Magdeburg (dpa/SN). Na zwjazkowym zjězdźe w Magdeburgu je AfD dźensa wo móžnych změnach wustawkow wuradźowała a nowych čłonow za nutřkostronske změrcowske sudnistwo woliła. Jutře chcedźa delegaća Europske wólby přihotować, kotrež wotměja so 9. junija 2024. Hladajo na wólbne woprašowanja, při kotrychž docpěwa strona tuchwilu hač do 22 procentow, chcedźa dosahowacu ličbu kandidatow wuzwolić. Přichodny pjatk chcedźa ze zjězdom pokročować. Přewodźane je zetkanje strony w stolicy Saksko-Anhaltskeje wot wjacorych přećiwnych demonstracijow.

Berlin (dpa/SN). Přeńdźenjow přećiwo klimowym aktiwistam skupiny Poslednja generacija dla su po informacijach sćelaka RBB po wšej Němskej dotal wjace hač sto sudniskich jednanjow přećiwo šoferam awtow a pěškam zahajili. Wot cyłkownje 142 přepytowanjow wobdźěłuja jeničce 99 z nich w stolicy Berlinje. W najwjace padach dźe wo ranjenje ćěła. Dalše wumjetowanja poćahuja so na nuzowanje a werbalne ranjenja. 70 padow njejsu hišće wotzamknyli.

Při tym dźe po informacijach rozhłosa wo pad, w kotrymž bě muž hladajo na blokadu při Hermannowym naměsće w Berlinje spytał, ruku aktiwista ze zapalowakom zranić. W dalšim padźe bě wobskorženy spytał, aktiwistku z dróhi storhnyć, byrnjež ruka žony hižo přilěpjena była. Kedźbnosć zbudźił bě tež šofer nakładneho awta, jako demonstranta wjacore metry před sobu storkaše. Statne rěčnistwo pruwuje, hač njeměli někotre pady jako wobaranje w nuzy zastopnjować. Tak njebychu chłostajomne byli. Tole pak njeje dotal hišće w žanym padźe přitrjechiło. Poslednja generacija wot lěta 2022 stajnje zaso dróhi blokuje.

Njewěm dokładnje, kelko kwadratnych metrow ma měć dźěćo k dispoziciji, hdyž je w dźěćacym dnjowym přebywanišću zaměstnjene. Wěm pak, zo njeje ženje ruma dosć za wšitko to, štož sej kubłarki přeja a dźěći trjebaja. Tak so dźiwachu, jako bu „Chróšćan kołć“ wotewrjeny, zo bě za mjenje dźěći planowany, hač mějachu swój čas kubłarki chowancow hladać a kubłać. Wězo, nichtó njemóže ze škleńčaneje kule wěsćić, kak so ličby porodow wuwija. Tola w Serbach je wočiwidne, zo nimaja młode swójby jenož jedne abo dwě, ale wjace dźěći. Trend to, kiž wostawa. Tuž by mi lubo było, bychu planowarjo zwoprědka móžnosć měli nowotwar wulkomyslniši zapołožić. Mam tež hnydom ideje, kak hodźała so přidatna městnosć wužiwać, prjedy hač je snadź stupaceje ličby dźěći dla trěbna. Jednu rady přeradźu: zeleny paradiz pod škleńčanej třěchu, kotraž hodźi so wočinić. Ale wěm: Mamy zakonje! A zwotkel trěbne centy za fantaziju brać? Milenka Rječcyna

Gumijowy had je w hessenskej stolicy Wiesbadenje zasadźenje wohnjoweje wobory zawinował. Pěšk bě telefonisce wo strašnym jědojtym hadźe w kerku rozprawjał. Na to přijědźe wohnjowa wo­bora ze specielnym jězdźidłom z wose­bitymi klěšćemi, hokami a krutymi ­rukajcami. Spěšnje pak so wukopa, zo bě jědojty had z gumija. Wobornicy wzachu namakanku sobu, zo njeby so nichtó wjace nastróžił. Ludźo pak njech wostanu najebać to kedźbliwi: Stajnje zaso su strašne reptilije w přirodźe.

W płašću duchowneho je 20lětny muž w hornjobayerskim Eglhartingu 19lětneho młodostneho z křižom w ruce bił a zranił. Mužej běštaj so na dwórnišću města zwadźiłoj. Při tym dźěše wo žonu. Policija z toho wuchadźa, zo je 20lětny stolu duchowneho a křiž w cyrkwi pokradnył. Policija skućićela zaja.