Registruja mnohe dalše rženja
Bärbel Bas kanclerej rjap skruća
Berlin (dpa/SN). Šefina SPD Bärbel Bas zwjazkowemu kanclerej Friedrichej Merzej (CDU) rjap skruća. „Jemu wumjetować, zo Israel přeradźi, je sylny tobak“, ministerka za dźěło w interviewje z telewizijnym sćelakom ARD zwurazni. Merz a zwjazkowe knježerstwo stejitaj na stronje Israela. Wšěm je wědome, zo ma so kraj škitać. „Mjeztym pak je so połoženje wuwiło, zo njesměmy na ludźi w Gazaskim pasmje zabyć“, Bas wuzběhny.
Friedrich Merz je minjeny pjatk wozjewił, zo Němska hižo žane brónje Israelej njedodawa, kotrež móhło tamniše wójsko w Gazaskim pasmje zasadźić. Z rynkow CDU a CSU je rozsud wulku kritiku a diskusije wubudźił. Zapósłancy běchu překwapjeni. CSU kritizowaše, zo njeje zwjazkowy kancler zapósłancow do jednanjow sobu zapřijał. Tohorunja ma strona rozsud za wopačny.
Bärbel Bas Merzej radźi, zo dyrbi wón swoju komunikaciju polěpšić. Tež frakcija CDU/CSU w zwjazkowym sejmje ma so lěpje dorozumić a tajke wažne prašenja zhromadnje rozjasnić a zawěsćić.
Woidke za rozestajenje z AfD
Diskusija wo wobchadźenju z prawicarsko-ekstremistiskej stronu
Podstupim (dpa/SN). Braniborski ministerski prezident Dietmar Woidke (SPD) žada sej jasnu konfrontaciju z AfD na runinje politiskich wobsahow. „Dyrbimy so z AfD politisce rozestajeć, na přikład tež wo energijowej politice“, rjekny Woidke powěsćerni dpa. „By hižo zajimawe było, kelko ludźi by w Braniborskej swoju domiznu zhubiło, dokelž žada sej AfD załoženje nowych brunicowych jamow.“
Zarjad za wustawoškit je AfD w meji jako z wěstosću prawicarsko-ekstremistisku stronu zastopnjował. Přećiwo tomu so strona ze skóržbu sudnisce wobara. Wona sej žada, zo zamołwići dopokazy za swój posudk wozjewja. Nutřkowne ministerstwo mjeztym zdźěla, zo so tole přichodny štwórtk stanje.
Woidke AfD w tym zwisku namołwja, zo měła so wot prawicarskich ekstremistow w swojich rjadach dźělić. „Puć za AfD, zo so z normalnej stronu stanje, je jednory: Hdyž ekstremistow prosće ze strony ćisnje“, ministerski prezident rjekny. „W Braniborskej njeje AfD jenož z ekstremistami překisana, woni ju mjeztym dominuja“, Woidke rjekny.
Njech lubosć dobudźe
Mólba Blechena wustajena była
Serbske korjenje jemu wažne byli
Zašły pjatk rozžohnowachmy so z Lüderom Hoeftom, wučerjom na wuměnku a ludowym wuměłcom z Małeho Wjelkowa, kotryž bě 21. junija w starobje 80 lět zemrěł.
Serbske jejko, to bě jemu symbol. Wuhladach je před lětami na antenje jeho awta, a tak so zeznachmoj. K Serbstwu so wuznawać, to bě jemu wažne. Tohodla wobleče so hdys a hdys swoju mužacu drastu ewangelskich Serbow wokoło Budyšina, kotruž bě jemu mandźelska zešiła a wušiwała. Wosebje na wikach jutrownych jejkow, hdźež techniku škrabanja a stare regionalne mustry po swojim dźědźe Emilu Wowčerju-Wjelkowskim pokazowaše, so stajnje k swojim korjenjam wuznawaše a tež serbowaše. W Spěchowanskim kruhu za serbsku ludowu kulturu běštej jeho wutrobitosć a wjesoła mysl witanej. Přez lěta šěrješe na nalětnich wikach tež zwonka Łužicy wědu wo Serbach, hdźež druhdy jako braška wustupowaše. Ze sćerpnosću a wulkej lubosću sposrědkowa dźěćom hromadźe ze swojej mandźelskej w Radworskim horće prěnje techniske kmanosće za wóskowanje a škrabanje jejkow.
To a tamne (11.08.25)
Syčomłóćawa je so zawčerawšim přez kerčiznu na party w zahrodźe dóstała. Dźesać tonow ćežku mašinu běchu dźěłaćerjo w Badensko-Württembergskej wjacore sta metrow wot zahrody zdalene na polu wotstajili. Kaž policija zdźěli, je so kolos potom bjez wodźerja pohibował a do zahrody zajěł. Na zbožo njeje so nichtó na party w Bad Überkingenje zranił. Tež dom njeje wobškodźeny. Syčomłóćawa bě so w kerčinje zašmjatała a w zahrodźe stejo wostała.
Konopej je minjeny pjatk njeznaty šofer na zwjazkowej dróze we wokrjesu Bad Kreuznach w Porynsko-Pfalcowskej zhubił. Šoferka njemóžeše konopejej wuwinyć a do njeho zrazy. Zraniła so wona při tym njeje. Jeje awto je so sylnje wobškodźiło, policija zdźěli a so swědkow nadźija.
CSD: Wosebite postajenja
Na slědach serbskich gymnaziastow
Přepodaće dołho planował
Magdeburg (dpa/SN). Saksko-Anhaltski ministerski prezident Reiner Haseloff je přepodaće zastojnstwa hospodarskemu ministrej Svenej Schulzemu, kiž je zdobom krajny předsyda CDU, dołho planował. Hižo před pjeć lětami bě wón rjekł, zo chce tuchwilnu wólbnu dobu za přechod wužiwać, rjekny 71lětny w Magdeburgu. Haseloff bě wčera připowědźił, zo k wólbam krajneho sejma 2026 jako načolny kandidat CDU hižo njenastupi.
Trump prosy na měrowy wjeršk
Washington (dpa/SN). Prezident USA Donald Trump je „měrowy wjeršk“ z wjele lět znjepřećelenymaj republikomaj Armeniskej a Azerbajdźanom přihotował. Wón chce prezidentow wobeju krajow dźensa wječor w Běłym domje we Washingtonje witać. Planowana bě oficialna swjatočnosć, na kotrejž chcychu měrowe zrěčenje podpisać. Poćahi mjez krajomaj su napjate. Lěta 2023 dóńdźe k wojerskemu rozrisanju. Trump je přeswědčeny, zo wón kónčinje nětko měr přinjese.
Produkcija słabša
