Wjace turistow
Mjenje twarskich dowolnosćow
Wiesbaden (dpa/SN). Tež w meji su w Němskej zaso mjenje twarskich dowolnosćow za bydlenja přizwolili hač samsny čas loni. 23 500 bydlenjow, to je 25,9 procentow mjenje hač loni, statistiski zwjazkowy zarjad wčera we Wiesbadenje zdźěli. Hłownej přičinje stej po měnjenju statistikarjow dale přiběrace twarske kóšty a njepřihódne wuměnjenja financowanja. Wosebje raznje je ličba twarskich dowolnosćow za dwuswójbne domy woteběrała, kotrychž ličba je wot januara hač do meje na połojcu (minus 53,5 procentow) spadnyła. Pola jednoswójbnych domow wučinješe minus 31,1 procent přirunujo z lońšim lětom, a pola wjaceswójbnych domow 26,5 procentow. Prěnje pjeć měsacow bě ličba twarskich dowolnosćow cyłkownje wo 27 procentow niša hač loni. Politisce wukazany zaměr 400 000 nowych bydlenjow wob lěto so tak dale a bóle wotsaluje. Socialny bydlenjotwar měł so nuznje spěchować, zo njebychu so twarske zawody zwjezli.
Zwjazki twarskeje industrije žadaja sej powabki za inwesticije. Nimo toho měło so pruwować, hač njemóhli na wobstejace twarjenja dalše poschody nastajić.
Zapósłanča w „Serbskim kolektiwnym běrowje“
Grodk (SN). Byrnjež ani meble w nastawacym Serbskim kolektiwnym běrowje w Grodku njestałe, wotmě so minjenu sobotu prěnja wuměna ze zapósłanču zwjazkoweho sejma. Maja Wallstein (SPD) informowaše so wo serbskich projektach w zwisku ze strukturnej změnu kaž tež wo aktualnych aktiwitach Łužiskeho instituta (LI). Předewšěm zajimowaše so wona za třidimensionalne nahrawanske metody.
„Tradiciju a modernu techniku zwjazać je nadawk našeho projekta ‚Walorizacija imaterielneho herbstwa w němsko-serbskim konteksće‘“, rozłoži wobhospodarjer běrowa Daniel Häfner (LI). „Podpěramy wuwiće nowych wudźěłkow a posłužbow ze zaměrom, zo móhli akterojo je tež z dobytkom zwičnić.“
To a tamne (19.07.23)
Čerwjeny konopej, na kotrymž měješe znaty kabaretist Loriot (1923–2011) něhdy swoje prěnje wulke telewizijne wustupy, steji nětko w muzeju. Wopytowarjo Stuttgartskeho Domu stawiznow smědźa so přichodnje we wěstym času samo wosobinsce na křesło w Biedermeierowym stilu sydać. Póndźelu su wulki mebl přiwjezli. Hłowna přičina su 100. narodniny humorista 12. nowembra.
Wosamoćeny kófer před zwjazkowym financnym ministerstwom w Berlinje je wčera wječor zasadźenje policije zawinował. Kófer běchu jako strašny zastopnjowali, na čož je policija Wilhelmowu a Lipšćansku dróhu w dalokej měrje zaraćiła. Kriminalni technikarjo zasadźichu mjez druhim roboter, kiž kófer rozbuchny. We wačoku pak běchu jenož „wosobinske wěcy wšědneje potrjeby“. Komu kófer słuša, njemóžachu zwěsćić.
EU wumjetuje Ruskej
Brüssel (dpa/SN). Europska unija je Rusku wupowědźenja mjezynarodneho zrěčenja wo dodawanju ukrainskeho žita dla zasudźiła. „Z tutym rozsudom přiwótřa Ruska swětowu krizu wěstoty zežiwjenja, kotruž bě ze swojej nadpadniskej wójnu přećiwo Ukrainje a blokadu ukrainskich mórskich přistawow zawinowała“, rjekny społnomócnjeny EU za wonkowne naležnosće Josep Borrell w mjenje čłonskich statow. Ruska dyrbjała blokadu přistawow hnydom zběhnyć.
