To a tamne (10.07.23)
W stilu policajskeho awta je 25lětna žona w Hannoveru swoje awto pomolować dała. Jenož reflektowace folije njeje wona wužiwać směła. Tež wopon a módra swěca běchu tabu, wona zdźěla. Na motorowej hawbje steji wotnětka „Police“ a nic „Polizei“. To je wažny rozdźěl, dokelž njeje design prawnisce škitany. Byrnjež 25lětna wšitke předpisy dodźeržała, je ju policija mjeztym wospjet zadźeržała.
Wosom huškow wuchowała je wohnjowa wobora z dešćikoweje roły w delnjofrankskim Aschaffenburgu. Młodźata běchu so na třěše historiskeho hrodu 22 metrow hłuboko do roły sunyli a njemóžachu so hižo sami wuswobodźić. Sobudźěłaćerka hrodu bě žałosćenje huškow słyšała a wohnjowu woboru zawołała. Wobornicy młodźata z ruku wućahnychu. Starka akciju wobkedźbowaše a so po wuchowanju z huškami zminy.
Žane skrótšenja za załožbu
Strašne bomby Ukrainje
Washington (dpa/SN). Knježerstwo USA chce Ukrainje po informacijach medijow brojacu so municiju přewostajić. Zakitowanske ministerstwo nochcyše drje wotpowědne informacije wobkrućić medijam pak dokumenty předleža. Brojaca so municija nad cilom w powětře rozbuchuje a dalše małe bomby rozdźěluje, kiž potom rozbuchnu. Američenjo běchu tajke bomby we wójnje přećiwo Vietnamje zasadźowali a tak protesty po wšěm swěće zbudźili. Bomby su wosebje mjez ciwilistami wjele woporow zawinowali.
Němske wójsko škita wjeršk
Vilnius (dpa/SN). Štyri dny do wjerškoweho zetkanja NATO w litawskej stolicy Vilniusu su tři za škit zetkanja nastajene baterije powětrowy rum škitaceho systema Patriot zwjazkoweje wobory zasadźenja kmane. Němske wójsko přewozmje z brónjowym systemom a něhdźe 250 wojakami škit wjerška před raketami, ale tež před lětadłami. NATO reaguje tak na přiwótřene wěstotne połoženje, bjez toho zo by pokiwy na wohroženja měło.
Habeck terminal zakitował
Unija chce nowy tepjenski zakoń
Berlin (dpa/SN). Po nachwilnym zadźerženju noweho tepjenskeho zakonja přez zwjazkowe wustawowe sudnistwo žada sej frakcija CDU/CSU nowy start předewzaća. Rozsud sudnikow je ćežka poražka knježerstwa zwjazkoweho kanclera Olafa Scholza (SPD), rěka w namjeće frakcije, wo kotrymž chcyše parlament dźensa wuradźować. Wusud je „jasny wuwołak za prawo zapósłancow“, so ze zakonjemi dokładnje zaběrać. Je to dopokaz, zo njemóžeš škit klimy z namocy přesadźić.
W dokumenće dale rěka, zo njesměł „ćežki dyr z Karlsruhe přećiwo ampli škiće klimy dołhodobnje zeškodźeć“. Tohodla njedosaha, w nowym jednanju samsny zakoń přesadźić. Jenož ze zasadnym nowym započatkom móže politika zhubjenu dowěru zaso wróćo zdobyć. Frakcije koalicije běchu po wusudźe z Karlsruhe potwjerdźili, zo njejsu k změnam zakonja zwólniwe.
AfD zaso sylniša
Dulig kritizuje Kretschmera
Drježdźany (dpa/SN). Sakski minister za dźěło Martin Dulig kritizuje žadanje sakskeho knježerstwoweho šefa Michaela Kretschmera (CDU) za dlěšim dźěłowym časom a wyšej rentowej starobu. „Hdyž sej Michael Kretschmer nětko žada dźěłowy čas podlěšić – derje wědźo, zo ludźo na wuchodźe tak a tak hižo hač do dweju njedźel dlěje dźěłaja hač na zapadźe –, da je to cyniske“, rjekny politikar SPD wčera na naprašowanje nowinarjow. Po słowach Duliga by wo wjele zmysłapołniše było, by-li wjac zawodow w Sakskej po tarifje płaćiło.
Kretschmer bě wčera redakciskej syći Němskeje rjekł, zo dyrbjeli wšitcy hodźinu wob tydźeń dlěje dźěłać, zo bychu so njedostatkej fachowcow spjećowali. „By-li kóždy dźěławy w Němskej hodźinu wob tydźeń dlěje dźěłał, by wulki potencial w boju přećiwo pobrachowacym fachowym mocam nastał.“ Nimo toho trjeba Němska nowe modele dźěłowych časow a wjace powabkow, tež jako wuměnkar hišće dźěłać chcyć. Tež tutón namjet Dulig wotpokazuje: „Dlěši dźěłowy čas a wyša rentowa staroba njepomhatej. Trjebamy lěpše wukubłanje.“
To a tamne (07.07.23)
Mylnje 40 milionow eurow přepokazała je Delnjosakska krajna banka na dospołnje wopačny konto. Sumu chcychu poprawom na wjacore konta banki rozdźělić, na kóncu pak dóńdźechu pjenjezy na konto jednotliweho kupca. Pjenjezy su mjeztym wróćo přepokazali. Prawdźepodobnje je system IBAN z wopačnym kontom zwjazał. Zmylk njemóže so po słowach banki takle wjace wospjetować.
Eksponaty Drježdźanskeje wustajeńcy „Swět NDR“ jutře přesadźuja. Šěsć lět po wotewrjenju přehladki muzej zawru, zdźěli předewzaćel Peter Simmel. „Młodźi ludźo so za stawizny NDR njezajimuja, starši přińdu zwjetša jenož jónu“, Simmel zwěsća. Ličba wopytowarjow je wot spočatnje 80 000 na jenož hišće 15 000 wob lěto woteběrała. Zajim je najebać to wulki: 870 ludźi chce so na internetnym přesadźowanju wobdźělić.
Kühnert za změny etata
Berlin (dpa/SN). SPD chce po słowach generalneho sekretara Kevina Kühnerta wot zwjazkoweho knježerstwo schwaleny naćisk lutowanskeho etata 2024 w zwjazkowym sejmje hišće změnić. „Wězo bjerjemy sej prawo, změny přesadźić“, rjekny Kühnert sćelakej RTL. Planowane skrótšenja staršiskeho pjenjeza a přiražkow za hladanje „takle njewostanu“, Kühnert praji. SPD chcyła socialnemu wottwarej w tutym etaće zadźěwać.
Maut płaći 243 milionow eurow
Berlin (dpa/SN). Zwjazkowy wobchadny minister Volker Wissing (FDP) je trěbne narunanje škody zwrěšćeneho nadróžneho popłatka za wosobowe awta dla we wysokosći 243 milionow eurow „hórku sumu“ mjenował. Politikar FDP při wšěm na to pokaza, zo je Zwjazk škodu wobmjezował, dokelž běchu spočatnje wo 700 milionach eurow rěčeli. Popłatk, prestižny objekt CSU tehdyšeho zwjazkoweho knježerstwa z wobchadnym ministrom Andreasom Scheuerom, bě Europske sudnistwo 2019 zadźeržało.
Planowany zakoń wotpokazali
