Zakładny program dyrbi sedźeć. To je za wuspěch CDU přewšo wažne.“ Naćisk ma hižo kónc lěta předležeć. W januaru chce jón zwjazkowe předsydstwo schwalić. Potom čłonojo strony wo nim diskutuja a na zwjazkowym zjězdźe w meji wobzamknu, Linnemann w tym zwisku připowědźi.
Generalny sekretar programowu a zakładnu komisiju CDU nawjeduje. „Rozsudne je, zo je CDU tematisce spóznajomna. Što by było, by-li CDU absolutnu wjetšinu měła? Ludźo dyrbja wědźeć, što by potom na nich přišło.“
Čłon prezidija CDU Jens Spahn žada sej wot swojeje strony lěpšu zhromadnosć. „Nam pobrachuje hišće mustwowe nastajenje. Chcemy-li 2025 dobyć, dyrbimy so wšitcy za to horić a sej mjez sobu pomhać“, rjekny Spahn nowinarjam hladajo na wólby zwjazkoweho sejma 2025. Unija ma tuchwilu 27 procentow.
