Policija po kritice k změnam zwólniwa
Lipsk (dpa/SN). Lipšćanski policajski prezident René Demmler ma masiwne zasadźenje policije na lěwicarsko-radikalnym „Dnju X“ w Lipsku wróćo zhladujo prawnisce w porjadku, widźi pak trěbnosć změnow. Bě wulki problem, zo je policija ličbu wobdźělenych podhódnoćiła, kotrež běchu 3. junija wjele hodźinow w kotole popadnjeni, rjekny Demmler. Tež komunikacija ze wobkruženymi njeje fungowała. Policija je podawki wokoło „Dnja X“ mjeztym jara nadrobnje předźěłała. Demmler je wuslědki přepytowanja na wčerawšim posedźenju nutřkowneho wuběrka Sakskeho krajneho sejma zapósłancam předstajił.
Frei: Wuspěch AfD wina knježerstwa
Quo vadis AfD?
Dorost w Drježdźanskim zwěrjencu
Pašowar ludźi ćěkajo do štoma zrazył
To a tamne (23.06.23)
Pancerowane kolesate třělcowske jězdźidło pólskeje armeje je we Wrócławju do wosoboweho awta zrazyło. Wjace hač 20 tonow ćežki kolos je na křižowanišću do awta prasnyło. Prawdźepodobnje njeje wojak za wodźidłom wojerskeho jězdźidła předjězbu wosoboweho awta wobkedźbował. Šofer awta so zrani. Jeho dowjezechu do chorownje. Jězdźidło armeje bě po puću k Wrócławskej Hali lětstotka, hdźež chcychu je we wobłuku zarjadowanja wustajić.
Bager brunicoweje jamy wobsadźili su wobswětowi aktiwisća z Čěskeje, Pólskeje a Němskeje w čěskej brunicowej jamje Bílina. Demonstranća protestuja přećiwo podlěšenju słužbneje dowolnosće jamy hač do lěta 2035, rěčnik organizacije Greenpeace zdźěli. Bílina leži 35 kilometrow južnje Drježdźan. Aktiwisća chcedźa 24 hodźin na bagrje wutrać.
Wjace singlowych bydlenjow
Wiesbaden (dpa/SN). Změna towaršnosće wotbłyšćuje so tež we wašnju bydlenja: Wot lěta 1950 je so ličba jednowosobowych domjacnosćow w Němskej wjace hač podwojiła. Loni bydleše w nimale 41 procentach wšěch 40,9 milionow bydlenjow w Němskej jenička wosoba, Zwjazkowy statistiski zarjad dźensa zdźěli. Lěta 1950 bě to mjenje hač 20 procentow. Ličba domjacnosćow z pjeć wosobami je wot 16 procentow 1950 na ani štyri procenty 2022 woteběrała, zarjad zdźěla.
Wjeršk přećiwo chudobje
Paris (dpa/SN). Zastupnicy wjace hač sto krajow, mjezynarodnych financnych institucijow a wuwićowych organizacijow wuradźuja wot dźensa w Parisu wo solidarnym financnym systemje. Tón ma polěpšenja w swět wopřijacym boju přećiwo chudobje a zmištrowanju klimowych krizow zmóžnić. Mjez wobdźělnikami wot francoskeho prezidenta Emmanuela Macrona organizowaneho wjerška su mjez druhim prezidentka komisije EU Ursula von der Leyen a generalny sekretar UNO António Guterres.
Palestinjenjo morjeni
