Fatalne misnjenje na Filipinach: We wabjenskim wideju je ministerstwo za turizm wo dowolnikow wabiło – z nahrawanjemi z druhich krajow. Zamołwitej agenturje za marketing su mjeztym wupowědźili. Archiwny material pochadźeše z Indoneziskeje, Thailandskeje, Šwicarskeje a arabskich krajow. Agentura je so zamołwiła a přiznała, zo je cuzy material za wabjenski widejo wužiwała.

Swoje koleso při policajskim awće přizamknył je pjany muž w Gubinje. ­45lětny bě koło njedźelu w Gubinje sewjerowuchodnje Choćebuza z dołhim rjećazowym zamkom při awće přiwjazał. Jako pozdźišo po koleso přińdźe, jeho policisća wuhladachu a narěčachu. Na to wućahny muž powětrowu klumpu z nachribjetnika, do zastojnikow biješe a jednoho z nich na ruce zrani. Test alkohola pola 45lětneho wunjese 4,62 promilow.

Hanoi (B/SN). Połsta lět knježi we Vietnamje komunizm. Najebać ćežke wuměnjenja ličba křesćanow rosće. Wulki podźěl na tym ma pastor Barnabas. Wón je so w meji na dnju młodźiny w Erfurće wobdźělił, zo by wo swojej domiznje rozprawjał. W zašłosći běchu we Vietnamje wjele křesćanskich zarjadnišćow a cyrkwjow zawrěli a mnohich dušepastyrjow zajeli. Wot lěta 1988 so křesćenjo zaso bóle za swoju cyrkej angažuja.

Dušepastyrstwo na łódźach

Bonn (B/SN). Po koronje přiběraja dowolowe jězby z łódźu a tak zdobom po­trjeba za dušepastyrstwom. Sekretariat Němskeje biskopskeje konferency jónu wob lěto trěbne městna rozdźěli. Na ně­hdźe 50 jězbach po morju je pak jedyn katolski pak ewangelski duchowny přitomny. Za blidkom jako wołtarjom swjeći wón w salonach abo partyjowych rumnosćach łódźe kemše z dowolnikami.

Nowa mošeja

Berlin (SN/mb). Po zakonju wo inwesticijach we wuhlowych rewěrach měješe zwjazkowe ministerstwo za hospodarstwo a energiju hač do kónca junija prěni raz „hospodarsku dynamiku w rewěrach na wědomostnym zakładźe“ ewaluować. Zo njejsu nadawk zdypkom zdokonjeli, je koło politikarjow Lěwicy z wuhlowych rewěrow cyłeje Němskeje kritizowało. Zapósłancy – mjez druhim Antonia Mertsching ze sakskeho a Anke Schwarzenberg z braniborskeho krajneho sejma – sej žadaja, zo by knježerstwowa politika wobydlerjow bóle do procesa změny strukturow zapřijała. Dalši dypk w poziciskej papjerje lěwicarjow je koncentrowanje spěchowanja na industrijne zawody, kotrež naslědnje dźěłaja a swojim přistajenym mzdu po tarifje płaća. W sakskej Łužicy njeje po měnjenju awtorow najwjetše wužadanje, nowe dźěłowe městna wutworić, ale kwalifikowanych sobudźěłaćerjow přiwabić, wšako budźe we wokrjesomaj Budyšin a Zhorjelc hač do 2030 najskerje 50 000 dźěławych mjenje. Hač měło so we Łužicy runja porynskemu rewěrej wudobywanje brunicy hižo 2030 zakónčić, w papjerje njesteji.

Raguhn-Jeßnitz (dpa/SN). Zepěrajo so na cyłoněmski trend je AfD znowa komunalne wólby we wuchodnej Němskej za sebje rozsudźiła. Kandidat AfD Hannes Loth je wčerawše wólby měšćanosty w městačku Raguhn-Jeßnitz w Saksko-Anhaltskej dobył, tydźeń po tym, zo su w durinskim Sonnebergu prěni króć krajneho radu AfD wuzwolili. Politikarjo Lěwicy a Zelenych reagowachu starosćiwje. AfD ma wólby za „signal, zo je strona wuwiće na wuchodźe Němskeje skrućiła“.

Mjenje pjenjez za dźěći

Berlin (dpa/SN). K financowanju planowaneho zakładneho zawěsćenja dźěći su po słowach zwjazkoweho financneho ministra Christiana Lindnera za lěto 2025 „najprjedy raz“ dwě miliardźe eurow zaplanowali. „Zwjazkowe knježerstwo pak nima hišće žadyn koncept a tak tež žane dokładne trochowanje kóštow“, rjekny politikar FDP nowinarjam. Planowana suma je wo tójšto niša hač dwanaće miliardow eurow, kotrež bě sej swójbna ministerka Lisa Paus (Zeleni) žadała.

Israel nadběhuje Palestinjanow