Wólbny bój budźe zajimawy
Bywši předsyda Europskeho parlamenta Martin Schulz chce jako kanclerski kandidat SPD nastupić a stronu nawjedować. Serbske Nowiny su so wobhonili, što čitarjo politikarjej přicpěwaja.
Dr. Měrćin Krawc, předsyda SPD w Budyšinje a wokolinje: Wažu sej Martina Schulzowe jasne słowa a wolu k solidariće, kotrež wón na mjezynarodnym parkeće doraznje zastupuje a za kotrež budźe so w našim kraju zasadźeć, zo by so wulka škałba w towaršnosći zaso zawrěła. Přicpěwam jemu, zo so ludźom přiwobroći a demokratiju z tuchwilneje krizy powjedźe.
Dr. Annalena Schmidt, projektowa sobudźěłaćerka Serbskeho instituta: Schulz je wupokazany europski politikar, jeho zwjazkopolitiske stejišćo pak hišće jasne njeje. Witam, zo je so raznje přećiwo prawicarstwu a prawicarskemu populizmej wuprajił a hornju hranicu ličby ćěkancow wotpokazał. Njeje cyle wěste, kotre šansy čerwjeno-čerwjeno-zelena koalicija z nim ma. Derje, zo njeje so přećiwo jej wuprajił. Wón ma lěpše šansy hač Gabriel. Škoda pak, zo njebě žana generaciska a splahowa změna w SPD, wobaj staj staraj mužej.
Wšěm ludźom měr a nadźiju
Je z wašnjom, zo sej k nowemu lětu mjez sobu wšo najlěpše přejemy. Mnozy ludźo pak maja spočatk lěta tež za přičinu, sej něšto wosebiteho předewzać abo přeć. Serbske Nowiny chcychu wědźeć, što sej Serbja do lěta 2017 přeja abo što su sej předewzali.
Sabina Mrózowa, naměstnica nawodnicy Budyskeje Serbskeje pěstowarnje „Jan Radyserb-Wjela“: Mi je najwažniše, zo wšitcy strowi wostanjemy, kubłarki a dźěći. Nastupajo našu pěstowarnju, kotraž je w nošerstwje Křesćansko-socialneho kubłanskeho skutka Miłoćicy, so nadźijamy, zo móžemy z dotalnym dźěłom pokroćować. Wosebje spokoja nas zhromadne dźěło ze staršimi. Wjeselimy so na mnohe rjane wjerški z našimi chowancami, kaž na ptači kwas, kotryž bórze zaso w Serbskim ludowym ansamblu woswjećimy.
Hłownje přihłosuja
Zwjazkowa kanclerka Angela Merkel (CDU) je připowědźiła, zo klětu znowa za zastojnstwo kandiduje. Smy so mjez Serbami wobhonili, što k tomu měnja.
Hanaróža Šafratowa z Bukec: Kandidaturu knjenje Merkel sym mjenje abo bóle wočakowała. Tróšku so prašam, što je wona za Němsku docpěła – jasny pak je jeje wukon na europskej runinje. Wona je jedna z tych, kotřiž hišće za Europu wojuja, a to je wosebje w dźensnišim času jara trjeba. Njewěrju do toho, zo móže kóždy jednotliwy stat Europskeje unije sam za sebje eksistować. Hačrunjež nimam wšitko za spomóžne, štož wot EU přińdźe, je wona zakładnje wažna.
Populisća čuja so wobkrućeni
Nowy prezident USA Donald Trump zaběra ludźi tež w Němskej a Europje. Redakcija SN je so mjez někotrymi z nich wobhoniła, hač a kak so wuslědk w USA po jich měnjenju na klětuše wólby zwjazkoweho sejma wuskutkuje.
