Klöckner wólby prezidija zakituje
Berlin (dpa/SN). Nowa prezidentka zwjazkoweho sejma Julia Klöckner je wólby prezidija sejma zakitowała, kotremuž znowa žadyn zastupnik AfD njepřisłuša. „Kóždy jednotliwy zapósłanc rozsudźi sam, hač kandidatej swój hłós spožči abo nic“, rjekny politikarka CDU sćelakej ARD. Njeje nadawk prezidentki zwjazkoweho sejma posudźować, kak so wjetšina parlamenta rozsudźi.
Nimo Klöckner bě zwjazkowy sejm wiceprezidentow CSU, SPD, Zelenych a Lěwicy wuzwolił. Kandidat AfD Gerold Otten bě pobrachowacych hłosow dla we wólbach přepadnył.
Klöckner zdobom přizna, zo nowy zwjazkowy sejm towaršnosć Němskeje w swojej šěrokosći njewotbłyšćuje. „W sejmje je přemało žonow. To mam za njelěpšinu w politiskim dźěle“, wona rjekny. Žony wučinjeja mjenje hač třećinu wšěch 630 zapósłancow. To je mjenje hač w minjenej legislaturnej dobje. Zo njeje wuchod dosć zastupjeny, Klöckner wěrić nochce: Kóždy zapósłanc zwjazkoweho sejma steji za wšón němski lud.
Njetrjebawša gloria
Zawěsće su sej wšitke politiske strony wčera wječor mjez sobu na ramjo klepali a sej gratulowali, zo su zhromadnje kandidatej AfD w prezidiju zwjazkoweho sejma zadźěwali. Dźensa słyšimy w powěsćach, zo AfD w nahladnosći mjez wolerjemi dale přiběra a zo leži z aktualnje 24 procentami runje hišće dwaj procentaj za uniju CDU/CSU, kotraž je na historiske 26 procentow spadnyła.
Njeby lěpje było, AfD do wšědneho politiskeho dźěła zwjazkoweho sejma zapřijeć? Potom bychu wšitcy widźeli, zo tež pola AfD jenož z wodu warja a zo strona dźiwy wuskutkować njemóže. Z njepřestajnym wumjezowanjom pak dóstanje wona swjatoćinu, kotruž sej scyła zasłužiła njeje. AfD njeje hišće ženje dopokazała, što woprawdźe zamóže. Město toho smě so wona w sćinje wohnjoweje murje dale wuwiwać a rosć. Friedrich Merz jej ze swojej politiku přiliwa a hněwnych čłonow CDU do jeje rukow ćěri. Njech so nichtó njedźiwa, hdyž budźe raz přepozdźe. Marko Wjeńka
Židowska kultura w srjedźišću
Lipsk (dpa/SN). Swoju 245. hrajnu dobu chce Lipšćanska sukelnica lětsa z kóncom tydźenja demokratije zahajić. Po hesłom „Prawy zwuk trjechić“ přeprošuje sukelnica wot 5. hač do 7. septembra k najwšelakorišim zarjadowanjam, direktor Andreas Schulz při předstajenju noweho programa hrajneje doby 2025/2026 w Lipsku rjekny. Hudźbnje zahaja sezonu z „Wulkim Concertom“ pod nawodom kapałneho mištra Andrisa Nelsona.
Hudźbny kompleks „Tacheles“ su wusměrili na „Lěto Židowskeje kultury“, kotrež chcedźa 2026 po cyłej Sakskej swjećić. Na programje steja orchestrowe a komornohudźbne twórby mjez druhim Ernsta Blocha, Pavela Haasa a Paula Ben-Haima. Nimo toho zaklinči wjace hač 15 hudźbnych twórbow estiskeho komponista Arva Pärtsa.
Sezonu skulojća sinfoniske kompozicije a instrumentalne koncerty Brahmsa, Liszta, Brucknera, MendelssohnBartholdyja, Rachmaninoffa, Bernsteina, R. Straussa, Dvořaka, Mahlera, Beethovena a Čajkowskeho. Za dźěći zaklinči „Popjelawka“.
Iniciatiwa za digitalne płaćenje
Frankfurt/Berlin (dpa/SN). Digitalnje zapłaćić z kartku abo mobilnym telefonom je mjez ludźimi dale a woblubowaniše – tola nic wšudźe w Němskej móžne. Nowa iniciatiwa „Němska zapłaći digitalnje“ wjacorych poskićowarjow posłužby zapłaćenja chce tajke modele zapłaćenja spěchować a jeje akceptancu zwyšić.
