Sudnistwo: Le Pen wina
Paris (dpa/SN). W procesu přećiwo francoskej prawicarskej populistiskej politikarce Marine Le Pen překřiwjenja spěchowanskich srědkow EU dla je sudnistwo rozsudźiło, zo je Le Pen wina. Měru chłostanja chcychu w běhu dnja wozjewić. Statne rěčnistwo žada sej za 56lětnu pjeć lět jastwa a pjenježnu pokutu. Nimo toho chcedźa jej zakazać, k wólbam nastupić. Le Pen chce k prezidentskim wólbam 2027 nastupić. Wona wšitke wumjetowanja wotpokazuje.
Kijew wumjetuje Putinej
Kijew (dpa/SN). Hladajo na dale trajace ruske napady na ukrainske města a na frontu ukrainski prezident Wolodymyr Zelenskyj ruskemu prezidentej Wladimirej Putinej wumjetuje, zo nima žadyn zajim na měrliwym skónčenju konflikta mjez krajomaj. Surowosć ruskich nadpadow pokazuje, kak mało Putina diplomatija zajimuje, rjekny Zelenskyj w swojim widejowym poselstwje.
Steinmeier wopyta Armenisku
Indonescy muslimojo so na přibrjohu Parangkusumo w Bantulu zhromadnje ...
1 700 mortwych zemjerženja dla
Bangkok (dpa/SN). W Bangkoku buchu dźensa rano znowa wjacore wysokodomy ewakuowane, po tym zo bě zemja znowa ržała. Tři dny po ćežkim zemjerženju sylnosće 7,7 ze srjedźišćom w Myanmaru njeje tuž hišće měr zaćahnył. Knježerstwo zdźěli, zo njejsu fachowcy žane střasenja registrowali. Najebać to je mjez wobydlerjemi masowa panika wudyriła. Zamołwići ludźi namołwjeja, dale skedźbliwi wostać a při dalšich střasenjach hnydom twarjenja wopušćić.
W Myanmaru rěča mjeztym wo 1 700 smjertnych woporach zemjerženja. Wjace hac 3 400 ludźi bu zranjenych, wojerske knježerstwo zdźěla. Zemjerženje je tež w susodnych krajach Thailandskej, Kambodźi a Chinje škody zawostajiło.
Hišće raz kandidować?
Rozsudne koło za koaliciju zahajene
Berlin (dpa/SN). CDU, CSU a SPD zahaja dźensa rozsudne koło koaliciskich jednanjow. Předsyda CDU Friedrich Merz zhladuje z wulkim optimizmom na přichodne dny, rjekny wón do zetkanja hłowneje jednanskeje skupiny w centrali SPD w Berlinje. Při tym dźe pak tež wo „někotre wulke zadźěwki“, kotrež chcedźa zhromadnje wotstronić. Hladajo na nowe koaliciske zrěčenje Merz rjekny: „Trjebamy w zasadnych prašenjach němskeje politiki nowy započatk.“ Konkretnje mjenowaše wón wobmjezowanje njeregularneje migracije, sylnjenje hospodarstwa hladajo na mjezynarodne wužadanja a financne planowanje zwjazkoweho etata. „Budźemy wobšěrnje lutować dyrbjeć.“
Předsyda SPD Lars Klingbeil rjekny: „Wšelake dobre žadanja njejsu hišće žane koaliciske zrěčenje. Wažne z wida SPD je modernizowanje kraja a stabilne hospodarstwo a derjeměće tych, kotřiž so napinaja.“ Podobnje rjekny to předsyda CSU Markus Söder. „Dyrbimy zasadne wěcy změnić. To je naš nadawk. To ludźo wot nas prosće wočakuja.“
Trump hrozy Zelenskemu
Prezident USA planuje dalši telefonat z ruskim prezidentom Putinom
Washington (dpa/SN). Prezident USA Donald Trump je ukrainskemu prezidentej Wolodymyrej Zelenskemu z konsekwencami hrozył, jeli so zrěčenju wo wužiwanju ukrainskich surowiznow spjećuje. Trump ma zaćišć, zo chcył Zelenskyj pječa hižo dojednane zrěčenje wupowědźić a nowe žadanja stajeć, rjekny wón žurnalistam w swojim prezidentskim lětadle. „Jeli wón tole čini, dóstanje wón problemy – jara, jara wulke problemy.“ Nimo Zelenskeho je tež ruski prezident Wladimir Putin hněw Trumpa zbudźił, tola z druhich přičin.
Partnerstwo za niwow
Zběžk Budyskich jatych wopominali
To a tamne (31.03.25)
Lěta trajaca zwada wo psyči dawk w sewjerorynsko-westfalskim Hildenje je skónčena. Muž bě so jako lubowar psow w interneće stajnje zaso z psami pokazał. Na to bě jemu měšćanske zarjadnistwo zličbowanku 1 404 eurow za psyči dawk pósłało, dokelž njebě muž jako wobsedźer psow scyła zapisany. Sudnistwo nětko rozsudźi, zo njebě zličbowanka woprawnjena. Psy słušachu mjenujcy dźowce, přećelce, znatym abo susodam.
Atrapa błyskača na priwatnej ležownosći njedaloko württembergskeho Tuttlingena je jara wuspěšna. Wobsedźer zahrody na kromje wsy Frittlingen twjerdźi, zo šoferojo tam nětko wo wjele kedźbliwišo jědu. Zakazać jemu atrapu njemóža. Přiwšěm je sej policija nastroj bliže wobhladała, kotryž runa so błyskačowemu sćežorej. W nim pak njesteji awtomatiska kamera, ale kórkowa škleńca.
Amerika žadyn partner wjace
Ottawa (dpa/SN). Na nowowusměrjenje poćahow swojeho kraja k USA je kanadski premierminister Mark Carney wobydlerjow nastajił. „Je wočiwidne, zo njejsu zjednoćene staty Ameriki žadyn spušćomny partner wjace“, rjekny Carney w stolicy Ottawje. Hladajo na připowědźene přidatne cła přez prezidenta USA Donalda Trumpa nichtó njewě, što jako přichodne přińdźe, wón rjekny. Kanada měła swoju wotwisnosć wot USA znižić a sej swójske kmanosće wuwědomić.
Lěwica za bój přećiwo drogam
Drježdźany (dpa/SN). Sakska měła wjace za škit ludźi před drogami a alkoholom činić. Tole žada sej Lěwica w Sakskim krajnym sejmje. Wona pokaza na to, zo je loni 28 ludźi na sćěhi drogow w Sakskej zemrěło. Znajmjeńša 840 ludźi je na sćěhi alkohola a 2 921 na sćěhi kurjenja zemrěło, politikarka Lěwicy Juliane Nagel zdźěli. Sakska měła so w Zwjazkowej radźe za zakaz wabjenja za alkohol zasadźić a předawanje tobaka w normalnych wobchodach zakazać.
Tójšto škody wobšudnistwa dla
