Po nocy ze sylnymi njewjedrami dyrbi so wohnjowa wobora na ...
Chcedźa solarnu ofensiwu zahajić
Berlin (dpa/SN). Solarne připrawy twarić a wobhospodarić ma w přichodźe za priwatnikow a přemysłownikow jednorišo być. K tomu chce zwjazkowy kabinet dźensa tak mjenowany solarny paket wobzamknyć, rěkaše wčera ze zwjazkoweho ministerstwa za hospodarstwo a škit klimy. W zwisku z reformu chce knježerstwo běrokratiju wottwarić a zdobom wutwar solarneje energije w Němskej dale pospěšić.
Konkretnje ma ze solarnym paketom wobhospodarjenje balkonowych milinarnjow jednoriše być abo wužiwanje samoprodukowaneje fotowoltaikoweje miliny we wjaceswójbnych domach. Tež móžnosće solarne připrawy na polach twarić maja so rozšěrić. Zaměr knježerstwa SPD, Zelenych a FDP je, podźěl wobnowjomnych energijow stopnjować. Při tym orientuja so na cyłkownej přetrjebje Němskeje. Hač do lěta 2030 ma podźěl 80 procentow wučinjeć.
Nadběhi na zapad
Konop: Plany hišće raz předźěłać
Berlin (dpa/SN). Dźěłarnistwo policije (GdP) ma za wažne, zo so plany legalizacije konopje znowa předźěłaja. Zwjazkowy kabinet chce je dźensa wobzamknyć. Najebać kritiku je zwjazkowy strowotniski minister Karl Lauterbach (SPD) jeničce małe změny přesadźił, wuswětli zwjazkowy předsyda GdP Jochen Kopelke powěsćerni dpa. Najlěpje by było, jelizo zwjazkowe knježerstwo naćisk nětko njewobzamknje. Minister pak měł nadawk dóstać a zakoń hišće raz předźěłać.
Po planach amploweje koalicije SPD, Zelenych a FDP matej so plahowanje konopje doma abo we wosebitych zarjadnišćach, kaž tež konsum maćizny legalnej być. Tež w zwjazkowym sejmje chcedźa wospjet wo změnach zakonja wuradźować. Hišće lětsa ma so zakoń wobzamknyć.
GdP kritizuje, zo njeje dlěšeje přechodneje fazy, štož njewěstotu zawinuje. Policiji budźe to ćežko mjez legalnym a njelegalnym rozsudźić. Tak njeje na přikład jasnych postajenjow, štó měł na městnosć so poćahowace zakazy konsuma dohladować. Policija a justica budźetej poćežowanej.
To a tamne (16.08.23)
Žona w hessenskim Langenselboldźe je swojeho žiwjenskeho partnera z gumijowym kneblom honiła. Po słowach 30lětneho je wona jeho tež z njeznatej kapalinu popryskała a potom ze zapalakom přesćěhowała, zdźěli wčera policija w Offenbachu. Porik bě so zawčerawšim wječor při dwórnišću zetkało, dokelž njeběštaj sej přezjednaj, hač chcetaj poćah dale wjesć. Rozmołwa pak so po krótkim času přiwótři.
Štyri młode šupy su za cyrobu pytali a zasadźenje policije w Berlinje Prenzlauer Berg zawinowali. Zwěrjata zalězechu sej do wotpadkoweje tony, policija wčera na Facebooku zdźěli. Z połnym brjuchom spytachu šupy z tony wulězć, štož pak so jim njeporadźi. Zastojnicy zwěrjatam tuž pomhachu. Na to čampachu šupy směr ludowy park.
Turistow ewakuěrowali
Saint-André (dpa/SN). W južnej Francoskej wojuje wohnjowa wobora přećiwo wulkemu wohenjej. Mjeztym su tam hižo turistow z wjacorych campingowanišćow ewakuěrowali. Ludnosć a dowolnicy w kónčinje Pyrénées-Orientales dyrbja so na kedźbu brać. Mjeztym su 13 lětadłow, tři helikoptery a wjac hač 500 wohnjowych wobornikow zasadźenych a přećiwo wohenjej při srjedźnym morju wojuja.