Dr. Měrćin Wałda, rěčnik iniciatiwneje skupiny Serbski sejm: Wo tym sym přeswědčeny. Krótko po dobyću gratulowachu Trumpej prawicarjo kaž Geert Wilders, Marine Le Pen, Viktor Orban, Frauke Petry a dalši. Moja generacija je wotrostła w nadźiji, ženje hižo šowinizm, rasizm abo awtoritarizm dožiwić. Njejsym wěrił, zo budźe to tež w Němskej w tak krótkim času zaso móžno. Ale hižo w našej domiznje mamy prawicarskich hewrjekarjow, kotřiž čuja so „zmužići“ přez parole dale a wuspěšnišich populistiskich stron. To ći dych wotrazy.
Sylnu wolu zbudźić
Mjez gratulantami k 70ćinam Romanija Rosy w Berlinje běchu zastupjerjo w Němskej bydlacych Židow, Muslimow a afriskich narodow. Wosebje witaše wón Serbow a zastupjerjow w Němskej připóznatych awtochtonych mjeńšinow. Milenka Rječcyna je so někotrych přitomnych za wuznamom skutkowanja Rosy prašała.
Dawid Statnik, předsyda Domowiny: Romani Rose je prócowar wo prawa mjeńšinow a tež prócowar wo prawa čłowjestwa. Wězo multiplikuje wón zajimy Sintow a Romow, hdyž wón zjawnosć na problemy jedneje, swojeje mjeńšiny pokazuje. To so politisce hódnoći a to ma wuskutki za wšitke dalše mjeńšiny. To sam tež přeco zaso w mjeńšinowej radźe zwěsćam. Jeho postupowanje ma swoje dobro. Přetož, hdyž sej jedna tam zastupjena mjeńšina něšto wudobudźe, ma to tež lěpšiny za wšitke druhe.
Sympatiju sej zdobyli
4. hrodowa nóc Serbskeho ludoweho ansambla w Mortkowje pod hesłom „Lesć“ je zańdźeny pjatk a sobotu mnohich zajimcow přiwabiła. Kak pak je so jim inscenacija lubiła? Milenka Rječcyna je so wopytowarjow prašała.
Jaroslav Pukač a Lubina Žurowa z Choćebuza: Dojědźemoj sej rady na zarjadowanja na tule twjerdźiznu, byrnjež w Delnjej Łužicy bydliłoj. Inscenacija je so namaj spodobała, rěčnje a hudźbnje mamoj ju za poradźenu. Přałoj bychmoj sej wjetši serbskorěčny podźěl. Rjenje, zo smój tule tón abo tamny serbski ludowy spěw zasłyšałoj.
Eduard Luhmann ze Smjerdźaceje: Stawizna je z napjatosću pjelnjena. Sym wćipny, kak so wona dale pleće. Sym stajnje znowa překwapjeny wo bohatosći serbskich spěwow a wo tym, kak rjenje wone klinča. Zdobom mje wjeseli, kak je wuměłcy do jednanja zapletuja. Tež ambiente twjerdźizny je krasny.
Mjez sobuso lěpje zeznać
Festiwal serbskeje kultury wotmě so minjeny kónc tydźenja w Janšojcach. Mnozy zajimcy z Delnjeje, srjedźneje a Hornjeje Łužicy sej tam wulećachu. Woprašachmy někotrych za jich zaćišćom.
Jurij Špitank ze Zejic, předsyda TCM: Do Janšojc sym so hłownje priwatnje podał, dokelž jako Hornjoserb Delnju Łužicu přemało znaju. Cyrkej bě na kemšach derje wopytana, mnohe žony běchu narodnu drastu woblečene a kemšerjo su kěrluše z nowych ewangelskich spěwarskich „Tyca“ sobu zanošowali. To su rjane spěwy. Tajki wopyt je zdobom dobra přiležnosć, z Delnjej Łužicu dalše styki nawjazać.
Wolfgang Kotisek z Brězowki, nawoda Slepjanskeho folklorneho ansambla: Je rjenje, so z druhimi kulturnymi ćělesami tu na festiwalu zetkać. Derje zdobom je, zo so ludźom žiwe tradicije předstajeja. Hač w Delnjej abo Hornjej Łužicy – wšudźe, hdźež so tajke zarjadowanja wotměwaja, smy jako ansambl rady pódla. To je wosebje młodostnym pohon.
