Předsydka Zeleneje młodźiny Jette Nietzard znowa za zastojnstwo kandidować njebudźe. Tole je 26lětna w socialnej syći Instagram zdźěliła. Hač k wólbam noweho zwjazkoweho předsydstwa dorostoweje organizacije Zelenych w oktobru w Lipsku pak wostanje wona w zastojnstwje. W swojim přinošku wona skorži, zo njedóstawa dosć podpěry za swoje namjety. Nietzard bě stajnje zaso z politisce prowokantnymi wuprajenjemi napadnyła.

Hnydom dwaj wukazaj zajeća měješe policija w rukomaj, jako na parkowanišću na awtodróze A4 pólskeho šofera wosoboweho awta kontrolowaše. 20lětny njebě pokutu 2 400 eurow jězdźenja pod wliwom alkohola dla zapłaćił. W dalšim padźe běchu jeho zranjenja ćěła dla k pokuće 3 280 eurow zasudźili. Tež ta njebě zapłaćena. Tuž z wukazom zajeća za nim pytachu. 20lětneho dowjezechu do jastwa.

Drježdźany (B/SN). Ewangelska cyrkej w Němskej kóždolětnje „Turizmowe dušepastyrstwo we wukraju“ zarjaduje. Tak lětsa sto fararkow a fararjow w europskich krajach na 48 městnosćach němsko­rěčne Bože słužby zmóžnja. Farar Friedemann Oehme w Rumunskej sedmihródski projektny chór hromadźe z Kamjeničanskim chórom nawjeduje.

Za nabožiny zamołwići

Berlin (B/SN). Wšitke frakcije zwjazkoweho sejma su swojich zamołwitych za nabožinu a cyrkwje pomjenowali. Su to Norbert Altenkamp (CDU), Hubertus Heil (SPD), Nicole Höchst (AfD), Lamya Kaddor (Zeleni) a Bodo Ramelow (Lěwica). Stajnje dwaj čłonaj staj katolskaj abo protestantiskaj, jedna čłonka je muslimka. Woni su tež za židow, budd­histow, muslimow a dalše nabožiny w Němskej zamołwići.

Přihotuja trajnu wustajeńcu

Składnostnje wčerawšeho Swětoweho dnja putnikowanja je sakska statna ministerka za kulturu a turizm Barbara Klepsch (CDU) na wuznam putniko­wanja w swobodnym staće jako spi­rituelne nazhonjenje na jednej a jako turistiski poskitk na druhej stronje skedźbniła.

Drježdźany (SN). „Putnikowanje přićahuje ludźi, kotřiž pytaja měr a wotputanje, kotřiž chcedźa so wědomje z přirodu a kulturu rozestajeć a kotřiž sebje ­samoho pytaja“, Barbara Klepsch w nowinskej zdźělence wuzběhny. Nimo toho sylnja putnikowanje wjesne kónčiny a dawa jim nowe hospodarske impulsy, na přikład přez putniske hospody, kulturne zarjadowanja abo lokalne produkty. „Putnikowanje w Sakskej: To su awtentiske dožiwjenja, wot sezony njewotwisne turistiske poskitki a lěto a wjetša cilowa skupina, kotraž sej spiritualitu, naslědnosć a regionalnu mnohotnosć waži“, ministerka dale piše.

Damaskus (dpa/SN). W Syriskej chcedźa w septembru prěnje wólby parlamenta po powalenju wjelelětneho mócnarja Bashara al-Assada přewjesć. Wothłosowanje planuja w tydźenju wot 15. do 20. septembra, nawoda wólbneje komisije Mohammed al-Ahmad rjekny. Dokładny termin hišće wozjewja. W nowym parlamenće ma 210 zapósłancow sedźeć. Třećinu z nich chce přechodny prezident Ahmet al-Sharaa sam pomjenować.

Znjewužiwanje pjenjez wotkryli

Berlin (dpa/SN). Po wšej Němskej su loni 421 padow „znjewužiwanja statnych posłužbow přez cwólby“ w zwisku z wobydlerskim pjenjezom wotkryli. W 209 padach su tole jako chłostajomny njeskutk přizjewili. Tole wuchadźa z wotmołwy zwjazkoweho knježerstwa na naprašowanje Zelenych. Lěta 2023 běchu z cyłkownje 229 padami wjele mjenje znjewužiwanja zwěsćili. Cwólby we wjacorych zwjazkowych krajach runočasnje próstwy wo pomoc zapodadźa.

Dźěći migrantow z problemami