„Migranća hižo w Pólskej!“
Demonstracije přećiwo wukrajnikam po wšěm kraju – cyrkej so hidźe wobara
Waršawa. Tysacy ludźi su njedawno w Pólskej přećiwo migraciji demonstrowali. Protestne zarjadowanja wotměchu so we Waršawje a 80 dalšich městach kraja. Do protestow namołwjała bě prawicarsko-populistiska a ekstremistiska strona Konfederacija, kotraž bě we wólbach parlamenta 2023 nimale 7,2 procentaj hłosow dóstała. Na transparentach a z ertnymi hesłami sej demonstranća žadachu „Kónc zapućowanja“ abo „Zadźeržće inwaziju migrantow“. Nimo napisow „Tule je Pólska“ abo „Pólska słuša Polakam“ běchu z městnami tež symbole přećiwo muslimam a židam widźeć. W někotrych wjetšich městach zarjadowachu přećiwne demonstracije pod hesłom „Zadźeržće fašizm“. Ličba wobdźělnikow pak bě přewidna.
Woborna winowatosć bórze trěbna
Berlin (dpa/SN). W diskusiji wo planowanej nowej wobornej winowatosći wupraja so zakitowanski politikar CDU Thomas Röwenkamp za to, nawrót k starej zakonskej wobornej winowatosći zmóžnić. Unija CDU/CSU chcyła „hižo nětko nawrót k starej wobornej winowatosći do zakonja zapisać“, rjekny Röwenkamp, předsyda zakitowanskeho wuběrka zwjazkoweho sejma, nowinarjam.
Röwenkamp dwěluje, zo planowana dobrowólna woborna słužba zakitowanskeho ministra Borisa Pistoriusa (SPD) dosaha, hač do lěta 2031 wójsko wo něhdźe 80 000 přidatnych wojakow na potom 260 000 wojakow rozšěrić. „Mam wulke dwěle, zo so tole w tak krótkim času poradźi.“ Namjet Pistoriusa, kotryž chcedźa kónc awgusta w zwjazkowym knježerstwje wobjednawać, měł so z wida unije předźěłać. Zaměr je, „zo Němska zaměry swojeje woborneje kmanosće, kotrež bě wona NATO přilubiła, tež personelnje přesadźi“. Plany Pistoriusa měli so tuž hišće raz dokładnje předźěłać, Röwenkamp w tym zwisku měni.
Hornčerske wiki ludźi přiwabili
To a tamne (01.08.25)
Na wšěch 3 000 kubiknych metrow sykaneho drjewa su zamołwići heavy-metaloweho festiwala w schleswigsko-holsteinskim Wackenje skazali, zo móhli so planowane koncerty na swjedźenišću najebać błóto wotměć. Dešć minjenych dnjow – dobre 40 litrow na kwadratny meter – je festiwalnišćo za 80 000 wobdźělnikow do błóćaneho žumpadła přeměnił. Nalada je najebać to dobra, zarjadowarjo twjerdźa. Tuchwilne słónčne wjedro spožča jim „wjele optimizma“.
18 000 eurow dołžeše němskemu financnemu zarjadej w Šwicarskej bydlacy Němc, jako chcyše pomjezny přechod Rheinheim do Němskeje přeprěčić. Při kontroli cłownicy zwěsćichu, zo přećiwo mužej wukaz zajeća předleži. Sudnistwo bě jeho dawkoweho jebanstwa dla zasudźiło. Zastojnicy muža zajachu a do přichodneho jastwa dowjezechu.
Skała znowa ze swjedźenišćom
Italska wobara so Ruskej
Rom (dpa/SN). Italske knježerstwo reaguje z wótrej kritiku na lisćinu ruskeho wonkowneho ministerstwa z pozdatnje antiruskimi wuprajenjemi zapadnych politikarjow. Zběrka njeje ničo druhe „hač akcija propagandy“, z kotrejž chce Ruska swoju zamołwitosć w zwisku z wójnu w Ukrainje zamazać, rjekny ministerska prezidentka Giorgia Meloni. Na lisćinje steja tež italscy politikarjo kaž statny prezident Sergio Mattarella abo wonkowny minister Antonio Tajani.
