Lipsk (dpa/SN). Při lětanišćomaj Lipsk/Halle a Drježdźany chcedźa hišće lětsa něhdźe 170 wot něhdźe 1 300 dźěłowych městnow šmórnyć. Srjedźoněmska lětanišćowa AG wottwar městnow štwórtk wobkrući a wopodstatni jón z trajacymi financnymi stratami a trěbnym kursom saněrowanja. Potrjechene su wšitke wobłuki wobeju stejnišćow. CDU w Sakskim krajnym sejmje so wuwićow dla starosća a žada sej wot Zwjazka naprawy k podpěrje. Po Kaiju Ritteru, hospodarskopolitiskim rěčniku frakcije CDU, dyrbi zwjazkowe knježerstwo popłatki w powětrowym wobchadźe europskim wu­bědźowarjam kaž Čěskej přiměrić. Tak bychu fairne ramikowe wuměnjenja wutworili a tworowy a pasažěrski wobchad móhł dołhodobnje hospodarsce wobstać. Ritter wuzběhny wuznam lětanišćow za wikowanje, turizm a zasy­dlenje nowych předewzaćow w regionje. Wón warnuje před falowacymi inwe­sticijemi a stupacymi zawodnymi kó­štami. Zo byštej so stejnišći zawěsćiłoj a socialne sćěhi za přistajenych so złahodnili, su na kóždy pad zaměrne naprawy trěbne.

Sprjewja ma za wobydlerjow Choćebuza atraktiwniša a dožiwjenjow połniša być. Wo to chce so wotnětka nowe předewzaće starać a domoródnych kaž tež hosći ­města a wokoliny na wodu wabić. Minjeny štwórtk bu wupožčowarnja kajakow a nastrojow a za stand-up-padling (SUP) blisko Małeho Sprjewineho spušćadła w Ludwiga Leichhardtowej aleji wotewrjena. Tam móža wosom SUP-deskow a štyri kajaki wupožčeć. Wottam móžeš so něhdźe tři kilometry hač horje k spušćadłu ­Kiekebusch po wodźe pohibować. Foto: Michael Helbig

Njewšědneho nócneho hawrona su policisća w nocy wot soboty na njedźelu w Biskopicach popadnyli a nachwilnje w swojej staciji hospodowali. Nosaty bar bě sej do zahrody wulećał, hdźež jeho nazajtra młodostni wuhladachu, informuje Zhorjelska policajska direkcija. Naposledk so wukopa, zo bě zwěrjo ze zwěrjenca města twochnyło, kotrehož wo­ponowe zwěrjo je. Njedźelu nosateho ­bara wróćo do jeho wobhrodźenja dowjezechu.

W lifće chorownje ducy na porodowu staciju je žona ze swojim partnerom w měsće Herdecke tčacy wostała. Na to hnydom wohnjowych wobornikow alarměrowachu, kotřiž por z pomocu generalneho kluča z lifta wuswobodźichu. ­Žona móžeše swoje dźěćo bjez dalšich komplikacijow porodźić. Šok pak bě přiwšěm wulki dosć.

Anchorage (dpa/SN). Ludźo z cyłeho swěta zhladuja dźensa na Alasku, hdźež so prezident USA Donald Trump a šef Krjemla Wladimir Putin dźensa wječor zeńdźetaj, zo byštaj wo wójnje w Ukrainje wuradźowałoj. Z rozmołwy, na kotruž ukrainski prezident Wolodymyr Zelenskyj přeprošeny njeje, móhli rozsudne impulsy za kónc wójny wuńć. Hač pak politikarjej na kóncu scyła něšto dojednataj a hač dóńdźe k přiměrej, kotryž sej Ukraina, kraje Europy a Trump žadaja, je wjace hač njewěste. Zhromadna zdźělenka wo wjerškowym zetkanju planowana njeje, kaž Krjeml zdźěla.

Zrěčenje zwrěšćiło

Genf (dpa/SN). Po hodźiny trajacych jednanjach hač do pózdnjeje nocy je planowane zrěčenje UNO přećiwo wotpadkam z plastiki zwrěšćiło. Tole su delegacije ­wjacorych krajow dźensa rano wozjewili. Zastupjerjo něhdźe 180 krajow su w ­Genfje cyły tydźeń wuradźowali. „Proces w Genfje so spochi do směšneje naležnosće wuwiwa“, sudźi němski zastupjer wob­swětoweje załožby WWF Florian Titze.

Za prawa žonow so zasadźeć