Chorownje we wuskosćach
Mnichow (dpa/SN). Financne połoženje chorownjow Němskeje je po najnowšim přepytowanju kritiske. Po dźensa wozjewjenym woprašowanju Mnichowskeje poradźowarnje předewzaćow Roland Berger w šefowych etažach 600 najwjetšich chorownjow tči wjace hač połojca klinikow w čerwjenych ličbach. Wosebje wobćežne je połoženje w zjawnych chorownjach: Nimale dwě třećinje, 63 procentow, nadźěłatej minus. Zamołwići wočakuja přichodne lěta žołmu zawrjenjow.
Hdźe je wonkowny minister?
Po dlěšej suchoće su wčera we wokolinje grjekskeje stolicy Athena ...
W horcoće je přestawka trěbna
Pjeć mortwych při zražce lětadła
Putin hrozy Ukrainje z wjećbu
Moskwa (dpa/SN). Dźeń po rozbuchnjenju na Krimskim mosće je Ruska po swójskich wuprajenjach njedaloko přiswojeneje ukrainskeje połkupy dalši wulki nadpad trutow wotwobarała. Cyłkownje 28 njewobsadźenych lětacych ukrainskich objektow su minjenju nóc wottřělili abo jich planowanu čaru w powětře změnili, zakitowanske ministerstwo w Moskwje zdźěla. Njewotwisne přepruwowanje tutych informacijow njeje móže. Pječa njeje so při nalětach nichtó zranił. Ruski prezident Wladimir Putin je Ukrainje z wjećbu za nalěty hrozył. „Wězo Ruska na to wotpowědnje wotmołwi“, wón rjekny. W zakitowanskim ministerstwje tuchwilu wotpowědne namjety přihotuja. Putin sej žada, wěstotne naprawy za móst na Krimsku połkupu zwyšić.
Po informacijach britiskeje tajneje słužby ukrainska armeja dale spyta, ze swojej ofensiwu ruske jednotki na juhu kraja wróćo stłóčić. Dotal so ruske mocy tomu wobaraja, byrnjež pod špatnym zastaranjom z municiju ćerpjeli. Wobě stronje njestej wjetše wuspěchi docpěłoj.
Hladanje ludźi dale a dróše
Zwjazk narunanskich kasow žada sej dołhodobne rozrisanje
Berlin (dpa/SN). Hladanje w starownjach je dale a dróše. Připłatki ze swójskeje kapsy hladanja potrěbnych a jich swójbnych su hišće raz jasnje přiběrali. Tole je zwjazk narunanskich chorobnych kasow 1. julija w přepytowanju zwěsćił. Prěnje lěto w starowni dyrbjachu wobydlerjo w cyłoněmskim přerězku 2 548 eurow zapłaćić – 348 eurow wjace hač srjedź lěta 2022. Poćežowanje ludźi tak najebać mjeztym zawjedźenych pomocnych připłatkow dale přiběra. Při tym so wyše mzdy za nuznje trěbne hladarki a hladarjow wuskutkuja. Tole tež wudawki za přebywanje, jědź a napoje su dale rozrostli.
W mjenowanej sumje je swójski podźěl za ryzy hladanje zapřijaty. Přetož hladanske zawěsćenje přewozmje – hinak hač chorobne zawěsćenje – jenož dźěl kóštow. Za wobydlerjow starownjow přińdu potom hišće wudawki za přebywanje, zastaranje a inwesticije domu k tomu. Bjez pomocnych připłatkow by kóždy wobydler měsačnje 2 610 eurow płaćić dyrbjał. Jeničce swójski podźěl za hladanje je w běhu dwanaće měsacow wo 281 na 1 245 eurow wob měsac rozrostł.
