Mokwa/Kijew (dpa/SN). Moskwa namjetuje, wot njeje nadpadnjenju Ukrainu mjez Ruskej a Europskej uniju rozdźělić. Wicešef ruskeje wěstotneje rady, bywši ministerski prezident Dmitrij Mjedwjedew, je minjenju nóc scenarije za móžny kónc wójny rysował. Wuhlady na měr wobsteja jenož potom, jeli sej Ruska wulki dźěl susodneho kraja přiswoji. Koncept, kiž ma Mjedwjedew za najlěpši, předwidźi přirjadowanje zapadnych kónčin Ukrainy wjacorym čłonskim statam EU, wuchodne kónčiny připadnu Ruskej.

Z tutym rozrisanjom „skónči so konflikt z dosahacymi garantijemi, zo so dołhodobnje wjace njezahaji“, piše Mjedwjedew internetnje. Dyrbjał-li porno tomu zwostawacy njewotwisny dźěl Ukrainy EU abo NATO přistupić, bychu wojowanja dale šli. Při tym hrozy strach, zo so boje „na Trěću swětowu wójnu rozšěrja“, twjerdźi dowěrnik ruskeho prezidenta Wladimira Putina. Mjedwjedew z toho wuchadźa, zo Ukraina wójny z Ruskej dla dospołnje rozpadnje a zo měła so tuž mjez Ruskej a zapadnej Europu rozdźělić.

Zo klimowi aktiwisća skupiny Poslednja generacija ze swojimi lěpjatymi akcijemi raz kedźbnosć generalneho sekretara UNO Antónia Guterresa zbudźa, sej drje sami myslili njebychu. Po dospołnej přehnatej policajskej akciji bayerskeho kriminalneho zarjada a statneho rěčnistwa předwčerawšim, srjedu, pak su aktiwisća nětko takrjec „najwyše žohnowanje“ z New Yorka dóstali. Móžu sej derje předstajić, zo tole dalšich młodostnych pohonjuje, so hibanju přizamknyć a sej wot zwjazkoweho knježerstwa hnydomnu změnu klimoweje politiki žadać, bjez toho zo bychu konkretnje rjekli, kak měło to wupadać. Žadanje wjacorych politikarjow CDU a CSU, skupinu wot wustawoškita wobkedźbować dać, zdawa so pod tutym wuwićom skerje směšne. Ale što móžeš w tutym kraju scyła hišće chutnje brać? Njeby mje dźiwało, bychu-li wo wobydlerjach Němskeje něhdy pisali: Spodźiwny ludźik, kiž swoje moderne milinarnje zawrěje a so na dróhach přilěpi. Marko Wjeńka

Kamjenc (aha/SN). Něhdźe 70 ludźi bě na wčerawšim zarjadowanju w Kamjenskim měšćanskim dźiwadle přitomnych. Bywši NDRski politikar a Drježdźanski wyši měšćanosta z časa towaršnostneho přewróta dr. Wolfgang Berghofer předstaji wobsah swojeje knihi „Zwischen Wut und Verzweiflung“.

Kompetentna moderacija wyšeho měšćanosty Kamjenca Rolanda Dantza tomu přinošowaše, zo Berghofer z wjele přeswědčacymi přikładami ze swojeje noweje knihi kritiske wotličenje z kapitalistiskim systemom poda. Awtor knihi, wróćo zhladujo na swoje wosomdźesaćlětne žiwjenje, je poł swojeho časa w socializmje, tamnu w kapitalizmje skutkował. Wón słuša k nahladnym akteram politiskeho přewróta 1989.

Zo móhli dale dobru pitnu wodu poskićować, su wodarnje w južnofrancoskim Toulousu njewšědny pospyt zahajili: chcedźa wobydlerjow kubłać, zo bychu pitnu wodu woptali a posudźowali. Zajimcam poskićuja dalekubłanje nastupajo słód a wóń wody. Potom měli nowi fachowcy pitnu wodu doma posudźować a wuslědk internetnje zapisać. W Francoskej pija wjele wody ze zjawneje syće. Tež w hosćencach je z wašnjom, hosćom darmotnje pitnu wodu přewostajić.

Emocije zbudźaca kompjuterowa hra je w schleswigsko-holsteinskim Plönje zasadźenje policije zawinowała. Wobydlerjo informowachu policiju, zo něchtó wótře wo pomoc woła. Policija zwěsći skupinu hłuboko do hry zanurjenych młodostnych: Jedyn z nich wołaše z wočinjenym woknom a słuchatkami na hłowje wo pomoc – wočiwidnje přewótře.