Dalše zemjerženja na wuchodźe
Moskwa (dpa/SN). Po sylnym zemjerženju před połkupu Kamčatka na dalokim wuchodźe Ruskeje njeje so połoženje hišće změrowało. Minjenu nóc registrowaše institut za geofyziku Ruskeje akademije wědomosćow tójšto dalšich słabšich zemjerženjow. Tež w přichodnych tydźenjach hišće z tajkimi liča. Za miliony ludźi we wokolinje Pacifiskeho oceana płaća dale warnowanja před tsunamijemi. Wočakowana katastrofa dotal njebě. Při wšěm wostanu ludźo kedźbliwi.
Ruskeho spiona zajeli
Fanojo heavy-metaloweje hudźby zetkawaja so wot wčerawšeho na ...
Klingbeil nadźija so rozmacha
Berlin (dpa/SN). Zwjazkowy financny minister Lars Klingbeil (SPD) nadźija so ze swojim etatom 2026 nowych impulsow na dobro rozmacha. „Najwažniše je, zawěsćić dźěłowe městna a hospodarstwo dale sylnić“, rjekny politikar SPD po posedźenju zwjazkoweho knježerstwa, na kotrymž běchu naćisk etata schwalili. Klingbeil wuzběhny podpěru na dobro ludźi, mjez druhim wyšu pawšalu za dojězdźowarjow a dalewjedźenje cyłoněmskeje jězdźenki za busy a železnicy. Ludźo dyrbjeli wšědny dźeń pytnyć, zo so něšto na dobro změni. Stat ze srědkami zamołwiće wobchadźa, Klingbeil rjekny.
Nowy etat za 2026 předwidźi wudawki 520 miliardow eurow a 174 miliardow eurow nowych kreditow.
Masiwne nalěty na stolicu Kijew
Kijew (dpa/SN). Při masiwnych ruskich nalětach na ukrainsku stolicu Kijew je po informacijach medijow znajmjeńša šěsć ludźi žiwjenje přisadźiło. Dźesatki so zranichu. Mjez zranjenymi su tež třo policisća. Prezident Wolodymyr Zelenskyj prezentowaše w interneće widejo, kiž pokazuje zničene twarjenja, woheń a kur.
W měsće su nadpadow dla wjacore wohenje wudyrili. Wobškodźene buchu tež chorownja, šule a bydlenja. Nowinarjo rozprawja wo wjacorych detonacijach w měsće.
Połoženje na fronće wostawa za ukrainskich zakitowarjow dale wobćežne. Ruske wójsko je wokoło města Pokrowsk ofensiwu zahajiło. Při tym hrozy ukrainskim jednotkam wobkruženje.
Wadephul na ćežkej misiji w Israelu
Berlin (dpa/SN). Wonkowny minister Johann Wadephul (CDU) je so dźensa na dwaj dnjej trajacy wopyt do Israela a do kraja zapadnje Jordana podał. W Tel Avivje wočakowaše jeho israelski wonkowny minister Gideon Saar.
Jutře chce so Wadephul w Jerusalemje ze sobudźěłaćerjemi UNO a w Ramallahu ze zastupnikami palestinskeho awtonomneho zarjadnistwa zetkać. Wotběh rozmołwow budźe rozsudny za dalše postupowanje Němskeje, tak zwjazkowy kancler Friedrich Merz.
Minjene dny běchu Francoska, Wulka Britaniska a mjeztym tež Kanada připowědźili, zo chcedźa stat Palestinjanow oficialnje připóznać. Němska porno tomu měni, zo měli tutón krok skerje na kóncu dołheho procesa po puću k rozrisanju dweju statow zwoprawdźić. Doraznje pak žada sej Němska wot Israela, zo ciwilnu ludnosć w Gazaskim pasmje zastaraja. Merz njebě hladajo na to naprawy přećiwo Israelej wuzamknył. Jeho předchadnik Olaf Scholz (SPD) bě Israel stajnje jenož powšitkownje namołwjał.