Super nalada a zhromadnosć
Pjatnaće mustwow je so póndźelu w Konjecach na beachturje Radija Satkula wobdźěliło. Po ličbach Konječanskeje młodźiny bě tam něhdźe 250 ludźi. Za sportowu redakciju SN bě to přičina, so někotrych z nich za jich měnjenjom prašeć. Kilian Hrjehor je to přewzał.
Pia Šołćic z Ralbic: Sym tu jenož přihladowarka. To pak je runje tak rjenje, wšako je tu jara wjele młodostnych. Dale sym překwapjena, zo tu telko mustwow sobu čini. To je cool.
Jadwiga Ledźborjec z Ralbic: Atmosfera je jara přijomna. Młodostni mjez sobu serbsce rěča, štož mje zwjesela. Tež wjedro derje „sobu hraje“. Jako volleyballistka drje so njewobdźělu, přiwšěm je to za mnje wulkotne prózdninske sportowe zarjadowanje.
Nadine Cižankec z Jawory: Satkula-beach je za mnje wažny wobstatk kóždeho lěća. Zetkawamy so z přećelkami a přećelemi a zhromadnje sportujemy. Mamy při tym swoje wjeselo. Je super, zo Radijo Satkula beachturu kóždolětnje organizuje. Tak so mnozy młodostni w lěću přeco zaso widźa.
Dowol sej skazyć njedać
Sćěhuješ-li medije, wone wozjewjeja, zo strach před terorowymi nadpadami w Němskej přiběra. Redaktorojo Serbskich Nowin su so ludźi prašeli, hač so boja abo hač maja tajke strachi wliw na jich planowanje dolowa.
Angelika Ćěpicowa z Kulowa: Byrnjež kedźbliwy być dyrbjał, njemóžeš so tola doma ze strachom chować. Do Turkowskeje wšak sprawnje prajene wokomiknje lećała njebych. Powšitkownje pak njetrjebamy so bojeć. Stać móže so wšudźe něšto, tež na kóždym lětanišću a samo doma. Jako swójba smy hižo wjele po wukraju pućowali a tež dźensa hišće rady do dowola jězdźimy. Njejsmy ženje nihdźe ničo hubjene nazhonili. Čehodla měli so tuž nětko nastajnosći bojeć?
Stefan Cuška Z Budyšina: W oktobrje poleću ze Smjerdźečanskej rejwanskej skupinu do Indiskeje. Hišće je wjele chwile, ale přiwšěm so trochu starosću. Generelnje do afriskich krajow tuchwilneho njeměra dla lećał njebych. Měnju pak, zo móže mje teror wšudźe trjechić, tež w Budyšinje.
Rozdźěle wobohaćeja zhromadnosć
Za měnjenjemi wo 38. swjedźenju serbskeje poezije je so Bosćan Nawka wobdźělnikow prašał.
Traian Pop, basnik a nakładnik POP-nakładnistwa: Tele zetkanje je wulkotne! Swjedźeń skići móžnosć, so zeznać a so zetkać – wšako su mnozy awtorojo tu, kotrychž sej jara česću. A za mnje jako nakładnika je to zdobom šansa, z nowymi, mjezynarodnymi basnikami zwisk nawjazać. Pochad je při tym wšojedny, dźiwam prěnjorjadnje na kwalitu, kotruž tu na kóždy pad namakamy. Přebasnjenje z originalneje rěče mam za kmany přikład, zo móžemy – a dyrbimy! – dalšemu rozpačenju Europy zadźěwać. Zhromadnu rěč poezije tule słyšeć je mi wulke wjeselo.
Ivo Harák, čěski basnik: Sym mjeztym hižo pjaty raz tu, a zarjadowanje so mi přeco hišće spodoba. Sym stajnje wćipny na twórby młodych awtorow, a lětsa su mje wone jara pozitiwnje překwapili. Swjedźeń je cyle w zmysle pućrubarja Smolerja, wuznamneho spisowaćela a twarca mostow mjez kulturami.
