Berlin (dpa/SN). Z raznymi nadběhami na politiku zwjazkoweho kanclera Friedricha Merza (CDU) je nawodnica opozicije Alice Weidel dźensa generalnu debatu zwjazkoweho sejma zahajiła. Stronska a frakciska předsydka AfD wumjetowaše předsydźe CDU lěwicarski kurs. Tohorunja kritizuje wona jeho mjelčenje, hladajo na morjenje aktiwista Charlieja Kirka w USA abo na lěwicarske atentaty na objekty železnicy. Migracisku politiku knježerstwa CDU/CSU a SPD mjenowaše Weidel „alibi-naprawy“ a „symbolisku politiku“. Nimo toho wumjetowaše wona Merzej „wójnsku šćuwańcu“ a sabotažu wšěch prócowanjow prezidenta USA Donalda Trumpa za skónčenje wójny w Ukrainje.

Zwjazkowy etat koalicije je po jeje słowach „spraskany njezamołwity etat bjez měry a zaměra, kotryž žadyn problem njerozrisa, za to pak krizu dale přiwótři“.

Debatu wo etaće kanclerskeho zarjada opozicija tradicionalnje za wotličenje z politiku knježerstwa wužiwa.

Rjemjesło ma złote dno, druhdy pak tež powjerch z rohiznow jelenja. To dopokazuje Ägidius Brězan z Ralbic. Młodeho blidarja su za jeho zakónčace dźěło w kategoriji „dobra forma“ wuznamjenili. Jeho kamor njesteji jenož za rjemjeslnisku preciznosć, ale tež za zmužitosć, kreatiwnje eksperimentować. Runje nětko, hdyž mnohe zawody dorost pytaja, je to pozbudźowacy signal: Młodźi ludźo su tu a so gratu přimaja, jeli jim něšto přicpěwaš. To njepłaći jenož za rjemjeslniski wobłuk, ale tež za druhe pola – w šulach abo při zwoprawdźenju wosebitych projektow. Wšudźe tam, hdźež smědźa młodostni zamołwitosć přewzać a swoje ideje přinošować, jewja so talenty, kotrež našu towaršnosć pozitiwnje wowliwuja. Puć Ralbičana pokazuje, zo je za dźěło blidarja wjac trěbne hač tružak a šrubowak. Mjenujcy zapal a składnosć, so wuspytać. Tajke wokomiki wuspěcha budźa nadźiju, zo ma rjemjesło w našim regionje přichod. Tłóčimy młodźencej palcy a wjeselimy so hižo na přichodne mišterske twórby – snano tež něhdy ze swójskeje dźěłarnje. Lisa-Maria Cyžec

Lipsk (dpa/SN). Z tójšto zarjadowanjemi swjeći Němska železnica w Sakskej, ­Saksko-Anhaltskej a Durinskej přichodny kónc tydźenja „Dźeń kolijow“. Dwórnišćowe swjedźenje, wosebite jězby a wodźenja po twarnišćach zmóžnja njewšědne dohlady do swěta železnicy, Němska železnica zdźěla.

Tak poskićuje dwórnišćo w Pirnje přichodnu sobotu mjez druhim wodźenja po wuhibkarni a dwórnišću. Kamjeničanske hłowne dwórnišćo přeměnja za swjedźeń „200 lět železnica w Europje“ na hotowu swjedźensku milu. Tam přewjeduja wšelake wosebite jězby kaž tež železniske čaporowe wiki.

Na Lipšćanskim hłownym dwórnišću wotjědu parne lokomotiwy. Zajimcy móža sej stare lokomotiwy bliže wobhladać. Rudnohórska železnica pojědźe po wjele lětach zaso prěni raz na čarje Schwarzenberg-Annaberg Buchholz. Nakładne dwórnišćo w Halle planuje swjedźeń za swójby, na kotrymž informuja wo že­lezniskich powołanjach. Hosćo zhonja wjace wo dźěle porjedźernjow a mo­dernych wuhibkarnjow. Fachowcy rady na prašenja ludźi wotmołwja.

25 tonow rězniskich wotpadkow je so po njezbožu nakładneho awta na awtodróze A 391 blisko delnjosakskeho Braunschweiga rozdźěliło. Awtodróha bu wjacore hodźiny zawrjena, wohnjowa wobora zdźěli. Powalene nakładne awto wjacore čary blokowaše. Wozydło bě so z njeznateje přičiny dla suwało, so zawjerćało, na bok padnyło a tak wšitko zhubiło, štož transportowaše. Pomocnicy mějachu tójšto dźěła, material zaso zezběrać.

Sławny dźiwadźelnik a filmowc z USA Robert Redford je njeboh. 89lětny zemrě w swojim domje w zwjazkowym staće Utah, jeho agentura nowinarjam zdźěli. „Wón je tam zemrěł, hdźež najradšo přebywaše, w kruhu tych, kotrychž lubowaše“ w zdźělence rěka. „Wón nam wšěm jara pobrachuje“, dodachu. Redford bě filmowa legenda. Jemu spožčichu dwójce filmowe myto Oscar.