Jako partnerojo su so dotal Commerz Globalpay, Němska banka, Flatpay, Mastercard, SumUp, Unzer, Visa a VR Payment zjednoćili. Iniciatiwa je pak tež dalšim partneram wotewrjena. Z podpěru wobdźělnikow móža mali wikowarjo a dalše předewzaća cyłe lěto wuspytać, kak kupcy digitalne móžnosće zapłaćenja wužiwaja. W tymle času přewozmu partnerojo iniciatiwy kóšty za nakup terminala a instalacije kaž tež popłatki za wužiwanje techniki při kóždym płaćenju.
Wuměnjenje za sobudźěło je, zo njejsu předewzaća dotal žane móžnosće digitalneho płaćenja poskićeli a zo nimaja wjace hač 50 000 eurow wobrota.
Ze swojej ideju orientuja so wobdźělnicy na iniciatiwach druhich krajow. Tak maja w Pólskej mjeztym dwójce telko digitalnych terminalow kaž w Němskej.
Nalětnja pycha w Rogeńskim parku
To a tamne (26.03.25)
Nadhodźiny w swětnišćowej staciji ISS dwěmaj astronawtomaj USA njezapłaća. Tole zdźěla swětnišćowy zarjad NASA. Runje druhim přistajenym knježerstwa dóstanjetaj wonaj mzdu za 40 hodźinski dźěłowy tydźeń. Nimo toho wšak přewozmje NASA kóšty za transport, přebywanje a zastaranje w ISS. Techniskeje pany dla dyrbještaj wobaj dźewjeć měsacow na swój nawrót na zemju čakać.
Po dwanaće hodźinach čakanja na lodźe jězora su pomocnicy w Alasce nana a toho dwě dźěsći wuchowali. Lětadło swójby bě so hižo nimale dospołnje podnuriło, medije USA rozprawjeja. Přiwšěm mějachu wšitcy třo hišće wulke zbožo: Małe lětadło bě z njeznateje přičiny na zamjerznjenym jězoru přizemić dyrbjało. Wot toho časa pomocnicy za nim pytachu. Skónčnje mašinu w njesměrnej lodowej pusćinje Alaski wuhladachu.
Etat z wulkimi deficitami schwalili
Na swojim wurjadnym posedźenju je wokrjesny sejmik w Zhorjelcu wčera dwójny etat za lěće 2025/2026 schwalił. Po dołhej ćahańcy je wokrjes nětko zaso kmany jednać a swoje nadawki w połnym wobjimje spjelnjeć.
Zhorjelc (AK/SN). Wokrjes Zhorjelc je we wažnych nadawkach dale kmany jednać. Ze snadnej wjetšinu je wokrjesny sejmik wčera dwójny etat za lěće 2025/2026 wobzamknył. Krajneho radu dr. Stephana Meyera namołwjachu, so pola swobodneho stata Sakskeje wo připokazanja na zakładźe potrěbnosćow prócować, zo bychu deficity wurunali. 2025 wučinjeja tute deficity 59 mio. eurow, 2026 budźe to něhdźe 86 milionow eurow. Konceptej za strukturu etata pak radźićelki a radźićeljo njepřihłosowachu.
„Amaterojo“ w Běłym domje
Washington (dpa/SN). Opozicija w parlamenće USA chce fatalne komunikaciske misnjenje knježerstwa přepytować dać. Nawoda frakcije demokratow w senaće Chuck Schumer rěči w tym zwisku wo „amaterskim zadźerženju“. W skupinskim chaće wodźacych zastupnikow knježerstwa rěčachu wo planowanym nadpadźe USA na milicu Huthijow w Jemenje. Mylnje su tež šefredaktora časopisa The Atlantic do skupiny přiwzali a jemu material pósłali, kiž je wón wozjewił.
Teroristka před sudnistwom
Celle (dpa/SN). Bywša teroristka skupiny RAF Daniela Klette dyrbi so wot dźensnišeho pospyta mordarstwa a rubježneho nadpada w 13 padach dla před sudnistwom zamołwić. Statne rěčnistwo 66lětnej wumjetuje, zo je mjez 1999 a 2016 zhromadnje z dalšimaj kumpanomaj wjacore pjenježne transportery a kupnicy wurubiła, zo by žiwjenje w ilegalnosći financowała. Při tym bě cwólba wjace hac 2,7 milionow eurow rubiła. Klette běchu 24. februara 2024 zajeli.
Nalada trochu lěpša