Dowěra dale a bóle woteběra
Berlin (dpa/SN). Dowěra ludźi w Němskej do tuchwilneho knježerstwa dale a bóle woteběra. W dźensa wozjewjenym naprašowanju Němskeho zwjazka zastojnikow ma hišće 27 procentow naprašowanych knježerstwo za jednanjakmane. To je dwaj procentaj mjenje hač loni. Nalada je předewšěm na wuchodźe Němskeje špatna. Tam je 77 procentow naprašowanych přeswědčenych, zo njemóže knježerstwo swoje nadawki zmištrować a problemy rozrisać.
Prawicarjo w policiji
W porynsko-pfalcowskim Meckenheimje su winicarjo wčera při ...
Fairne płaćizny za milinu
Berlin (dpa/SN). Zwjazkowa syćowa agentura (Bundesnetzagentur), žada sebi reformu płaćiznow za milinu z nišimi popłatkami za regiony z mnoho milinu, kotraž so z wětřika wudobywa. Dotal su regiony z wjele powětrowej energiju wosebje wysoko financielnje poćežowani, praji prezident agentury Klaus Müller. Nětko pak předleži w zwjazkowym sejmje namjet zakonja, kotryž da agenturje móžnosć, fairne płaćizny za milinu zawjesć. „Tak spěšnje, kaž je zakoń wobzamknjeny, chcemy namjet za reformu činić“, praji Müller. Po jeho začuwanju ma wón při swojich planach tež energijowych ministrow zwjazkowych krajow za sobu: „Zetkawam lědma hišće ministra, kotryž historisce zrosćeny system hišće podpěruje.“ Dale wón wobkrući, zo měł so wutwar naslědnych energijowych žórłow mytować.
Motiw podhladneho hišće njejasny
Wulke Rědorjecy (dpa/SN). Měšćansku cyrkej we Wulkich Rědorjecach (Großröhrsdorf) je 40lětny podhladny prawdźepodobnje wosobinskich problemow dla spalił. Kaž wčera policija na nowinskej konferency před spalenym Božim domom wuswětli, měješe podhladny pozdatnje konflikt z cyrkwju. Přez pokazku su zastojnicy wo ćežach zhonili a chcychu muža přepruwować.
Na konferencu běchu tež mnozy wobydlerjo města přišli a chcychu motiw zhonić. „K tomu njemóžemy hišće ničo rjec“, nawoda Zhorjelskeje kriminalneje policije Raik Schulze wujasni. Muž bydleše we wokolinje Wulkich Rědorjecow a je nan swójby. „Tuchwilu wuchadźamy z toho, zo je we wosobinsce ćežkej žiwjenskej situaciji.“ W přesłyšowanju je zapalerstwo přiznał. Tež w druhich zwjazkowych krajach přepytuja přećiwo 40lětnemu dalšich chłostajomnych njeskutkow dla.
Policija pad nětko přepytuje
Swójba z Bosniskeje wo rasistiskich přeńdźenjach we Łužicy rozprawjała
Luboraz (dpa/SN). Po wumjetowanjach rasistiskich wuprajenjow a wohroženjow přećiwo swójbje we łužiskim městačku Luboraz dla je policija wjacore přepytowanske jednanja zahajiła. „Dyrbimy wuswětlić, što je so stało“, zdźěli minjenu sobotu rěčnica policajskeje direkcije juh Ines Filohn. Mać z Bosniskeje ze štyrjomi dźěćimi bě po swójskich wuprajenjach něšto dnjow po swojim přećahu do Luboraza městačko bojo so rasistiskich nadpadow dla zaso wopušćiła. Wobšěrne přepytowanja z přesłyšowanjom wobdźělenych a swědkow trajachu. Policija slědźi za skupinu młodych muži a 45lětnym mužom, ale tež přećiwo dwěmaj swójbnymaj.
