Miami/Washington (dpa/SN). Něhdyši prezident USA, Donald Trump, dyrbi so afery tajnych knježerstwowych dokumentow dla před sudnistwom wuprajić. Jemu wumjetuja zapřisahanstwo k poćežowanju přepytowanja kaž tež njeza­konske składowanje wysoko sensibelnych informacijow. Póndźelu popołdnju městneho časa přizemi wón ze swójskim lětadłom před sudnistwom w měsće Miami w Floridźe. Do toho bě wón wot swójskeho golfoweho kluba Bedminster w US-staće New Jersey na lětanišćo Newmark­ wotjěł. Wottam wotleća wón na sudniski termin do Floridy, kaž ameriske medije rozprawjeja. Wutoru ma 76lětny swój sudnistwowy termin. Je to prěni raz, zo so bywši prezident USA na zwjazkowej runinje wobskoržuje. Wumjetowanja wón sam wotpokazuje. W metropoli, w Floridźe, liča zamołwići z protestami.

Krywyj Rih (dpa/SN). Při nowych ruskich nadpadach na Ukrainu su po oficialnych informacijach mjez druhim wjaceposchodowy dom w juhowuchodnym wulkoměsće Krywyj Rih trjechili. Znajmjeńša třo wobydlerjo při tym žiwjenje přisadźichu, 25 dalši so zranichu, wojerski guwerner potrjecheneje kónčiny zdźěla. Krywyj Rih, ródne město ukrainskeho prezidenta Wolodymyra Zelenskeho, je „masiwny raketowy nadpad“ dožiwiło. Tři ruske rakety su wottřělili, dalše pak zrazychu do bydlenskeje štwórće.

Wuswobodźenje wjacorych wjeskow na wuchodźe Ukrainy je Zelenskemu wuspěch dotalneje ukrainskeje ofensiwy přećiwo ruskim jednotkam. „Dźak našim wojowarjam za kóždu ukrainsku chorhoj, kotraž so zaso k swojemu prawotnemu městnu we wuswobodźenych kónčinach wróći“, rjekny wón wčera w swojim widejowym poselstwje. „Wojowanja su wobćežne, ale smy wuspěšni – a to je wažne“, wón doda. Ukraina so mjeztym 15 měsacow ruskemu nadpadej wobara, dźakowano tež wojerskej pomocy zapada.

Němski čerwjeny křiž kampanju z nowej cilowej skupinu zahajił

Ratingen (dpa/SN). Hdyž chorownje konserwy kreje skazaja, wojuja pacienća častodosć hižo ze smjerću. Tola składy krejnych konserwow běchu naposledk stajnje zaso strašnje prózdne. Zwólniwosć krej darić, hižo wjele lět woteběra. Předewšěm młoda generacija je ćežko docpějomna, fachowcy rjeknu. „Bližimy so kritiskemu dypkej“, warnuje Patric Noha wot Němskeho čerwjeneho křiža. Na Dnju darjenja kreje steja tuž lětsa wosebje młodźi ludźo w srjedźišću. Jich chcedźa z kampanju w socialnych syćach přeswědčić, dokelž njemóžeš krej w medicinje dotal z ničim narunać. „Bjez kreje njebychu wšědnje tysacy ludźi žanu šansu měli, přežiwić“, Nohe potwjerdźi. W lětnikach z mnohimi porodami bě hišće wjele swěrnych, kotřiž darichu štyri, pjeć abo samo šěsć króć wob lěto poł litra kreje. Tola tuta generacije zestarja. Wot měrca je drje starobna mjeza wotstronjena, kiž seniorow wot darowanja kreje wuzamkuje. Tola starši ludźo bědźa so přiběrajcy z chorosćemi, trjebaja medikamenty a so tak jako darićeljo kreje hižo njehodźa.

Wot brunicoweho hórnistwa škodowane areale přirodźe abo tež čłowjekej za nowe wužiwanje wróćić, je z dźensnišeje perspektiwy nadawk bjez konkretneho kónca. Jónu nastajene plany za pjelnjenje jednotliwych pohórnistwowych jězorow na přikład njehodźa so dodźeržeć. Wonkowne wuměnjenja prosće tym za čas planowanja wjace njewotpowěduja, wšako woda pobrachuje. Čim bole so ke kóncej wudobywanja brunicy bližimy, ćim jasniša je towaršnosć z prašenjom konfrontowana, kak móhli za renaturěrowanje trěbne financy tež za přichod zaručić. Kóšty wěčnje dale na dawkipłaćerki a dawkipłaćerjow wotwalować, sprawne rozrisanje njeje. Najpozdźišo z předanju łužiskich milinarnjow a brunicowych jamow wot Vattenfalla čěskemu konsorcijej EPH je rěč wo trěbnym nošnym konstrukće za přichod renaturěrowanja pohórnistwowych arealow we Łužicy. Předewzaće móže zbankrotować, a što potom? Wot Zelenych namjetowana zjawnoprawniska załožba móhła tajki nošny konstrukt być. Axel Arlt